10
1 A-akik shi pamati, eg tayo koma dibdibkan sota epasemak so nonta ira apo tayo da nonta timpon Moises. Kolpot i emengitoshong son si-karen emin shi dawan sha, tan emin ira, nanshalan ira nodta kawa ni baybay ja inti-an nen Apo Shiyos.2 Jet nontan ma, singa may-eshig ey ebonjagan ira ja too ma nen Moises ira.3 Emin ira, engan ira nonta tinapay ya in-akan nen Apo Shiyos ja kowan sha ey mana.4 Tan enginom ira nonta shanom ja in-akan nen Apo Shiyos ja edapo nodta bato. Si Cristo i wara met laeng nontan ja emay-odo-odop son si-kara ja emengi-kan ni kasapolan sha.5 Inon-an shen emin iyay ya kaskasshaaw wa dingka nen Apo Shiyos, nem karakdan son si-karay eg kinosto-an nen Apo Shiyos. Isonga shineshal to ira sotan nonta wara ira nodta dogad ja nan-ak-akshan shen embanaw wa dogad ja enshiy toon eman-iyan.
6 Jet niman, sotan na epaspasemak da son si-kara, banshaan son si-katejo, say aliwen sota ngaaw i tayo nemnemnemen na dag-en, ja inges toy inpasing sha. 7 Isonga aliwen kayo manshedjaw so nonta ira sinan shiyos ja inges toy inpasing da nonta eshom son si-kara. Inkowan nonta esel nen Apo Shiyos ja naysolat nonta bayag da i itsora ni inpanshayaw sha, ja kowan to ey, “Sota ira totoo, timanongaw iren mengan tan emenginom jet enayaw ira.” 8 Mesepol la aliwen kito memii ono mandeki, ja inges to sota dingka nonta eshom son si-kara. Sajay i basol sha, isonga say etey son si-kara nontan ni san-akew, showen polo tan tedon dibo. 9 Isonga aliwen na tayo damsisen si Apo Shiyos, ja onong toy dingka nonta eshom son si-kara, ja kowan sha ey asen sha no ito-to-wa nen Apo Shiyos i penosa to son si-kara. Sajay i basol sha, isonga si Apo Shiyos, inpalobos to ja angken shita-an ni oleg ira ja metey. 10 Aliwen tayo ikotot sota insaad nen Apo Shiyos ja pangolo tayo shi pamati, ja inges toy dingka nonta eshom son si-kara. Sajay i basol sha, isonga inpalobos nen Apo Shiyos ey bono-en nonta anghil to ira.
11 Sajay ya edaga son si-kara, si-katoy banshaan so ni emin na maysa-dat son si-kara, jet inpaisolat nen Apo Shiyos iyay ya edaga nonta bayag da say eg tayo onoran sotan na dingkara. Pan-ashalan tayo komen emin sota epalabas den epasemak. 12 Sota toon marinel ja kowan to ey matekal niman ta emati, mesepol la mantanshaan ta baka et ey no kabasan ket ma-ebak no ma-ewis sa mandeka ni ngaaw. 13 Ingkato niman, sota kaonsabi son si-kayon awis ja manbesol, aliwa et ngon epalado, no diket kenshat ta sotan i kaonsabi so ni emin na totoo. Nem angken ngantoy onsabi ali, si Apo Shiyos i panshindan jo, ta eg tokejo i-oway no eg jo posi-en. Si-kato met laeng i mengi-kan ni kedsang jo ja mengenos say eg kayo ma-ebak.
