21
Ondaw ma si Pablo shi Jerusalem
1 Nandogan kamid barko et indekjas mi ira. Jet sota nandoganan min barko, nandiritso shima Kos, jet nonta maykadwen akew, simabi kamid Rodas, jet intoloy mi ingkatod mimotok kamid Patara. 2 Jet waray simbi mid man ja barko ja ondaw shi Ponisia, jet si-katoy nan-etanan min nandoganan. 3 Simabi kami nodta mebedin na mayshedmang i Cyprus, jet nanshalan kamid pesaw ni Cyprus, jet timorong kamid Siria, asan kami sabid Tira. Simalsheng sota barko shi Tira ta waray kalka ja isepa to shiman. 4 Jet inshingan mi ja mi inenap ira sota ematid man jet eki-iyan kami son si-kara ni piton akew. Jet sajay iren emati, inpa-amta ni Ispirito Santo son si-kara ey manda-kam si Pablo ni digat shi Jerusalem; isonga inkowan sha son si-kato ey angken eg ondaw. 5 Jet idi enaksheng sota akew ja pan-iyan mid man, intoloy min ondaw shi dawan mi, jet sota ira emati, pati sota asewara tan annak sha, shakami intolod ingkatod ineshawi-an mi sota siyodad ni indaw mi nodta kilig ni baybay. Jet nodta kilig ni baybay, nantalimokod kamin emin ja nanshawat son Apo Shiyos, asan kamika mansisinodsod ey ondaw kami mala. 6 Kami nandogan nodta barko ey si-kara, nay-oli ired baley sha ngo.
7 Jet si-kami, manshokid Tira, intoloy mi jet mimotok kamid Tolimaida. Nonta wara kamid man, dimaw kamid ma kad-an ira nonta emati, ja mi ira inon-an, jet eki-iyan kamid man ni san-akew. 8 Jet nonta ewa-wa ma, indekjas mi ira jet mimotok kamid Sisaria. Idi mimotok kamid man, dimaw kamid baley nen Felipe, ja emengitosho met laeng ni maypangkep son Apo Jesus. Jet nan-iyan kami nin shi baley to. Sajay ya too, si-katoy sakey so nonta ira piton pinidi nonta ira ematid Jerusalem nontan da. 9 Si Felipe, waray potot ton epat ta bibiin para padto ja eg engasewa.
10 Nonta inpan-iyan mid man ni pigen akew, waray para padto ja manngeshan ni Agabo ja edapod Jodia. 11 Tokami simbi, jet to inda sota bilko nen Pablo, jet indibed tod takday to shorog, tan sedi to met laeng, jet kowan to ey, “Say kowan ni Ispirito Santo nen Apo Shiyos, sota makabilko niyay, sajay i pesing ira nonta Hodiyos shi Jerusalem son si-kato. Jet i-awat sha pay so nonta ira toon aliwen Hodiyos.”
12 Idi intenengan mi iyay ya inkowan to, sota totood man na mi binisita, tan si-kami met laeng, pineshas min inkowan son Pablo ey angken eg to itoloy ya ondaw shi Jerusalem.
13 Nem si Pablo, say kowan to et, “Ngantoy joka pannengisi? Joka pansekiti et bengat i nemnem ko. Si-kak, aliwen na sota kaybedod ko bengat i emansessesked son si-kak, no diket esagana-ak pay ja angken metey shi Jerusalem, pangkep ni naka pansilbi son Apo Jesus.”
14 Idi eg ma-adok nonta inkowan mi la, inbi-jag mi ma ja mengadok son si-kato, jet anongosto ma ey inkowan mi son si-kato ey, “Sota piyan nen Apo Jesus, si-katoy metongpal.”
Inewat shen kosto si Pablo nonta pilmiron mimotok shi Jerusalem
15 Idi epospos sota akew wa inpan-iyan mi nodtan, nansagana kami jet dima-jat kami ma ja ondaw shi Jerusalem. 16 Jet sota eshom ma i-Sisaria ja emati, shakami intolod shi baley nen Nason ja i-Cyprus ja kowan sha ey shi baley toy pan-iyanan mi. Sajay ya si Nason, sakey so nonta ira sigod ja emati son Jesus.
17 Jet idi mimotok kamid Jerusalem, sota ira a-aki mi shi pamati, ireka eman-imdeng ja engawat son si-kami. 18 Nonta maykadwen akew, nan-o-odop kamid Pablo, ja mi inon-an si Santiago. Jet emin ira sota pangolo nonta ematid man, wara ira ngo. 19 Idi naksheng nga inkowan nen Pablo ey salamat ta mapteng sota inpan-a-aspol mi, sina-sa-key ton inistoriya ma sota emin na banag ja dingdingka nen Apo Shiyos ja nansigshan nonta ira toon aliwen Hodiyos ni inpansilbi nen Pablo son si-kara.
