10
Dimaw si Pedro shi baley nen Cornelio
1 Shi siyodad ni Sisaria, waray manngeshan ni Cornelio ja kapitan ni sandasos sa solsharo alid Roma ja poro tima-nil iren i-Italia. 2 Sajay ya kapitan, ebadeg i pamati to son Apo Shiyos, jet si-katoy toka topogen panshedjawi, jet angken pay sota ira totoon wared baley to, ireka ngo ememati son Apo Shiyos. Sajay ya kapitan, aliwen Hodiyos, nem kanayon na emengi-kan ni tolong to so nonta ira nankebiteg ga Hodiyos, tan eg to diwayan na manshewat son Apo Shiyos. 3 Jet idi sakey ya akew ja oras ni alas tris ni mama-shem, waray inpa-sas nen Apo Shiyos son si-kato. Inon-an ton mismo i anghil nen Apo Shiyos ja dimaw son si-kato, jet inngadnan tos Cornelio. 4 Si Cornelio, mimorag ni takot to so nonta anghil, ja kowan to ey, “Apo, ngantoy ikowan mo son si-kak?”
Jet sota anghil, simongbat ja kowan to ey, “Si Apo Shiyos, intenengan toy shawat mo, tan amta toy mapteng nga tolong mo so nonta ira maligdigat. Isonga ninemnem toka. 5 Jet niman, pangibetkag ka ni ondaw shi Jopa ja en mengodop so nen Simon ja Pedro i sakey ya ngaran to. 6 Sajay ya si Simon, eman-iyan shima kilig ni baybay shi baley nen boloy to, ja si Simon, ja para amag ni kolti.”
7 Jet idi enaksheng nga inkowan nonta anghil iyay, indekjas nonta anghil si Cornelio. Jet si Cornelio, ena-wal nonta showen baga-en to, tan pinidi to pay i sakey so nonta ira solsharo ton emansilbi son si-kato shi baley to, ja emati met laeng son Apo Shiyos. 8 Jet inistoriya to nin son si-kara sota inon-an to, asan toka ibetkag ira shi Jopa.
9 Jet nonta maykadwen akew, sota inbetkag nen Cornelio, wara ired ma shalan ja shanshanin sebi-en shay Jopa. Jet nontan ngo, dimaw si Pedro nodta nanshekdan na atep ni baley ya toka pan-iyani, say en manshewat shiman son Apo Shiyos nonta alas dosi. 10 Na-agang nontan, jet piyan ton mengan, nem marama ja shaka pan-isagana sota kenen to. Jet nonta wara nodta atep ni baley, waray inon-an ton inpa-sas nen Apo Shiyos. 11 Inon-an toy dangit ja edo-katan, jet wara aliy ekalbot ja nay-oy-oy son si-kato, ja epat i nay-iket ta wanet nodta shogo to. 12 Jet nodtan, waren emin i kalasin animal, titit, tan angken pay sota emankoshap shi bo-day. 13 Jet waray intenengan ton esel la kowan to ey, “Pedro, dayat ka jet pamadti ka ni piyan mon kenen!”
14 Nem si Pedro, simongbat ja kowan to ey, “Enshi Apo, ta eg mebedin ja menganak ni angken nganton kaibilang ni si-kamin Hodiyos ey ensekig!”
15 Jet waray simongbat ja kowan to ey, “Sota banag ja kowan nen Apo Shiyos ey edinis, karam ikowan ey ensekig.”
16 Jet sotan na banag, emintedo ja dimespag ali so nen Pedro, ja etaksholan ni esel, asan ka-oli mowan da shi dangit.
17 Jet si Pedro, toka nemnemnemen pasiya iyay ya inon-an ton inpa-sas nen Apo Shiyos, ta eg to amta no ngarantoy olog to. Jet nontan ngo, sota ira toon inbetkag nen Cornelio, simpol sha sota baley nen Simon ja kad-an nen Pedro, jet ireka mansessesked nodta pasbol. 18 Jet kimeljaw ira ja inbaga sha, no waray manngeshan ni Simon ono Pedro ja nanshiwes ja eman-iyan nodtan na baley. 19 Jet nontan, kenemnemnema nen Pedro no ngantoy olog nonta inon-an ton inpa-sas nen Apo Shiyos son si-kato. Jet waray inkowan ni Ispirito Santo nen Apo Shiyos son si-kato ey, “Asas mo, waray tedon too ja emengenap son si-kam. 20 Daw ka, mo ira sabi, jet kareka manshoshowa ja mekidaw son si-kara, ta si-kak met laeng i engibetkag ali son si-kara.”
