12
Ema-ma ja emepedpedigat ira sota emati son Apo Jesus
1 Nontan na timpo epaladoy kepespesing nen Ari Hirodis so nonta ira eshom ma emati. 2 Si Santiago ja agi nen Juan, inpa-okdo nen Hirodis ni kampilan. 3 Jet idi inamta-an ton eman-imdeng ira sota Hodiyos ni sajay ya dingka to, mina-ma to et ja inpa-shel pay si Pedro. Sajay, naytompong nga epasemak nonta timpo ni piyasta ni Hodiyos ja kowan sha ey Paskowa ja shaka pengan ni tinapay ja eg epalwan ni para debag. 4 Jet idi inpa-shel nen Hirodis si Pedro, inpaibalod to asan toka pabantay so ni sampolo tan enem ma solsharo. Ta say plano nen Hirodis, no meksheng sota piyasta ja kowan sha ey Paskowa, bista-en tos Pedro shi sango-an ni karakdan. 5 Jet nontan ma, wares Pedro shi badoran, nem sota ira emati ja esa-nop, nanshawat ira son Apo Shiyos ja pasiya ni maypangkep son si-kato.
Waray milagron edaga nonta inkaybolos nen Pedro
6 Jet si Pedro shima badoran, na-ogip shi nankinaw-an ira ni showen solsharo ja kowadja, ja binedod sha ni kolkolong, tan wara iray nankowadja nodta sakepan ni badoran. Jet nontan na dabi, kowan nen Hirodis ey no mewa-wa, ibo-day tos Pedro ja bista-en to ma. 7 Nem nontan na dabi, ebigla ja waray anghil ja nimiyal nodta badoran. To inkiwed si Pedro, ja kowan to ey, “Kano-im bangon ka!” Jet nay-inshas ngon na-kal sota kolkolong shi takday to. 8 Jet sota anghil, inkowan to son Pedro ey isingpet ton emin i baro to tan kowan to ey i-amag toy sinilas to, asan kowan to pay ey ibaro toy ta-kep ni baro to, jet asan toka ikowan ey, “Kala, onod mowak.”
9 Jet si Pedro, inonod to sota anghil et bimo-day ira nodta badoran. Say wared nemnem nen Pedro, kowan to ey emankogkogip bengat, ja aliwen agpayso sota emankepasemak. 10 Nanshalan ira nodta kawad-an ni pilmiron kowadja, ingkato nodta maykadwa, asan ma nodta sakepan ja ontorong nodta siyodad. Jet sota danshok ka pasbol, edo-katan na shorog para son si-kara. Bimo-day ira nodtan jet nan-akad ira nin ja bintawan sha sota badoran, asan ebigla ja indekjas ma nonta anghil si Pedro. 11 Jet nontan ma, naynemneman si Pedro, jet kowan to ey, “Niman, amtak ey sajay ya edaga son si-kak ket podno. Si Apo Shiyos i engibetkag ni anghil to, say disi-an koy pedigatan towak so nen Hirodis, tan say eg mepesamak son si-kak i namnama ni Hodiyos ey dag-en sha son si-kak.” Kowan nen Pedro.
12 Jet si Pedro, idi inamta-an to ey agpayso sotan na inkaybolos to, ninemnem to ey ondaw shi baley nen Maria ja ina nen Juan ja Marcos i sakey ya ngaran to. Ta nodtan na baley i esa-nopan ira nonta emati ja emanshewat son Apo Shiyos. 13 Idi simabi si Pedro nodta pasbol ni baley, tinogtog to jet en inon-an nonta bii ja katodong sha nodta baley sha, ja manngeshan ni Roda. 14 Inimatonan toy esel nen Pedro, nem namtik ni imdeng to ey eg to et ido-katan, jet to inkowan so nonta esa-nop ey wara si Pedro nodta pasbol.
15 Nem kowan et nonta esa-nop son si-kato ey, “Ngantoy? Kaka man-engaw?” Nem idi toka ipidit ey siyen si-kato, kowan sha ey, “Apil, sota anghil emon emanbantay son Pedro.”
16 Nem si Pedro, ememasig ni togtog nodta pasbol, jet idi indo-katan sha, inon-an sha ey si-kato nga agpayso. Jet ireka emesshaaw. 17 Nem si Pedro, sininjasan to ira ey on-eg-eket ira, jet inistoriya to sota inpasing nen Apo ja engibo-day son si-kato shi badoran. Jet inbilin to ey ikowan sha sotan na epasemak so nen Santiago, tan so nonta ira eshom ja a-akira shi pamati. Jet nontan ma, indekjas to ira ja dimaw shi apil la ili.
18 Idi ewa-wa ma, sota ira kowadja nodta badoran, eg sha tongolan i dag-en sha, ta enshi la si Pedro. 19 Jet si Hirodis, inpa-anap to, nem eg sha simpol. Binistigal to ira sota kowadja ja nanbantay nontan na edabi et inbilin to ey mebono ira. Jet nontan ma, si Hirodis, shimalong nga dimaw shi Sisaria ja edapod Jodia, jet nan-iyan nin shiman.
Etey si Hirodis
20 Nontan, kontra nen Hirodis ira sota tood Tira tan Sidon. Isonga sajay iren totoo, say inpasing sha, ekikajem ira nin so nen Blasto, ja mismon kaibetbetkag nen Hirodis, say si-katoy mengadok son Hirodis ey enshiy bakal koma, ta say kedepo-i ni kekena ira niyay ya too ket shi ili met laeng nen Hirodis.
21 Idi simabi sota akew wa pan-a-aspol sha, sotan na akew i pinidi nen Hirodis ja osalanan to so nonta baro ton kaibaro ni ari jet timongaw shi tongawan ton mapteng, asan pay nandiskolso shi sango-an nonta totoo.
22 Jet sota totoo, kimeljaw ira ni inshayaw sha son si-kato, ja kowan sha ey, “Aliwen esel ni too i esel to, no diket esel ni sakey ya shiyos!”
23 Jet nontan ma, bigla ja shinosa ni anghil nen Apo Shiyos si Hirodis, ta inewat toy in-etekan so ni totoo, ey enshiy shayaw to son Apo Shiyos. Jet say shosa to, nakdang nga pasiya asan ma matey.
24 Manipod ma nontan, sota esel nen Apo Shiyos, emankaiweshis shi eshakel la dogad jet emansha-kel la emansha-kel i ememati so.
25 Jet si Bernabe nen Saulo, nay-oli ired Antiok ja edapod Jerusalem, ta kinsheng shay obdared man, jet inodop sha si Juan ja manngeshan met laeng ni Marcos.