7
Si Esteban, inta-shelan toy bakdang to shorog
1 Sota kangeto-an na pari, inbag-an tos Esteban ja kowan to ey, “Jet agpayso noman ja inkowan mo iyay?”
2 Nem si Esteban, eg to sinongbatan sota salodsod, no diket say inkowan to son si-kara, kowan to ey, “A-akik, a-amak, nemnem jo kari iya inpaspasing nen Apo Shiyos son si-katejon Hodiyos manipod nonta timpon Abraham ingkato niman. Si Apo Shiyos ja Kangeto-an, nanpa-sas son Abraham ja apo tayo, nonta wara pay laeng shi Misopotamia ni eg to nin indaw shi Haran. 3 Say kowan nen Apo Shiyos son si-kato, idekjas toy pamilja to tan ili to jet ondaw shima dogad ja itorongan to so. 4 Jet si Abraham, indekjas to nga agpayso sota ili ton Kaldia jet dimaw ja nanbaley shi Haran. Jet idi enaksheng ja etey si ameto, inpalaw nen Apo Shiyos si Abraham shiyay ya ilin kawad-an jo niman. 5 Nem si Apo Shiyos, enshin polos i to in-akan son Abraham ja bo-day shiyay, ja angken sanshalokap. Nem inkari to iyay ya ili son si-kato, pati sota appo to di, ey enshiy pay laeng nin i potot nen Abraham nontan. 6 Tan wara pay i inkowan nen Apo Shiyos son Abraham, ey sota ira poli to, manbedin ira ni sa-bo shi eshom ma ili, jet manbedin ira ni baga-en nodtan. Jet pedigaten ira nonta sigod ja tood man ni epat ta dasos ja tawen. 7 Nem kowan nen Apo Shiyos ey shosa-en to ira sotan na toon memedigat son si-kara, jet no meksheng iyay, kowan to ey idekjas nonta poli nen Abraham sotan na ilin nandigatan sha, jet shiyay alin dogad ja kad-an tayo i dawan shen panshedjawan son Apo Shiyos. 8 Si Apo Shiyos, in-awat to ngo eshan so nen Abraham sota ogadi ja nayngadnan ey kogit. Sajay i penginemneman sha nonta ekitodagan nen Apo Shiyos son si-kara. Jet si Abraham, kinokit to si Isaac ja anak to nonta waray piton akew to ja nay-anak. Jet si Isaac, potot to si Jacob, jet si Jacob, sampolo tan showay potot to, jet si-karay makapoli son si-katejon Hodiyos.
9 “Sajay iren san-a-akin annak nen Jacob ja daleki, inepalan sha si Jose ja agi sha jet indako sha so nonta i-Egypt. Nem si Apo Shiyos, eg to binaybay-an si Jose, 10 no diket tinodongan to shi emin na digat to, jet in-aknan to pay ni daing; isonga kinosto-an nen Paro ja ari shi Egypt si Jose. Jet si Paro, shinotokan to si Jose ja gobinarol shi intiron Egypt, tan si-katoy emengimanshal ni emin na wared baley nen Ari Paro. 11 Nontan na timpo, sota appo tayo da, ja a-aki nen Jose, wara ired Kanaan, jet edigat i pengal-an shed man ni kenen sha tep maramay bitil. Bitil met laeng shi Egypt, 12 nem waray mekan na naytalod man. Isonga idi shinemag nen Jacob ey waray mekan shiman, inbetkag to sota annak to ja appo tayo da ey ondaw ira shi Egypt. Jet nontan i pilmiron indaw shed man. 13 Idi kapinshowa ja ondaw ira, inpa-amta nen Jose ja mismo son si-kara ey si-kato si Jose ja agi sha, jet nontan ma, inamta-an nen Ari Paro i pamilja nen Jose. 14 Jet si Jose, inkowan to nodta a-aki to ey ondaw ali si Jacob ja amesha, angken pay sota pamilja to say manbonal ired Egypt. Jet say kabebilang sha, piton polo tan dima. 15 Jet si Jacob, shimalong shi Egypt, jet shiman i eteyan to, tan eteyan ira nonta annak to ja appo tayo da. 16 Nem sota bakdang sha, in-akad shed Sikim jet shiman i naybeka-an sha, nodta bo-day ya tinongkal da nen Abraham so nonta anak nen Hamor.
