15
Sota piton anghil la engipedaw nonta penosa nen Apo Shiyos
1 Jet µara mowan i apil la kaskasshaaw wa sinjas ja inon-an kod ma naykayang. Waray piton anghil ja emengimotok ni piton kalasin pandikat ni tood dobong. Sajay may ka-onoran na pandikat ni too ja penosa nen Apo Shiyos, ta sajay i pospos ni bonget to.
2 Jet µara pay i inon-an kon baybay ja singa samding i itsora to, nem µara ngoy singa apoy to. Jet sota ira toon engabak nonta Animal, tan eg nanshayaw nonta dineka ja kabakbakdang nontan na Animal, ono eg emalka-an ni domiro nonta ngaran to, si-kara sota dimayat nodta kad-an ni baybay ya singa samding. Nanpengegshi ira ni kalshang ja in-akan nen Apo Shiyos son si-kara. 3 Jet inkansiyon sha sota kansiyon nen Moises ja emansilbi so nen Apo Shiyos nonta bayag da, tan sota kansiyon nonta Kalniro, ja kowan sha ey, “Kangeto-an tan kaskasshaaw i dingdingkam, si-kam Apo Shiyos ja Manakabalin! Koston emin, tan podnon emin i aramid mo. Si-kam i ari ja µara ni olay ingkatod ingka. 4 Angken sipa, entakot shaka Apo Shiyos et sota ngaran mo i emayshedjaw, ta si-kam bengat i koston Shiyos. Emin na ka-ili-ili shi dobong, ondaw ira di ja si-kam i panshedjawan sha, ta sota moka pengigsheng ja kosto, inon-an sha.” Sajay i inkansiyon sha.
5 Jet idi naksheng iyay, inon-an ko sota Timplo shima dangit ja edo-katan et inon-an ko sota mismon kad-an nen Apo Shiyos. 6 Nodta Timplo, bimo-day ali sota piton anghil ja engita-jon nonta pito ngon kalasin pandikat ni tood dobong. Jet sota ira anghil, nanbaro ira ni kowan sha ey linen ja emenenili. Sota pagew sha, ebedbeshan ni balitok. 7 Jet sota sakey ya mayka-pat ta palsowa ja µara nodta kad-an ni tinongawan nen Apo Shiyos, in-aknan to sota piton anghil ni pito ngon malokong. Sajay iren malokong, nankepno, jet si-katoy may-eshig ey nay-inan ni penosa nen Apo Shiyos. Si Apo Shiyos, µared biyag ni olay ingkatod ingka. 8 Jet sota Timplo, enapno ni asok ja edapo son Apo Shiyos. Sotan i mengipa-sas ni kayshedjawan to, tan sota panakabalin to, jet angken sipa enshiy makasekep nodta Timplo ingkatod mepospos sota piton digat ja pedaw ira nonta piton anghil.