20 Jet idi intenengan sha iyay ya inkowan nen Pablo, si Apo Shiyos i nan-iyamanan sha, jet kowan sha son Pablo ey, “Agi, amtam met ey diniboy Hodiyos ja emati son Cristo, nem sota sigod ja bilin na nay-awat son Moises i shaka on-onora pay laeng ja pasiya. 21 Jet shinemag sha ey say torom so nonta ira emin na Hodiyos ja naydaok shima aliwen Hodiyos ja wared nay-arawin dogad, intorom kono ey angken eg sha onoren sota sigod ja bilin nen Moises. Shinemag sha pay ey say torom kono ket angken eg mekokit sota annak sha, ono angken eg sha onoren na pasiya sota ogadi tayon Hodiyos. 22 Jet ngaranto may pesing? Kenshat ta amta-en sha ey wara ka. 23 Isonga no mebedin, onorim iya ikowan mi, say ma-kep ira. Waray epat ta tood jay son si-kami ja maramen shaka pandag-a i kari sha son Apo Shiyos. 24 Kay-eshom ka so ira niyay ya too. Shanshanin meksheng sota kari sha; say aneng bengat, sota ka-onoran na ogadin maybidang ey mengkal ni shaka kebedawi, tan sota pengileton sha ni animal son Apo Shiyos. Si-kam komay onbayad so ni emin na kastos sha, jet no meksheng, mebedin men pekoskos joy toktok jo. No dag-en mo iyay, si-kato may amta-an so ira nonta totoo ey sota shamag pangkep son si-kam, o-owap kari, ta asen sha met laeng ey si-kam ket moka met onora sota sigod ja bilin nen Moises. 25 Nem no sota maypangkep ni toon aliwen Hodiyos ja emati, eg mesepol la onoren sha iyay ya ogadi tayo, ta wara met i insolat min para son si-kara ja kowan mi ey eg sha kenen i apag ni animal ja naydaton shi sinan shiyos, eg sha kenen i shala, eg sha kenen i apag ni animal la epososan, tan eg ira pay memii ono mekileki.” Sajay i kowan nen Santiago tan sota ira kait to so nen Pablo.
26 Jet siya, inowen nen Pablo sota kowan sha jet inodop to ira sota epat ta too. Nonta ewa-wa, dingkara sota ka-onoran na ogadi ja ka-kalan ni shaka kebedawi. Jet idi naksheng sotan, dimaw ma ira shima Timplo, say sha ipa-amta no pigan i kepospos ni kari sha, tep sotan i dag-anan sha so nonta pengileton ni sanseskey son si-kara ni animal.
Inshel sha si Pablo et istay bono-en sha
27 Jet idi shanshanin mepospos sota piton akew ja dag-anan sha so nonta ogadira, sota ira Hodiyos ja edapod Asiya, inon-an sha si Pablo shima Timplo, jet sinogsogan sha ma ira sota eshakel la too, jet inba-ngat shay eshel so nen Pablo. 28 Kimeljaw ira ja kowan sha ey, “Si-kayon kait min Hodiyos, tolong kayo! Sajay sota too ja eman-eka-ekad shi emin na dogad ja emantosho ni emaykontra son si-katejon Hodiyos, maykontra shi dinteg tayo, tan emaykontra pay so niyay ya Timplo! Tan wara pay konoy inta-jon ton aliwen Hodiyos shiya Timplo, jet nakol ni edo-shis ma iyay ya Timplo!” 29 (Sajay i inkowan sha ta inon-an sha ey si Tropimo ja i-Ipiso i kadwa nen Pablo nontan da shima siyodad ni Jerusalem; isonga say pangkep sha, kowan sha ey inodop nen Pablo sotan na too shima Timplo.)
30 Jet sota ira totoo nodta siyodad, kimalaw ira, jet bintik sha si Pablo. Inbo-day sha ali nodta Timplo jet indekeb sha shagos sota sakepan nonta Timplo. 31 Kowan sha ey bono-en sha si Pablo, nem inamta-an nonta apo ni solsharo ja i-Roma ey emanngedawngaw i emin na tood Jerusalem, 32 jet say inpasing to, ena-wal shagos ira nonta kapitan to tan solsharo to, jet dimaw iren shagos nodta kad-an ni totoon emankodo. Jet idi inon-an ira nonta totoo ira jay, inbi-jag sha may kabil so nen Pablo. 33 Jet sota apo ni solsharo, dimaw ali jet inelbat to si Pablo, jet inkowan to so nonta solsharo to ey bedoren sha ni showen kolkolong, asan toka ibag-i ira sota totoo, ja kowan to ey, “Sipay ngaran niya joka pankebila? Ngantoy dingka ton engipasingan jon tan?”
34 Sota ira eshakel la totoo, ireka onkaneljaw, jet nan-inapil i pan-ikeljaw ni sakey tan sakey.
Sota apo ni solsharo, eg to tongolan no ngantoy kabol, ta ireka mannoteng bengat ni keljaw sha jet say inpasing to, inkowan to so nonta solsharo to ey idaw shes Pablo shima kowartil sha. 35 Idi insabi shes Pablo nodta agshan ja ondaw shi kowartil, dini-bit ira nonta solsharo, ta epaladoy kepesing ira nonta totoo son si-kato ja emanngedawngaw. 36 Jet sota ira totoo, imonod ira ja ireka onkaneljaw ja kowan sha ey, “Bono jo! Bono jo!”
Si Pablo, inshingan ton inistoriya i kaasi nen Apo Shiyos son si-kato
37 Idi shanshani ma ja isekep sha si Pablo nodta kowartil sha, inkowan to so nonta apo ni solsharo ey, “Mebedin na waray ibagak son si-kam?”
Jet sota apo ni solsharo, simongbat ja kowan to ey, “Amtam gayam ma man-a-sel ni Grigo? 38 Kowan ko nem si-kam sota i-Egypt ja engipangdo nonta epat ta dibon tolisan ja nankolo nonta dimabas den timpo asan ireka mamtik ded ma shontog.”
39 Si Pablo, simongbat ja kowan to ey, “Si-kak, Hodiyosak; edapo-ak shi Tarso, ja sakop ni Silisia, ja sakey ya kabalkan na siyodad. Too-ak shiman, jet no mebedin, ipedobos mo ja waray ikowan ko so ira nita totoo.”
40 Sota apo ni solsharo, in-aknan to ni palobos. Dimayat si Pablo nodta agshan et sininjasan to ira sota totoo ey on-eket ira. Idi imeket ira, nan-esel si Pablo ni esel shen Hodiyos.