4
1 Say nemnemen jo pangkep son si-kamin emengitosho, kamika mansilbi bengat so nen Cristo, jet si-kamiy piniyal nen Apo Shiyos ja mengitosho ni piyan ton amta-en ni totoo.2 Amtayo met ey sota toon piniyal ni apo to, sota kowan ni apo toy dag-en to; aliwen sota kowan ni eshom.3 Isonga si-kak, aliwen epateg sota ikowan jo, ono sota ikowan ni eshom, pangkep nonta obden inpiyal nen Apo Shiyos son si-kak, no mapteng i dingkak, ono ngaaw. Angken na si-kak ka mismo, ekak pay mebedin na ikowan ey tinongpal ko ono enshi.4 Ta si Apo Jesucristo, si-katoy mengesas ali nonta obdak. Enshiy amtak ja nak nankolangan shi obdak; nem sotan na wared nemnem ko, aliwen sotan i kaybidangan ko so nen Apo Shiyos ey naka mepiyal.5 Isonga eg tayo iba-ngat ja ikowan i kamapteng ono kangaaw ni sakey tan sakey son si-katejo niman na timpo, ta no onmotok alis Apo Jesucristo, emin sota nay-emot, tan angken pay sota pangkep ni toon toka nemnemnema, ma-amta-an. Sotan aliy amta-an tayo so no siyen pan-imdengan nen Apo Shiyos sota dingka tayo, ono enshi.
6 A-akik shi pamati, emin ira jay ya inkowan ko la, inosal koy bakdang mi nen Apolos, say metod-an kayon eg mengilastog ni sakey ya emengitosho ni esel nen Apo Shiyos, ono memedaw ira nonta eshom ma emengitosho. Mesepol la i-anam joy joka pesing nodta esel nen Apo Shiyos ja naysolat nonta bayag da. 7 Nem edastog kayo et ngo mowan, jet ngantoy kabol? Ngarantoy nandasinan jod eshom? Emin na wara son si-kayo, edapo son Apo Shiyos, jet eg jo koma idastog—ta apay si-kam ma mismo i edapo-an to?
8 Apaw kayon i-Korinto! Siya, waren emin ma i kasapolan jo, jet singa baknang kayo ma! Singa inbiyang jokamin engitosho son si-kayo nontan da jet si-kayo et ngo mowan i emekitoshay ma so nen Cristo. Angka et nem simabi ma koma sota pantoshayan nen Cristo say mekitoshay kami ngo! 9 Ta no onsabi iyay, mapteng mala. Niman, say kowan ni totood ja dobong maypangkep son si-kamin apostol, kowan sha ey si-kamiy sobda ni tood ja dobong, ja agpos maykait kami so nonta pirison mebitay. Say kowan ko no sina-shom, si Apo Shiyos emo, inpalobos to ja mebebaingan kami shi sango-an ni karakdan na tood ja dobong, tan shi penginingning ni anghil. 10 Ta si-kami, say kowan ni too, enshi konoy amta mi, tep say toro mi, sota maypangkep son Cristo. Nem si-kayo, kowan sha ey dimaing kayo ma ni inpamatiyo son Cristo. Siya, ekapoy kami mango jet makedsang kayo! Eshayaw kayo, nem si-kami, endedamsis sha. 11 Jet ingkato niman na oras, kamika mankodang ni kenen mi tan inomen mi, enshi pay i koston baro mi, tan enshiy baley min pan-iyanan mi; shakamika pay panshangkasi. 12 Isonga kamika man-obden pasiya say waray osalen mi ni kasapolan mi, ta enshiy emengi-kan. Jet no waray ngaaw wa ikowan sha son si-kami, eg mi ibales, no diket say kowan mi, si Apo Shiyos komay onbindisiyon son si-kara. Jet no waray memedigat son si-kami, mika itoled. 13 No bebaingan shakami, eg mi sopngilen. Singa sobda kami ma ni tood ja dobong, singa dogit kami ja ensekig sha.
14 Say insolatan ko so niyay son si-kayo, aliwen piyan kon say mebebaingan kayo, no diket say kowan ko ey metod-an kayo. Ta singa annak takejod pamati. 15 Angken bilang ey eshakel i emengitosho son si-kayo maypangkep ni pamati son Cristo, saksakey bengat i may-eshig ey amejo. Jet si-kak sotan, ta si-kak i intenengan jo so ni mapteng nga shamag pangkep so nen Cristo Jesus. 16 Isonga shewaten ko son si-kayo ey sota ogadik koma i onoran jo. 17 Say amta-an jo so ni koston ogadi ni toon emati son Cristo, sota inon-an jon naka dagdag-a. Isonga ibetkag ko la si Timoteo son si-kayo, jet si-katoy penemnem son si-kayo nontan na dingdingkak. Si-katoy naka piyala ja anak kod pamati ja ensemek ko, jet saja ikowan to la, si-kato met laeng i naka itoro so ni emin na esa-nop pa emati shima dogad ja dinawdawan ko.
18 Sota ira eshom son si-kayo, ireka mandastog, ta kowan sha emo ey ekak da ondaw wa manpasiyal son si-kayo. 19 Nem no ipalobos nen Apo Jesus, ondawak den shagos son si-kayo, jet asen ko ga sota shaka idastog ja kowan sha ey katekal sha, no esel sha bengat, ono agpayso. 20 Ta say pamati maypangkep ni pantoshayan nen Apo Shiyos, aliwen na notnotnot bengat, no diket agpayson dag-en. 21 Isonga olay tokejo ngo: no eg jo bediwan i ogadiyo, kenshat ta manda-kam kayo ni bilin na pasiya no ondawak da. Nem no bediwan jo, mapteng day idaw ko son si-kayo, ta kaasi-an takejo.