4
1 Si-kayon a-aki shi pamati, ebadeg i semek ko son si-kayo, isonga piyan kon pasiya ja asen takejo. Si-kayoy kawad-an ni imdeng ko, tan si-kayoy ka-asan ni nanbanagan ni obdak. Jet say bilin ko son si-kayo, itodtodoy jon memati so nen Apo Jesus et eg jo pay dibdibkan ey ebadeg i semek ko son si-kayo.
Ka-onoran na togon
2 Si-kam Ibodia, tan si-kam ma Sintiki, kekshawen ko son si-kayon showa ey mesepol la mantabtabal kayo no ngantoy eg jo nan-inawatan. Ta si-kayo, san-agi kayo shi pamati son Apo Jesus. 3 Jet si-kam ma kait kon emepiyal la emansilbi, kekshawen ko ngo ey si-kam i mengolnos son si-kara, no ngarantoy eg sha nan-inawatan. Ta sajay iren bii, ebadeg i tolong sha son si-kak ni naka pengitosho nonta mapteng nga shamag pangkep so nen Jesucristo. Alilen si-kara bengat i timolong son si-kak, no diket angken pay si Clemente, tan sota ira eshom ma kait kon emansilbi. Jet say ngaran ira niyay, naysolat ngo nodta dibsho nen Apo Shiyos ja naysolatan ira nonta nay-aknan ni biyag ja enshiy to engintegan.
4 Isonga say kowan ko, pan-imdeng kayon pasiya ni olay, ta totoo shakejo nen Apo Jesus, jet ipinshowak mowan ey pan-imdeng kayo! 5 Ipa-sas joy ka-anos jo so ni emin na totoo, ta si Apo Jesus, magenon ondaw mowan ali ja medepod dangit. 6 Angken ngantoy mepesamak, eg kayo manshanag, no diket panshawat kayo et so nen Apo Shiyos ni emin na kasapolan jo, tan si-kato pay i pan-iyamanan jo. 7 Jet no sajay i dag-en jo, si Apo Shiyos i mengi-kan ni talna shi nemnem jo, ja medepo son si-kato met laeng. Sajay ya talna, enshiy toon maka-awat ja pasiya no toway toka pesing nga mengi-anshal, nem angken na enshiy toon maka-awat, sotan ngo eshan i mengitoshong ni poso jo, tan joka pannemnem, ta too kayon ememati so nen Cristo Jesus.
8 Jet niman, iyay i ma-onod ja ibilin ko son si-kayo. Sota maypangkep ni kamaptengan, ono sota kompormin pansigshan ni totoo, si-katoy topogen jon nemnemen. Jet iyay pay iray may-a-shom nodta inkowan ko la ja nemnemen jo: sota podno, kapatkan, tan sota pengonod ni piyan nen Apo Shiyos. Nemnem jo pay sota mapteng ja eg medaokan ni ngaaw, sota sessesmekan shakejo so ni totoo, tan sota eshom ma tayoka aporbalin mapteng. 9 Sota intorok son si-kayo ja inashal jo, tan inelat jo, ono sota inon-an jo son si-kak, kasta met sota intenengan jon inkowan ko, si-katoy onoran jo. No dag-en jo iyay, wara son si-kayo si Apo Shiyos ja mismon emengi-kan ni talna.
Naka mansedamat nonta tolong ja in-akan jo di
10 Naka man-imdeng, tan naka mansedamat so nen Apo Shiyos, ta kimedsang i nemnem jon ontolong son si-kak mowan. Amtak met kitdi ey mapiyan kayon ontolong nontan, nem enshiy pesing jo. 11 Saja inkowan ko la, alilen naka pan-isingil i eg jowak so tinodongan ali, ta say nemnem ko ma niman, mepnekak, angken ngarantoy wara son si-kak. 12 Amtak ma niman ja manbiyag ja inges to no esobday kasapolan ko, ono mankodang. Isonga angken ngantoy mepesamak son si-kak, naydowamak mala ja man-enos no enshiy kenen ko, ono wara; no ebitegak, ono baknangak. 13 Esagana-ak ja mengitoded ni angken nganto, ta si Jesucristo, si-katoy emengi-kan ni kedsang ko.
14 Nem ekak toy-an sota intolong jo son si-kak. Mapteng sotan na dingkayo ta nonta kasapolan koy tolong, tinodongan jowak. 15 Si-kayon i-Pilipos, amtayon mismo met ey nonta indekjas ko i Masidonia ni pilmiron inpangitoshok nonta mapteng nga shamag pangkep so nen Cristo, agpayson si-kayo bengat i engi-kan ali son si-kak ni alos jo ja singa sobadit nonta intorok son si-kayo. Ta enshi nontan i en in-akan ni eshom ma emati shi eshom ma dogad son si-kak. 16 Jet angken nonta wara-ak shi Tisalonika, eminshowa ja engi-kan kayo son si-kak. 17 Nem alilen sota in-akan jo son si-kak i naka pan-imdengi, nem say naka pan-imdengin pasiya, inon-an ko ey amtayon ontolong. Jet si Apo Shiyos, si-katoy onsobadit son si-kayon ma-ekan. 18 Sota tolong jo son si-kak ja inpaw-it jo ali so nen Ipaprodito, inelat ko, jet sotan na in-akan jo son si-kak, imanay shi kasapolan ko, jet simobda pay. Sotan na dingkayo, singa may-eshig ey si Apo Shiyos i in-aknan jo so, jet siya, kinosto-an nen Apo Shiyos tep sotan na dingkayo, in-anam jo nodta piyan ton dag-en ni too to. 19 Si Apo Shiyos, ja naka panshedjawi, si-katoy mengi-kan ngo ni emin na mesepol jo, ta wara kayo son Cristo. Jet eg nagshengan sota kabedinan ton mengi-kan ni kompormi so ni too to. 20 Si Apo Shiyos ja Ametayon tayoka shedjawa, si-katoy mayshedjaw ni olay ingkatod ingka. Siya, satan da.
21 Piyan kon pekikowan joy semek ko so ira nonta emin na emati son Cristo Jesus shitan. Jet angken sota ira a-aki tayod pamati ja kadlak shiyay, kowan sha ngo ey ibalikas koy semek sha son si-kayon emin shitan. 22 Jet emin ira sota ematid ja ilin kawad-an ko, agdalo sota ira ematin wared baley ni ari, sotan met laeng i kowan sha.
23 Jet say shawat ko son Apo Shiyos, sota kaasi nen Apo Jesucristo ja wara son si-kayo, sapay koma ta sotan i mengitoshong ni nemnem jo.