18
Nantoro si Pablo shi Korinto, nem inokes ni eshom
1 Idi naksheng nga nantoro si Pablo shi Atinas, dimaw shi Korinto. 2 Jet waray inaspol tod man na Hodiyos ja dakin manngeshan ni Akila ja nay-anak shi Ponto. Jet si Priscilla i asewa to. Sajay iren san-asewa, ikaydapo sha did Italia, ta si Ari Claudio, inbilin to ey emin na Hodiyos ket idekjas shay Roma. Si Pablo, dimaw ja to ira inon-an. 3 Jet eki-iyan nin si Pablo son si-kara, ta nan-i-inges sa say obdaren tedo, ireka mengemag ni tolshen pankampo-an. 4 Si Pablo nonta wared man, no akew wa ngilin ni Hodiyos, kaondaw shima baley ya sa-nopan ni Hodiyos ja mantosho son si-kara, jet toka pan-ewisa ira sota Hodiyos tan aliwen Hodiyos ja memati son Jesus.
5 Idi mimotok si Silas nen Timoteo ja edapod Masidonia, tinopog ma nen Pablo ja mantosho so ira nonta Hodiyos ni maypangkep son Jesus. Sajay i intoro to: si Jesus, si-kato sota naypadton mengisedakan ja ibetkag ali nen Apo Shiyos. 6 Nem sota ira too nodtan, eg sha kosto ja itenengan i kowan nen Pablo, tan ngaaw pay i shaka ikokowan son si-kato. Jet say inpasing ma nen Pablo, pinokpok to sota depok shi baro to ja si-katoy banshaan son si-kara, jet kowan to ey, “Niman, no shosa-en shakejo nen Apo Shiyos, enshiy nak kaybiyangan son si-kayo! Ta eg jo kosto iya naka pan-itoro. Ondawak ma ja en mantosho so ni toon aliwen Hodiyos.” Kowan nen Pablo.
7 Jet si Pablo, indekjas to ira jet dimaw shi baley nen Tisio Hosto ja nay-askang nodta baley ya sa-nopan ni Hodiyos. Sajay ya too, aliwen Hodiyos nem etod-an na manshedjaw son Apo Shiyos. 8 Si Krispo ja pangolo nodta baley ya sa-nopan ni Hodiyos shiman, emati son Apo Jesus, pati sota ira pamilja to, tan wara pay iray eshakel la i-Korinto ja emati, jet nanpabonjag ira.
9 Idi sakey ya dabi, waray inpa-sas nen Apo Shiyos son Pablo ja singa kokokip, ja kowan nen Apo Jesus ey, “Kareka ontakot Pablo, tan karam ibi-jag ja mengitosho ni maypangkep son si-kak shiyay ya dogad. 10 Ta wara-ak ja maykadwa son si-kam; enshid jay i mengan-ano son si-kam, ta shiyay ya ili, eshakel i emati son si-kak.” Kowan nen Jesus.
11 Jet nontan ma, nan-iyan si Pablo shiman ni makatawen tan enem ma bolan ja emantosho so nonta ira totoo, ni maypangkep ni esel nen Apo Shiyos.
12 Nontan na timpo naysa-dat si Galion ja gobinarol shi Akaya ja shinotokan ni gobirnod Roma. Jet nontan, sota ira Hodiyos ja eg emati, nantotodag iren pebesolan si Pablo. Singkel sha et insharom shed oskaro, 13 jet kowan sha ni sharom sha ey, “Sajay ya too, si-kato i emengewis ni totoo say apil i pesing shen manshedjaw son Apo Shiyos. Emaykontra shi dinteg min Hodiyos.”
14 Jet si Pablo, istay ya onsongbat, nem si Galion, imesel, ja kowan to so nonta ira Hodiyos ey, “No maypangkep ni ngaaw wa aramid i insharoman jo son si-kato, ono waray basol to, mebedin na itenengan ko ita kowan jo, si-kayon Hodiyos. 15 Nem no sota maypangkep bengat ni esel, ono maypangkep ni ngaranton nay-apilan tod dinteg jo, ja eg jo pan-i-inawatan, mesepol la si-kayo ngon shorog i ontongtong so; enshiy nak kaybiyangan; aliwen si-kak i en mengigsheng so.”