21 Jet si Pedro, dimespag ali nodta atep jet to inkowan so nonta tedon toon emansessesked ey si-kato sota toon shaka pan-enapa, jet inbag-an to ira no ngarantoy kabol la dinawan sha ali.
22 Jet sota ira tedon daleki, inkowan sha son Pedro ey, “Inbetkag shakami nen Cornelio, ja kapitan ni solsharo ni gobirnod Roma, ja mika odopen. Saja si Cornelio, mapteng i ogadi to. Si Apo Shiyos bengat i toka panshedjawi, jet angken emin na Hodiyos, shaka ikowan ey mapteng noman. Waray anghil nen Apo Shiyos ja nanpa-sas son si-kato, jet inkowan to ey pa-odop toka ja ondaw shi baley to, say itenengan toy ikowan mo son si-kato. Isonga dimaw kami ali.”
23 Jet si Pedro, inewis to ira ja ma-okip ira nin ni sandabi nodta kad-an to.
Jet nonta ewa-wa, ekidaw si Pedro son si-kara, jet wara pay i eshom ma a-aki shi pamati ja i-Jopa ja ekidaw son si-kato. 24 Jet idi maykadwen akew, mimotok ira shi Sisaria, ja ilin kawad-an nen Cornelio. Jet si Cornelio, emansessesked son Pedro, tan wara pay ira sota partido to tan kagajem to ja inewis to ali shi baley to.
25 Idi emanseskep si Pedro, en inaspol nen Cornelio jet nantalimokod shi sango-an nen Pedro, ja nanshayaw son si-kato.
26 Nem si Pedro, shinewat to et inpaledjat to, asan toka ikowan ey, “Dayat ka, ta si-kak, too-ak ngo bengat ja inges mo!”
27 Jet si Pedro nen Cornelio, ireka mantabtabal ey ireka eman-ekad, jet idi onsekep ira nodta naydaem, inon-an to ira sota eshakel la toon esa-nop. 28 Jet si Pedro, kowan to son si-kara ey, “Si-kayo, amtayo met ey say ogadi ni si-kamin Hodiyos ket eg mebedin na mekigajem kami ni toon aliwen Hodiyos ono ondaw shi balbaley sha. Nem si Apo Shiyos, inkowan to son si-kak ey enshiy nak ibiyang nga too ja okesen ko, ja angken ngantoy katoo to. 29 Isonga idi onmotok da sota inbetkag mo son si-kak, enshiy showashowak ja ondaw ali. Jet niman, piyan kon ibaga son si-kam no ngantoy inpa-odopan mowak so.” Kowan nen Pedro.
30 Jet si Cornelio, insodsod to ja kowan to ey, “Nonta epat den akew wa dimabas, inges niyay ya oras nonta naka manshewat son Apo Shiyos ni alas tris ni mama-shem, jet bigla ja waray toon nanbaro ni emenenili ja dimayat shi sango-an ko, 31 jet kowan to ey, ‘Cornelio, si Apo Shiyos, intenengan toy shawat mo, tan eg to dibkan sota mapteng nga tolong mo so ni maligdigat. 32 Isonga niman, pangibetkag ka shi Jopa ni en mengodop so nonta toon manngeshan ni Simon ono Pedro, ja eman-iyan shima kilig ni baybay shi baley nen boloy ton si Simon, ja para amag ni kolti.’ Kowan nonta too son si-kak. 33 Isonga engibetkagak den shagos ni en mengodop son si-kam, jet mapteng nga pasiya i dingkam, ta dimaw ka di, jet niman, iyay kamin emin, jet amta nen Apo Shiyos ey kamika emansessesked ja mengitneng nonta ikowan mo son si-kami ja bilin nen Apo Shiyos.” Kowan nen Cornelio.
