23
1 Jet si Pablo, diritson insi-ning to ira sota toray jet kowan to son si-kara ey, “Si-kayon a-akik, amta nen Apo Shiyos ey mapteng i wared nemnem ko ingkato niman; enshiy amtak ka basol kon kebistigalan kod jay.”
2 Jet sota kangeto-an na pari ja si Ananias, inkowan to nonta nay-askang so nen Pablo ey sedpaken shay bongot nen Pablo.
3 Jet si Pablo, kowan to son si-kato ey, “Si Apo Shiyos i onsedpak son si-kam, si-kam ma sinan kekowis! Timongaw ka ja si-kam i mengigsheng ni kasok shi dinteg, nem naykontra met shi dinteg ita inpasedpakan mowak so!”
4 Jet sota ira dimayat ja nay-askang so nen Pablo, kowan sha ey, “Apay nga endedamsis moy insaad nen Apo Shiyos ja kangeto-an na pari?”
5 Si Pablo, simongbat ja kowan to ey, “Si-kayon a-akik, ekak amta ey si-kato ket kangeto-an na pari. No amtak koma, ekak koma sinopngil, ta say naysolat nonta bayag da, kowan to ey, ‘Aliwen mo pan-a-sedan ni ngaaw wa esel i toon emengitoshay son si-kayo.’ ”
6 Nem si Pablo, idi inamta-an to ey sajay iren too ket Sadosiyo i eshom, tan wara pay iray Parisiyo, inkedsang toy esel to, ja kowan to ey, “Si-kayon a-akik, si-kak, Parisiyo-ak, tan mismon anak towak ni Parisiyo! Jet niman, iyayak shiyay ya emankebistigal pangkep nonta pamatik ey say nanketey, manbiyag mowan!”
7 Idi enaksheng nga inkowan to iyay, sota ira Parisiyo tan Sadosiyo, inshogi sha men nansosongbat. Jet sajay iren esa-nop, nanshowa ira, 8 ta say pamati ira nonta Sadosiyo, kowan sha ey eg manbiyag mowan i etey, tan eg sha pati-en ey waray anghil, ono sota eshom ma eg ma-sas; nem sota ira Parisiyo, shaka pati-a ey say etey, manbiyag mowan, tan shaka pay pati-a ey waray anghil tan sota eshom ma eg ma-sas. 9 Jet nontan ma, eshakel i kaonkaneljaw, jet sota ira Parisiyo ja ekayang i ashal sha, dimayat ira ja shaka pan-ibaliwi si Pablo, ja kowan sha ey, “Enshi met i mi dinoktalan na basol niyay ya too; baka et ey sota eg ma-sas ono anghil i engitoshong son si-kato. Isonga eg tayo koma bedawen.”
10 Ema-men makedsang i shaka pansosongbat. Jet sota apo ni solsharo, entakot ey debniken shes Pablo, isonga engibetkag ni solsharo to ja en ali engigojod so nen Pablo so nodta totoo, jet in-oli sha si Pablo shima kowartil sha.
11 Jet nontan na dabi, nanpa-sas si Apo Jesus so nen Pablo, ja kowan to ey, “Pakedsang moy nemnem mo, kareka medismaya. Inkowan moy maypangkep son si-kak shiya Jerusalem, isonga mesepol ngon ikowan moy maypangkep son si-kak shi Roma.”
Nantotodag sota makakontra son Pablo ey bono-en sha
12 Idi nonta ewa-wa ma, sota ira Hodiyos ja enshiy pamatira son Jesus, nantotodag ira, jet insangbara ey eg ira nin mengmengan tan eg ira mengin-inom ingkatod meksheng nga bono-en sha si Pablo. 13 Jet sajay iren too ja nantotodag, esolok iren epat ta polo. 14 Dimaw ira jay ya totoo so nonta ira apo ni papashi ni Hodiyos, tan so nonta ira eshom ma pangolo ni Hodiyos, jet kowan sha ey, “Insangba mi ey eg kami nin mengmengan ingkatod meksheng nga bono-en mi si Pablo. 15 Isonga niman say pesing jo, tan sota ira kait jon toray, ikowan jo nima apo ni solsharo ey idaw sha ali si Pablo son si-kayo, ja singa agpayson piyan jon amta-en na pasiya sota maypangkep ni kaso to. Jet si-kami, mansesked kami ali shi shalan na memono son si-kato.” Sajay i kowan sha.
16 Nem sota ka-anakan nen Pablo, ja anak ni agi ton bii, inamta-an to iyay ya planora ja kowan sha ey tambangen sha si Pablo, isonga dimaw shima kowartil ni solsharo ja to inkowan iyay so nen Pablo.
