4
Iyay i pengilesinan jo ni podno tan o-owap
1 Si-kayon kait kod pamati ja ensemek ko, karejo iba-ngat ja pati-en i kompormin too ja ikowan to ey sota Ispirito Santo nen Apo Shiyos i kedepo-i ni toka itoro. No diket ashal jo nin no agpayson edapo son Apo Shiyos, tep eshakel iray ma-o-owap ja kowan sha ey si Apo Shiyos i engibetkag son si-karen mengitosho. Jet si-karay naywaris shi emin na dogad. 2 Nem sajay i amta-an jo so no agpayson wara sota Ispirito Santo nen Apo Shiyos son si-kara ono ayshi: sota ira mengitosho ey si Jesus, si-kato sota inbetkag ali nen Apo Shiyos, ja nay-anak ja too, si-karay podnoy toro sha, ja waray Ispirito Santo nen Apo Shiyos son si-kara. 3 Nem sota ira aliwen sajay i shaka itoro, enshiy Ispirito Santo nen Apo Shiyos son si-kara, no diket si-kara sota kawad-an ni ispiriton makakontra son Cristo. Intenengan jon wara di sota makakontra son Cristo, jet niman wara ira ma ja naywaris shiya dobong.
4 Nem si-kayon naka ikarin annak ko, wares Apo Shiyos son si-kayo, isonga inebak jo ira jay; eg kayo na-awis. Ta si Apo Shiyos ja wara son si-kayo, makedkedsang nem say si Satanas ja wara so nonta ira karakdan shiya dobong ja eg emati. 5 Saja o-owap i toro sha, nay-eshom ira shima wared ja dobong ja makakontra son Apo Shiyos. Isonga sota toro sha ngo, inges to sota nemnem nonta nay-eshoman sha. Jet sota karakdan shiya dobong, pipiyan shen itenengan sota kaikokowan ngo ira nonta o-owap i toro sha. 6 Nem si-kami i shinotokan nen Apo Shiyos ja mengitosho ni podno, jet sota ira maka-amta ngo son Apo Shiyos, shaka pati-a iya kowan mi. Nem sota ira eg memati son Apo Shiyos, endedamsis sha iyay. Isonga sajay day pengilesinan tayo no sipay kawad-an ni Ispirito Santo nen Apo Shiyos ja podnoy toro to, tan no sipay o-owap i wara son si-kato.
Si Apo Shiyos, inpa-sas toy semek to son si-katejo jet sesmeken tayo ngoy kait tayo
7 Si-kayon ensemek ko, mesepol la waray semek tayo ni olay so ni kait tayo. Ta say edapo-an ni semek, si Apo Shiyos. Isonga sota ensemek toy kait to, si-karay podnon maka-amta son Apo Shiyos jet si-karay annak to. 8 Sota enshiy semek to ni kait to, eg to amta si Apo Shiyos, ta si Apo Shiyos, poro semek i wara son si-kato. 9 Say amta-an tayo so ey ebadeg i semek nen Apo Shiyos son si-katejo, sajay. Inbetkag to ali sota sesakey ya Anak to shiya dobong, say mewad-an kito nonta biyag ja enshiy to engintegan, pangkep nonta inkatey tod koros. 10 Owen, say itsora nonta mapteng nga semek ka kowan ko la son si-kayo, aliwen inges to sota semek tayo son Apo Shiyos, no diket sajay sota ebadeg ga semek nen Apo Shiyos son si-katejo, jet say ka-amta-an to, inbetkag to ali sota Anak to shiya dobong ja etey shi koros, say ma-omas i basol tayo.
11 Si-kayon ensemek ko, nemnem jo sota inpasing nen Apo Shiyos ni semek to son si-katejo; isonga mesepol ngon onoran tayo ja sesmeken tayo i kait tayo. 12 Enshi pay nin i toon engasas son Apo Shiyos, nem no ensemek tayo i sakey tan sakey son si-katejo, si Apo Shiyos, wara ngo son si-katejo. Jet mebedin na singa asen ni eshom i itsora nen Apo Shiyos, ta sota semek tayo, waray nay-ingesan to shi semek to.
13 Say kabol la tayoka penigorado-i ey wara kito son Apo Shiyos, tan wara ngo si Apo Shiyos son si-katejo, sota inpan-iyan ni Ispirito Santo to son si-katejo. 14 Isonga amta tayo ey sota Anak nen Apo Shiyos ja inbetkag to di, si-katoy mengisedakan ni emin na tood ja dobong. Inon-an min mismo jet si-katoy mika ikokowan so ni totoo. 15 Jet no sipay toon ememati ey si Jesus ket Anak nen Apo Shiyos, si-karay kawad-an nen Apo Shiyos, tan wara ngo ira son si-kato. 16 Jet sajay i inamta-an tayo so ey si Apo Shiyos, ebadeg ngoreshan i semek to son si-katejo, jet pinati tayo ma.
Si Apo Shiyos, poro semek i wara son si-kato, isonga sota toon wara ni olay i semek to ni kait to, wara son Apo Shiyos, tan si Apo Shiyos, wara ngo son si-kato. 17 Isonga sota semek ja inamta-an tayo, si-kato sota semek ja enshiy kolang to. Jet angken onsabi ali sota akew ja pengigsheng nen Apo Shiyos no sipay maysedakan, waray shinel tayo, enshiy tayo panshanagan, ta angken niman shiya dobong, waray semek tayo so ni kait tayo ja inges tos Cristo. 18 No waray semek tayo so ni kait tayo, enshiy takot tayo. Ta sota shinel son Apo Shiyos ja wara son si-katejo no ensemek tayoy kait tayo, si-katoy kaondingding ni takot. Sota waray takot to, kolang i semek to, ta say kabol la ewara-an ni takot to, waray basol ton ikaro to.
19 Si Apo Shiyos i epangdon waray semek to son si-katejo, isonga wara ngoy semek tayo. 20 No kaspangarigan ey waray toon mengikowan ey ensemek tos Apo Shiyos, nem en-oges to kariy kait to, sajay ya too, ma-o-owap. Ta kas-ano karin waray semek to son Apo Shiyos ket eg to inon-an? Nem sota kait ton toka as-asa ni olay ket, en-oges to! 21 Nemnem jo sota bilin nen Cristo son si-katejo, ja kowan to ey, “No sipay toon waray semek to son Apo Shiyos, mesepol ngon ensemek toy kait to.”