3 San Juan 1

SOTA MAYKATDON SOLAT NEN

SAN JUAN

¹ Si-kak i sakey ya kalekayan nodta emati son Cristo, jet sajay ya solat ko, para son si-kam Gayo, ja podnon ensemek ko.

² Si-kam ma kajem ko ja ensemek ko, amtak ey mapteng i µared nemnem mo, ja µara ni olay son si-kam si Apo Shiyos. Jet say shawat ko ngo son si-kato, sapay koma ta mapteng ngo ni olay i bakdang mo, tan emin na dag-en mo, mapteng komay panbenagan sha. ³ Ebadeg ga pasiya i imdeng ko, ta µaray agi tayon mimotok alin edapo son si-kayo, jet si-karay engikowan ali son si-kak ey agpayson kaka mematin pasiya ni olay ni podno maypangkep son Cristo, tan moka i-anam i moka panbibiyag. ⁴ Enshiy eshom ma mengi-kan ni ebadeg ga pan-imdengan ko nem eg sota intenengan kon shamag maypangkep son si-kayon annak kod pamati, ja kowan sha ey kayoka memati ni podno.

Itodtodoy moy moka penintil ni kait shi pamatin kaonmotok shitan

⁵ Si-kam ma ensemek kon kajem ko, mapteng nga pasiya i inpasing mon enintil nonta agi tayod pamati. Angken eg mo pay ira iningsa-an sota eshom, siningpet mo ira.⁶ Jet sotan ira diy mismon engi-istoriya son si-kak nonta mapteng nga inpasing mo, ja ka-asan ni ebadeg ga semek mo son si-kara. Inkowan sha iyay nonta inpakisa-nop sha son si-kamin ememati son Cristo shiyay. Mapteng itan na inpasing mo jet no itoloy mon ontolong son si-kara, si-katoy mengi-kan ni pan-imdengan ngo nen Apo Shiyos.⁷ Si-kara, indekjas shay ili sha, ja en mengikowan ni maypangkep son Jesus shi totoon eg pay laeng memati son si-kato. Isonga mapteng i inpanintil mo son si-kara tep eg mebedin na mengshaw ira ni tolong so ira niya toon eg pay laeng emati.⁸ Isonga mesepol la ontolong kito son si-kara ni kasapolan sha, say mayda-kam kito nodta obdara ni shaka pengikowan ni podnon pamati.

⁹ Waray solat ko so nonta ira kait mod tan ja ememati met laeng son Cristo, nem si Diotripis, eg to pag-an-ano i kowan mi, endedamsis to. Say piyan to, ampet ta si-katoy ma-onoran. ¹⁰ Isonga no ondawak da, µaray ikowan ko son si-kayo maypangkep ni inpasing nen Diotripis son si-kak. Epaladoy inpangi-is-istoriya to maypangkep son si-kak. Nem aliµen sajay bengat pay i aramid to: eg to pay sintilen no µaray onmotok shita kad-an jo ja agi tayod pamati, tan toka iparit pay i eshom ja menintil son si-kara. Sota ira menintil, toka pay pan-a-kala; eg to itolok ja mekisa-nop ira nodta kait ta emati son Cristo.

¹¹ Si-kam ma kajem kon ensemek ko, karam onoran mango iyay ya ngaaw wa aramid to, no diket say onoran mo, sota mapteng. Sota mapteng i aramid to, µara son Apo Shiyos. Nem sota ngaaw i aramid to, enshiy Shiyos to.

¹² Si Demetrio i sakey ya onoran jo. Eshakel i emengikowan ey mapteng i aramid to, jet say ka-asan to, sota in-onod to so ni podno. Jet angken si-kami, mika ikowan ey agpayso ja mapteng i aramid to et amtayo met ey say mika ikowan, podno.

¹³ Eshakel pay i piyan kon ikowan son si-kam nem ekak koston isolat ta emin. ¹⁴ Waray namnamak ka ondaw shagos ja manbisita da son si-kam et mantabtabal kita ja mismo.

¹⁵ Sapay koma ta µara ked talna. Saja ira emin na maka-amta son si-kam shiyay, kowan sha ey pekikowan koy semek sha son si-kam. Jet pekikowan mo ngoy semek mi so nonta ira emin na am-amta mid tan.