14 Isonga niman si-kayon ensemek ko, karekayo manshedjaw ma shi sinan shiyos; arawi-i jo iyay ya aramid. 15 Amtak ey manemnem kayo, isonga olay tokejo ja onbigbig so niya ikowan ko, no kosto ono aliwen kosto. 16 No mesa-nop kitejon emati, tayoka ipa-sas ey naykait kito so nen Cristo ni tayoka pandilikob. Emebindisiyoni sota tasen tayoka penginomi, jet sota meki-inom nontan, tan mekikan nonta tinapay ja mepetpet-ing, singa naykasakey ira son Cristo, ta nayda-kam ira shi shaleto, tan shi bakdang to. 17 Eshakel kito, nem sesakey bengat sota tinapay ja tayoka panbibingayi, jet sotan na tinapay, si-katoy nansaksakeyan tayon emati. 18 Nemnem jo kari sota kepesing ni Hodiyos: sota naydaton so nen Apo Shiyos shima kowan sha ey altar, si-katoy naykasakeyan sha son Apo Shiyos. 19,20 Jet joka ewati i piyan kon ikowan? Say kowan ko, sota kaidaton ni pagano shi sinan shiyos sha, aliwen si Apo Shiyos i naydatonan to, no diket sota ira dimonyo. Isonga ekak kosto ja mekikan kayo ni naydaton so ni dimonyo, ta no kenen jo, naykasakey kayo ma so ni dimonyo. Nem aliwen kowan ko ey waray panakabalin niya naydaton, ono sota naydatonan ton sinan shiyos. Say piyan ko ikowan, eg kayo koma mekikan, 21 ta eg mebedin na showay kayda-kaman jon peki-inoman ono pekipenganan. Mesepol la manpidi kayo nodta showa: shi panshedjawan so nen Apo Shiyos, ono panshedjawan so ira ni dimonyo. 22 Apay piyan jon sengkiten si Apo Shiyos, say onbonget? No bilang ey ondaw alin shosa-en shakejo, apay posi-en jon disi-an?
23 Agpayso sota kowan jo ey si-katejon emati, palobos ja dag-en tayon emin. Nem aliwen emin na dag-en tayo ket, waray i-akan ton panmaptengan ono kedsangan ni kait tayo. 24 Aliwen na sota panmaptengan jo bengat i jo nemnemnemen, no diket nemnem jo ngo sota panmaptengan ni kait jo. 25 Sajay i inkowan ko la pangkep ni pengan nonta apag ja naydaton shi sinan shiyos. Nem no shima dako-an, angken ngaranton apag ja dako, mebedin jon tongkalen ja kenen, jet eg mesepol la jo pay laeng ibaga no ngarantoy ka-apag to. Eg mesepol la mepnek kayo ja mengamta. 26 Emin na mekan, edapo met laeng son Apo Shiyos. Amta tayo ta waray naysolat nonta bayag da ja kowan to ey, “Saja dobong, kokowa nen Apo Shiyos, pati sota emin na wara nodtan.”
27 Iyay pay i ikowan ko pangkep nonta inemnem jo so ni panmaptengan ni kait jo. No waray toon eg emati ja mengewis son si-kam ja kowan to ey ka mekipengan son si-kato, jet piyan mon ondaw, mebedin na ondaw ka. Jet no ngantoy isango to son si-kam, kan mo. Angken eg mo pay laeng nin ibaga, no ngantoy ka-apag nonta insango to; eg mesepol la mepnek ka ja mengamta. 28,29 Nem no bilang ey waray kait mon emati ja naydikob nodtan ja mengikowan son si-kam ey sotan na apag ket, naydaton shi sinan shiyos, kareka mengan, say eg mesekitan i nemnem nonta engikowan son si-kam.
Nem sota eshom son si-kayo, kowan sha kono ey, “Apay, sota egket ngo mowan etod-an ni kosto i mengitosho son si-kak ni mebedin kon dag-en? Palobos sa emin met son si-kak. 30 No nan-iyamanak et son Apo Shiyos ni maypangkep so nontan na mekan, apay pay laeng nga en bedawen ni eshom ja ikowan sha ey waray nankolangan ko?”
31 Nem say kowan ko, no mengan kayo, ono menginom kayo, ono ngarantoy kowan jo ey dag-en jo, nemnem jo nin no kayshedjawan nen Apo Shiyos. 32 Asas jon eg kayo mengi-kan ni kedismaya-an ira nonta makapiyan na memati koma son Cristo—Hodiyos ono sota aliwen Hodiyos—tan karekayo pay mengi-kan ni kedismaya-an ira nonta kait jon emati. 33 Si-kak, say naka pesing, naka i-anam i emin na naka dagdag-a, say mengi-kanak ni pan-imdengan ni eshom ma too. Aliwen sota panmaptengan ko bengat i naka nemnemnema, no diket sota panmaptengan ni karakdan, say memati koma ira ja maysedakan.