13
1 Say kapatkan, saja semek. No si-kak, angken bilang ey amtak ka emin i kalkalasin esel ni kait kon too, ono angken sota esel ni anghil, no enshiy semek ko ni kait ko, singa naka mannoteng bengat ja inges to sota kalsa ja emankakkak.2 Jet angken bilang ey edaingak ja mengitosho nonta inpa-amta nen Apo Shiyos tan amtak pay ya emin sota eg amta ni eshom maypangkep son Apo Shiyos, tan angken amtak pay ya emin sota ashal ni emin na too, tan ebadeg ga pasiya i pamatik, ja sotan i kabol la posi-an ko son pa-tan so ni shontog, no enshiy semek ko so ni kait ko, enshi met laeng i silbik ka too.3 Angken i-akan kon emin i wara son si-kak so ni nankebiteg, tan angken pay i-onod kon mepoolan i bakdang ko, enshiy banag nontan na dingkak, no enshiy semek ko ni kait ko.
4 Say toon waray semek to, amta ton man-enos, tan mengaasi; enshiy apal to, tan enshiy dastog to. 5 Say toon waray semek to, aliwen etangsit; eg onpa-so, aliwen to ipilit i kosto to, aliwen na nam-ay ya onbonget, ono aliwen ma-opdit. 6 Sota toon waray semek to, aliwen na en man-imdeng no ngaaw i dingka ni kait to, no diket say pan-imdengan to, sota mapteng nga dingka ni eshom. 7 Sota toon waray semek to, na-anos: wara ni olay i namnama ton mapteng, isonga ememiyal ni kait ton too. Jet amta ton mengitoded ni emin na digat.
8 Say semek, wara ni olay ingkatod ingka. Nem sota pengitosho ni esel nen Apo Shiyos, wara diy timpon salshengan to; angken sota panshedjaw son Apo Shiyos ni esel ja eg ma-ewatan, onsalsheng ngo di. Wara pay aliy timpon eg ma ma-osal sota inashal tayo, 9 ta sota inashal tayo, tan sota tayoka pengitosho, waray kolang to tep eg pay laeng inpa-amta nen Apo Shiyos sa emin. 10 Mesa-datan ma ira jay ni enshiy kolang to. 11 Say kay-eshigan niyay, singa sota itsora ni nga-nga. Si-kak, nonta kanga-ngak, tabtabal ni nga-ngay naka pekitbal, nemnem ni nga-ngay naka pannemnem, tan awat ni nga-ngay naka pengawat. Idi bima-degak ma, inbi-jag ko ma sota ogadi ni nga-ngen wara son si-kak. 12 Ta niman singa aliwen na edawag i emin na banag pangkep son Apo Shiyos, singa sota ispikon aliwen edawag i ka-esas ni dopa. Nem waray onsabi alin timpo ja asen tayon mismo jet ewatan tayo ma. Niman na timpo, ootik i amtak, nem no onsabi sotan alin timpo, ewatan ko men emin; eg megshengan i naka pengewat ni emin na banag, ja inges toy kepengewat nen Apo Shiyos son si-kak.
13 Jet waray tedo ja mebay-an ni olay ingkatod ingka: sota pamati, sota namnama son Apo Shiyos, tan sota semek. Nem say kapatkan so ni emin, sota semek.