34 Jet si Pedro, imesel, ja kowan to ey, “Niman, naka ma pati-a ey si Apo Shiyos, nan-i-inges i toka pesing so ni totoo. 35 Emin na too shiya dobong, ja emati son Apo Shiyos, tan emandeka ni mapteng, kenshat ta ewaten nen Apo Shiyos, angken ngantoy katoo to. Aliwen si-kamin Hodiyos bengat i ewaten to. 36 Amtayo met ey si-kamin Hodiyos ja i-Israel, si-kamiy inbetkagan to so nen Jesucristo say to ikowan no ngarantoy dag-en mi say kosto-an shakami nen Apo Shiyos, jet si-kato met laeng sota Apo ni toon emin, pati si-kayon aliwen Hodiyos. 37 Amtayo met pay sota edagdaga shi intiron Jodia manshoki shi Galilia nonta naksheng nga intoro nen Juan i maypangkep nonta toka pemonjag. 38 Jet amtayo met ey si Apo Shiyos, shinotokan tos Jesus ja i-Nasarit ja si-katoy pan-iyanan ni Ispirito Santo to, tan in-aknan to ni panakabalin to. Jet si Jesus, nan-aka-akad say en mandeka ni panmaptengan ni totoo, jet inpamapteng ton emin sota emanpansekit ja kepedigata nen Satanas, ta si Apo Shiyos, wara ni olay son si-kato. 39 Jet si-kami i onpaneknek so ni emin na inon-an min dingka to shi ili min Hodiyos, pati shi Jerusalem, jet mismon inon-an mi pay ja indansara shi koros ni inbono sha so. 40 Nem si Apo Shiyos, inpanbiyag to nonta maykatdon akew, jet waray nanpa-sasan to. 41 Nem aliwen emin na too ket inon-an sha. Say engasas bengat son si-kato, si-kami ja shinotokan nen Apo Shiyos ja mengikowan ni maypangkep son si-kato. Nonta naksheng nga nanbiyag, ekipengan pay son si-kami. 42 Jet si-katoy mismon engibetkag son si-kami ja mengikowan shi totoo ni maypangkep son si-kato, tan mengikowan ey si-katoy pinidi nen Apo Shiyos ja mengigsheng ni panbenagan ali ni totoon wara pay laeng shi biyag tan angken sota toon nanketey da. 43 Jet angken sota emin na para padto nen Apo Shiyos nonta bayag da, insigod shen inkowan ey emin na toon memati son si-kato, mepekawanan i basol sha. Ta si Jesus i inpiyalan nen Apo Shiyos ja memekawan ni basol.”
Sota ira toon aliwen Hodiyos ja emati, inewat sha ngoy Ispirito Santo
44 Jet nonta marama ja pan-ikowan nen Pedro iyay, dimespag aliy Ispirito Santo nen Apo Shiyos so nonta ira engitneng nontan. 45 Jet sota ira ematin Hodiyos ja i-Jopa ja ekidaw son Pedro, ireka emesshaaw, ta sota ira toon aliwen Hodiyos, engawat ngo ira ni Ispirito Santo ja in-akan nen Apo Shiyos. 46 Inamta-an sha iyay tep intenengan sha shi Cornelio ja nan-esel ni ekalkalasin esel ja aliwen esel sha, tan intenengan sha pay ira ja ireka eman-iyaman son Apo Shiyos.
Jet si Pedro, kowan to ey, 47 “Niman, nganto may pesing so iren ja totoo ja kawad-an ma ni Ispirito Santo nen Apo Shiyos ja inges shakito? Enshi emoy mengitoded ja mengikowan ey eg ira manpabonjag.”
48 Jet si Pedro, inkowan to son si-kara ey, “Panpabonjag kayo ja si Jesucristo i toshongen jon pati-en ni olay.”
Jet nontan, inkowan sha ey man-iyan nin si Pedro son si-kara.