7
Kanemnema ni toon emati son Cristo i pansigshan ni eshom, id liwen bina-ngatan i toka pesing
1 Niman, songbatan ko sota salodsod jo, ja insolat jo di son si-kak. Say kowan ko, mapteng no eg kayo mengesawa koma, ta pansigshan jo iyay. 2 Nem ma-da tep eshakel i maleki tan mabii shita kad-an jo, mapmapteng met laeng no waray asewayo say eg kayo ma-ewis ja mandeka ni ngaaw. 3 Jet sota daki, mesepol la i-akan toy kasapolan nonta asewa ton bii, jet kasta met sota bii, mesepol ngon i-akan toy kasapolan nonta asewa to. Sajay i koston itsora ni san-asewa. 4 Ta sota biin waray asewa to, aliwen si-katoy mengitoshay shorog ni bakdang to, no diket sota asewa ton daki. Kasta met sota dakin waray asewa to, aliwen si-katoy mengitoshay nonta bakdang to shorog, no diket sota asewa ton bii. 5 Isonga karejo diwayan iyay ya mesepol la dag-en ni san-asewa, malaksig no waray nantolagan jon showa ey eg kayo nin mankadwa say eg medingding sota panshewat jo son Apo Shiyos, ja si-katoy topogen jo. Nem mesepol la mankadwa kayo mowan na shagos no mepospos sotan da, ta amtayo met i itsora ni si-katejon too. Amangan et no ewisen shakejo nen Satanas ja mandeka ni ngaaw wa aramid.
6 Sajay ya inkowan ko la son si-kayo, aliwen na naka pan-ipilit. No piyan jon mengesawa, ekak iparit. 7 Nem say piyan ko, no mebedin koma, emin na too ket si-kak i onoran sha ja eg engasewa. Nem aliwen na nan-i-inges i dekna ja in-akan nen Apo Shiyos so ni sakey tan sakey ya too. Sota mebedin na itoled ni sakey, eg mebedin ngon dag-en nonta sakey.
8 No si-kak, iyay i ikowan ko so nonta ira eg pay laeng engasewa, inges to ngo sota ira biin ebalo: mapmapteng no on-onong ira koma ja eg mengesawa ja inges ko. 9 Nem no eg ira makatengel ni bakdang sha shorog, ja ireka ma-ewis sa mekileki ono memii, mapmapteng ngo eshan no mengesawa ira, say eg ira manbesol.
10 Niman sota ira waray asewa to, iyay i bilin nen Apo Jesucristo ja ikowan ko son si-kara. Sota bii, aliwen to isi-jan koma i asewa to, 11 jet kasta met sota daki, aliwen na to isi-jan koma i asewa to. Nem no isi-jan ni biiy asewa to, mesepol la on-onong ja eg meki-esawa mowan, ono may-odi et ngo so nodta asewa ton sigod.
12,13 Saja eshom ja ikowan kod jay, aliwen bilin nen Apo Jesucristo, no diket si-kak i makakowan. Si-kayon a-aki shi pamati ja waray asewa ton eg emati, no piyan ton on-onong nga asewam ngo eshan, aliwen mo isi-jan. 14 Ta si-kam ja emati, say nayda-kaman nonta asewam ni kaasi nen Apo Shiyos, si-kam ja emati, jet angken sota annak jo, mayda-kam ngo ira. Nem no isi-jan mo sotan na asewam, singa naysi-jan ngo sota annak jo shi kaasi nen Apo Shiyos. 15 Nem no sotan na asewam ja eg emati ket, piyan ton isi-jan toka, angkena. Ebolos ka ma, enshiy emengipked son si-kam. Jet mebedin iyay, ta say piyan nen Apo Shiyos, si-katejon pinidi ton too to, waray talna tayo. 16 Enshiy kanas mon memasig ja eg mengisi-jan, tep eg mo sigorado-en ey ewisen mo ja memati sota asewam say isalakan nen Apo Shiyos.