17 Jet si Pablo, tinewal to i sakey so nonta ira kapitan ni solsharo, jet inkowan to ey, “Ipangdoyo ka iya balodaki so ni apo jon solsharo, ta waray ikowan to kono son si-kato.”
18 Jet sota kapitan, inpangdo to sota balodaki so nonta apo sha, jet kowan to ey, “Tina-wal towak nonta balod ja si Pablo i ngaran to, jet kowan to ey ipangdok iya balodaki son si-kam ta wara konoy ikowan to son si-kam.”
19 Jet sota apo ni solsharo, inegni-an toy takday nonta balodaki, jet inbag-an to ni abos sha, ja kowan to ey, “Ngarantoy ikowan mo son si-kak?”
20 Simongbat sota balodaki, ja kowan to ey, “Sota ira Hodiyos, nantotodagan sha ey nem kabasan ket sha ikowan son si-kam ey paidaw mo si Pablo so nonta ira pangolo min Hodiyos, ja singa agpayso konon wara pay i piyan shen amta-en pangkep nonta kaso to. 21 Nem karam kari patpati-en ira, ta waray esolok ka epat ta polon too sha ja emansessesked son si-kato shi shalan ja piyan shen bono-en, jet sajay ira, insangbara ey eg ira nin mengmengan ono eg ira man-in-inom, ingkatod meksheng nga bono-en sha si Pablo. Nansagana ira, ja shaka segsegsha bengat sota ikowan mo so ni solsharom ey idaw sha si Pablo.”
22 Jet sota apo ni solsharo, kowan to so nonta balodaki ey, “Karam ikokowan ni angken sipa ey sajay i inkowan mo son si-kak.” Jet inkowan to pay so nonta balodaki ey angken on-akad.
Inpalaw sha si Pablo shi Sisaria ja kawad-an nen Gobinarol Felix
23,24 Nontan ma, sota apo ni solsharo, tinewal to sota showen kapitan to, jet kowan to son si-kara ey, “Pansagana kayo ni showen dasos sa solsharo, tan piton polon solsharon mankebayo, tan showen dasos sa solsharo ja mengita-jon ni kayang, tep itolod jos Pablo shi Sisaria so nen Gobinarol Felix ni oras ni alas nowibi ni kalebi-an. Tan pangisagana kayo pay ni kabajo ja pankebayo-an nen Pablo. Ta kapiditan na imotok jod man ja enshiy mengan-ano son si-kato.” Kowan nonta apo ni solsharo, 25 asan nandaga pay ni solat ja ondaw so nen Gobinarol Felix, jet kowan nonta solat to ey:
26 “Si-kak si Claudio Lisias ja makasolat niyay, jet sajay ya solat, ondaw so nen si-kam, Gobinarol Felix, ja emayshedshedjaw wa gobinarol. Sapay koma ta mapteng i kasesaad mo niman. 27 Sajay ya toon inpaitolod ko la son si-kam, singkel ira ni Hodiyos shiyay, jet istay ya bono-en sha. Nem inodop ko iray solsharok et mi insalakan si-kato tep inamta-an ko ey si-kato, i-Roma gayam. 28 Piyan kon amta-en no ngantoy kabol la shaka panpebesoli so, isonga say inpasing ko, insangok so nonta ira toray sha. 29 Jet say sinepolan ko ja shaka panpebesoli so, sota maypangkep bengat ni dinteg sha ja Hodiyos, nem enshiy basol to ja kabol la to kebono-an, ono to kaybedoran. 30 Jet idi waray engikowan son si-kak ey waray Hodiyos ja nantotodag ja kowan sha ey bono-en sha, ninemnem ko ey mapteng emo no paitolod ko len shagos son si-kam. Jet inbilin ko ngo so nonta ira makakontra son si-kato ey iparang sha son si-kam i kabol la kakontra-an sha so.” Sajay i kowan nonta solat.
31 Jet sota ira solsharo, tinongpal sha sota bilin ni apo sha, jet indaw sha si Pablo nonta edabi shi Antipatrisa. 32 Jet idi nonta ewa-wa, nay-oli ira sota eshakel la solsharo, jet sota ira solsharo bengat ja waray kabajo to, si-karay engitodoy ja engitodod so nen Pablo, 33 ingkatod Sisaria, jet sota solat, in-awat sha so nonta gobinarol, asan shaka i-wat si Pablo son si-kato.
34 Sota gobinarol, binasa to sota solat jet inbag-an tos Pablo no toway ilin edapo-an to, jet idi inamta-an to ey edapod Silisia, 35 kowan to ey, “No onmotok ali ira sota makakontra son si-kam, itenengan ko ita kasom.” Jet inkowan to ey bantayan ni solsharo shima kad-an ni baley ni gobinarol, ja istay baley nen Ari Hirodis nontan da.