16 Jet si Galion, inpabo-day to ira sota totoo nodta naydaem ni oskaro. 17 Nem sota ira too nen Galion ja aliwen Hodiyos, inba-ngat shay sekel so nen Sostinis ja pangolo ni sa-nopan ni Hodiyos, jet shinengshengpel sha nodta bo-dayan nonta oskaro. Nem si Galion, eg to inkaskaso iyay ya dingkara.
Si Pablo, nay-oli shi Antiok
18 Si Pablo, nan-iyan nin ni pigen akew shi Korinto. Jet idi naksheng iyay, si Pablo tan si Akila ja san-asewa, indekjas sha sota ira a-aki shi pamati shi Korinto jet nandogan ira shi barko jet dimaw ired Siria. Nem si Pablo nonta wared Sinkria, kinoskosan to may toktok to, ta naksheng nga dingka to sota kari to son Apo Shiyos. 19 Jet idi mimotok ired Ipiso, indekjas to si Priscilla nen Akila. Nem dimaw nin si Pablo, ja sakey to, shima baley ya sa-nopan ira ni Hodiyos et en nantoro so nonta ira Hodiyos. 20 Jet sota ira toon intod-an tod man, shaka pan-ipeked si Pablo no mebedin na mebedjag shiman ja meki-iyan son si-kara. Nem eg to kosto. 21 Say kowan et nen Pablo son si-kara nonta emanda-da-jat, kowan to ey, “No si-katoy piyan nen Apo Shiyos, may-odi-ak ali mowan son si-kayo.” Jet en nandogan shi barko ja indekjas toy Ipiso.
22 Idi mimotok shi Sisaria, nanshagas shi Jerusalem, jet to inon-an ira sota ematid man, asan ka-edaw shi Antiok. 23 Jet idi waray pigen akew tod man, indekjas to mowan ira sota ematid Antiok, jet dimaw shi Galasia asan shi Prigia. Inekad ton emin i sakop iren jay ya dogad, ja to intod-an ira sota ematid man, say onkedsang i pamatira.
Si Apolos, nantoro shi Ipiso tan shi Korinto
24 Jet nontan, waray toon Hodiyos ja manngeshan ni Apolos ja i-Alejandria, ja dimaw shi Ipiso. Sajay ya too, asdeg ton matekal la man-a-sel, tan eshakel i amta to ja maypangkep ni esel nen Apo Shiyos ja naysolat. 25 Alisto pay ja mengitosho ni maypangkep son Jesus so ni totoo jet koston emin i intoro to, ta etod-an ni maypangkep so ni pamati son Apo Jesus. Nem say wa-wa-sha ja amta to, sota toro nen Juan nonta timpon toka pemonjag. 26 Shima baley ya sa-nopan ira ni Hodiyos, etoled ja man-a-sel si Apolos, nem idi intenengan nen Priscilla nen Akila ja san-asewa, inewis shed baley sha jet siningpet shen inkowan son si-kato sota eg to amta maypangkep ni pengisedakan nen Apo Shiyos.
27 Nontan ma, si Apolos, ninemnem to ja ondaw shi Akaya. Idi inamta-an nonta ira a-aki shi pamati shi Ipiso, kowan sha ey, “Siya, mapteng itan na planom.” Jet nansolat ira so nonta kait shen emati shi Akaya, ja kowan sha ey, “Iyay da si Apolos son si-kayo. Jet no onmotok da, awat jo.”
Jet idi mimotok si Apolos shi Akaya, ebadeg i intolong to so nonta ira ematid man ja kinaasi-an nen Apo Shiyos. 28 Sota ira Hodiyos shiman ja eg emati, eg sha posi-en si Apolos ja songbatan. Angken shima sango-an ira ni totoo, toka itoro ey si Jesus, si-katoy tinoshong nonta padto nonta bayag da ey mengisedakan ja ibetkag ali nen Apo Shiyos. Jet say inosal nen Apolos ni olay ja engitosho, sota inpaisolat nen Apo Shiyos nonta bayag da.