17 Say esa-nopan ni emin den inkowan ko, sajay: no ngantoy kasesaad mo nonta inpamatim, itodoy mo ngo eshan, tep sotan i piyan nen Apo Shiyos ja pesing mo ni olay. Sajay i bilin ko so ni emin na emati, angken towen dogad. 18 No kaspangarigan ey si-kayon imonod nonta kogit ja ogadi ni Hodiyos asan kayoka mamati, bay-iyo, eg jo koma bedawen sotan na edaga son si-kayo. Kasta met sota eg imonod ni ogadi ni Hodiyos nonta pilmiro asan mamati, eg mesepol la dag-en to pay laeng sotan na ogadi ni Hodiyos. 19 Ta aliwen sota pengonod ni ogadi ni Hodiyos, ono eg pengonod, i kaibilang nen Apo Shiyos, no diket say epateg, sota pemati ni bilin to. 20 No ngarantoy kasesaad mo nonta pilmiro asan kaka mamati so nen Cristo, aliwen mo bediwan. 21 Isonga no bilang ey baga-en ka nontan asan kaka mamati so nen Cristo, angkena. Nem no pedobosan shaka ja aliwen baga-en ma, awat mo et. 22 Anam ton aliwen baga-en ka ma, ta niman na emati ka son Apo Jesus, ewaya ka ma ja eg toka shosa-en nen Apo Shiyos. Kasta met son si-kam ma aliwen baga-en nontan, niman na emati ka son Apo Jesus, maybidang ey baga-en toka nen Apo Jesus. 23 May-eshig ey binayshan toka da ja kokowa to ma, isonga aliwen jo pati-en i ikowan ni eshom. 24 Si-kayon a-akik shi pemati, no ngarantoy kasesaad jo nonta pinidi shakejo nen Apo Shiyos ja memati, aliwen jo bediwan: basta si Apo Shiyos i pansilbi-an jo.
25 Niman sajay ya ikowan ko mowan pangkep ni enshiy asewa to, aliwen na bilin iyay ya edapo son Apo Jesucristo, no diket edapo iyay shi nemnem ko. Nem mebedin na panshindan jo iya ikowan ko, ta amtayo met ey ebadeg i kaasi nen Apo Jesus son si-kak. 26,27 Say kowan ko, no niman na timpon digat, mapmapteng no sota waray asewa to, eg to koma nemnemen ja isi-jan sota asewa to; kasta met sota enshiy asewa to, eg to koma nemnemen sota peki-esawa to. 28 Nem no sipay mengesawa, aliwen basol sotan. Saja inkowan ko la, piyan kon say nam-ay komay biyag jo, ta sota waray asewa to niman na timpo, eshakel ni olay i digat to.
29 Iyay i piyan kon amta-an jo koma, si-kayon a-akik shi pamati: emankepospos may timpo. Isonga manshoki niman, sota ira waray asewa to, ishingan sha koma ja mansilbi son Apo Jesucristo, ja singa sota enshiy asewara. 30 Eg tayo koma ida-kad i daringit ono imdeng, jet no menongkal kito, aliwen sotan et ngo mowan i tayo kesiwatan. 31 Sota ira waray kokowa sha shiya dobong, aliwen sotan i sha nemnemnemen. Ta saja dobong, eman-a-sop may pantepos to.
32 Piyan kon enshi koma i jo kesiwatan. Sota daki ja enshiy asewa to, sota pan-imdengan nen Apo Jesus bengat i toka nemnemnema, 33 nem sota dakin waray asewa to, eshakel i toka nemnemnema ja pesing to say man-imdeng si asewa to. 34 Nakol ni say wared nemnem to, nanshowa. Kasta met sota bii ja enshiy asewa to, etopog i wared nemnem to: sota enshiy to kebedawan so nen Apo Jesus, shi bakdang to tan shi nemnem to. Nem sota biin waray asewa to, emesiwat ni nemnem to nonta pan-imdengan nen asewa to. 35 Sajay i inkowan ko tep piyan kon todongan takejo. Enshiy naka pan-iparit, no diket naka pan-ikowan i panmaptengan jo, say metopog ja si Apo Jesucristo koma i pansilbi-an jo.
36 No kaspangarigan ey waray toon marikit i anak to, nem kowan to ey emankeba-kol sota anak to, itolok ton esaw-en sha, no sotan i mesepol. Aliwen basol iyay. 37 Nem no nemnemen nonta too ey angken eg mengesawa sota anak to, sotan i mapmapteng. Mesepol la nemnem to ngo, ja enshiy emilit son si-kato. 38 Isonga enshiy problima no i-asewa to ono enshi; nem mapmapteng koma no eg to i-asewa.
39 Sota biin waray asewa to, eg to koma isi-jan sota sigod ja asewa to. Nem no metey sota daki, ewaya ma, mebedin na meki-esawa mowan shi eshom, no kait ton emati son Apo Jesus. 40 Nem no si-kak, say kowan ko, no sotan na biin ebalo ket, on-onong ja eg mowan meki-esawa, pansigshan to. Jet amtak ey sajay ya inkowan ko, intorong towak ni Ispirito Santo nen Apo Shiyos.