2
Nonta wara-ak shitan, say intorok son si-kayo ket sota intorong ni Ispirito Santo
1 Si-kayon a-akik shi pamati, nonta indaw ko son si-kayo ja engitosho nonta esel nen Apo Shiyos, aliwen sota katekal kon man-a-sel, ono sota kalaing ko i inosal kon engawis son si-kayo. 2 Ta nonta wara-ak son si-kayo, ninemnem ko ey say topogen kon itoro son si-kayo, sota maypangkep bengat so nen Jesucristo, jet wa-wa-sha ja intorok sota inkaydansa to shi koros. 3 Nontan na indaw ko son si-kayo, singa ekapoyak ka pasiya, isonga naka mankaikelkel-ewi ta baka et ey ekak iposi sota piyan nen Apo Shiyos ja dag-en ko. Naka pay emanbebayedbed nem sina-shom. 4 Jet sota inkowan ko nonta naka mengitosho son si-kayo, aliwen inges to sota kepesing ni toon kowan sha ey matekal, ja en-amis sa esel i shaka osala. Nem say na-awisan jo, inewatan jo ey sota intorok, mismon intorong ni Ispirito Santo nen Apo Shiyos. 5 Isonga say pamatiyo, aliwen na shi kalaing ni tooy naynadnaran to, no diket shi panakabalin nen Apo Shiyos.
6 Nem wara et mangoy na-oneg ja naka itoro so nonta ira makedsang i pamati to. Jet sajay ya toro, aliwen edapo so ni tood ja dobong, ono edapod daing ira nonta toray niya dobong, tep wara diy timpon kengawngawan niyay ya amtara. 7 Saja mika pan-ikowan son si-kayo, sajay sota nemnem nen Apo Shiyos ja eg nin amta ni too nontan da tep eg to nin inpa-amta son si-kara. Sajay ya nemnem to, enshiy eshom nem eg si-katejoy nayda-kam son si-kato ingkatod ingka. Plano ngo eshan nen Apo Shiyos iyay nonta eg pay laeng epalsowa iya dobong, 8 nem sajay, angken sakey so nonta ira toray shiya dobong, eg sha inewatan iyay. Ta no istay inewatan sha koma, eg sha indansa si Apo Jesucristo shi koros, tep si-katoy Kangeto-an. 9 Say mika itoro, sota nantongpalan nonta naysolat nonta bayag da, ja kowan to ey, “Sota eg inon-an tan eg intenengan ni too, tan sota eg sha pay ninemnem ja panmaptengan sha, si-katoy insagana nen Apo Shiyos so nonta toon waray semek to son si-kato.” Sajay i kowan to.
10 Jet sota istay eg tayo amta pangkep son Apo Shiyos, inpa-amta met laeng ni Ispirito Santo nen Apo Shiyos. Ta sota Ispirito Santo, angken sota eda-med ja nemnem nen Apo Shiyos, toka ewatin emin. 11 Arig toy too. Enshiy maka-amta no ngarantoy wared nemnem ni kait ton too, ta say maka-amta bengat, sota makabakdang nga shorog. Isonga angken si Apo Shiyos, say maka-amta bengat ni nemnem to, sota Ispirito Santo to met laeng. 12 Jet si-katejon emati, say inewat tayo, sota intoro ni Ispirito Santo ja edapo son Apo Shiyos, aliwen sota intoro bengat ni too. Inpa-amta ni Ispirito Santo iyay say ewatan tayo sota in-akan nen Apo Shiyos ja kaasi ja panmaptengan tayo.
13 Isonga sajay ya mika pan-itoro, intoro met laeng ni Ispirito Santo nen Apo Shiyos son si-kami, aliwen edapo shi kait ta too. Jet si-kato ngoy mika pan-i-olog so nonta toon kawad-an ni Ispirito Santo nen Apo Shiyos. 14 Nem sota toon eg emati, enshi son si-kara sota Ispirito Santo, isonga eg sha ewatan sota kaitoro ni Ispirito Santo nen Apo Shiyos, ta kowan sha ey enshiy silbi to kono son si-kara. Eg mebedin na ewatan sha tep no enshiy Ispirito Santo so ni too, eg ma-ewatan tep sota Ispirito Santoy mengi-odog so. 15 Sota toon kawad-an ni Ispirito Santo nen Apo Shiyos, mebedin na ewatan ton emin i kowan nen Apo Shiyos. Nem sota toon enshiy Ispirito Santo nen Apo Shiyos son si-kato, pan-inemnem mango ey na-apil sota toon kawad-an ni Ispirito Santo. 16 Sajay met laeng i kowan ni padto nonta bayag, ja kowan to ey, “Sipay toon maka-amta ni nemnem nen Apo? Enshi, isonga enshi ngoy toon mengitosho son Apo ni dag-en to.” Kowan to. Jet si-katejo, waray amta tayon nemnem nen Cristo, isonga eg shakito ewatan nonta toon enshiy Ispirito Santo son si-kato.