17 “Nem idi shanshani ma sota timpon idaw ira nonta appo tayo da shima dogad ja inkari nen Apo Shiyos son Abraham, shimakel iren pasiya shi Egypt. 18 Jet nontan, wara may naysa-dat ja arin nantoray shi Egypt ja eg to am-amtay mapteng den dingdingka nen Jose shi Egypt nonta epangdon akew. 19 Jet say inpasing to, sinaol to ira ja appo tayo da. Nga-ngaaw i inpasing to son si-kara, ja pinidit to ira ja mengi-ibong ni annak sha say metey ya emin ira sota kenga-nga-nga. 20 Jet nontan na timpo, nay-anak si Moises ja memapteng nga nga-nga. Tedon bolan to bengat ja na-ajowan shi baley, 21 jet idi kenshat ta i-ibong sha ma, sota biin anak nen Ari Paro, tinekibi to ja inbilang to ey anak to. 22 Inpan-iskoida to si Moises; isonga amta ton emin i ashal shi Egypt. Edaing nga man-a-sel, tan sota obda to, wara ni olay i toka panbenagi.
23 “Jet idi waray epat ta polon tawen to, ninemnem ton to asen iray kait ton i-Israel. 24 Jet nontan, naytompong ja waray inon-an ton i-Egypt ja epaladoy toka pesing so nonta sakey ya i-Israel. Inbaliwan nen Moises sota kait ton i-Israel, jet binono to sota i-Egypt. 25 Ta say wared nemnem to, kowan to nem ewatan ira nonta kait ton i-Israel ey si-katoy osalen nen Apo Shiyos ja mengisedakan son si-kara ni shaka pandikat, nem eg sha inewatan. 26 Jet idi maykadwen akew, wara mowan i inon-an to ja showen i-Israel ja emanbekal, jet to pineshas ja bineltak ira, ja kowan to ey, ‘Nemnem jo kari! Apay nga manbekal kayo, ket nan-inges kayon i-Israel?’ 27 Nem sota sakey ja engigepo ni bakal, si-katoy engitolshon son Moises ja kowan to ey, ‘Sipay engikowan son si-kam ey itorayan jokami? Sipay engikowan ey si-kam i mengigsheng ni maypangkep son si-kami? 28 Kowan mo ngo ey bono-en mowak ja inges toy inpasing mo so nonta toon i-Egypt nonta na-shem?’ 29 Idi intenengan nen Moises iyay, timakot jet bintikan toy Egypt. Dimaw shi dogad ja kowan sha ey Midian, jet engasewed man jet waray showen daki ja inpotot to.
30 “Jet idi edabas i epat ta polon tawen, nanpa-sas i anghil son si-kato shi emanshedang nga ootik ka kiyew shi dogad ja nay-esop shi shontog ga kowan sha ey Sinai. 31 Jet nasshaaw si Moises nonta inon-an to iyay. En imesop, ta piyan ton asen, jet waray esel nen Apo Shiyos ja intenengan to ja kowan to ey, 32 ‘Si-kak si Apo Shiyos ja Shiyos nonta appom da, ja si Abraham, si Isaac tan si Jacob!’ Si Moises, timakot et emanbebayedbed, isonga eg to ma itoled ja ishemang sota apoy. 33 Jet si Apo Shiyos, kowan to son si-kato ey, ‘Ekal mo ita sapatos mo ja si-katoy panrispitom son si-kak, ta sajay ya dogad, niman na kawashak shiyay, eshiyosan! 34 Inon-an koy kepandikat ira ni took shi Egypt, intenengan koy shaka pannengis; isonga dimawak ali ja mengisedakan son si-kara, ni shaka pandikat. Eti, ibetkag taka shi Egypt.’ Kowan nen Apo Shiyos.
35 “Nonta eg pay laeng namtik si Moises shi Egypt, eg inewat ni kait ton i-Israel ja inkowan sha nontan son si-kato ey, ‘Sipay engikowan ey si-kam i mengitoshay son si-kami tan mengigsheng ni maypangkep son si-kami?’ Nem si Apo Shiyos, si-katoy engibetkag son si-kato ja mengitoshay tan mengisedakan son si-kara shi anongosto met laeng, isonga sota anghil ja inon-an tod apoy nonta nan-esel si Apo Shiyos, si-katoy timolong son Moises, 36 ja mengibo-day ni i-Israel shi Egypt. Jet si Moises, eshakel i kaskasshaaw wa milagro ja dingka to shi Egypt, pati nonta binediw sha sota kowan sha ey Embalengen Baybay, tan angken pay shima dogad ja shinshindan sha ni epat ta polon tawen ja enshiy balebaley. 37 Jet si-kato met laeng sota si Moises ja engipadto so ni toon i-Israel ey, ‘Waray ibetkag ali nen Apo Shiyos son si-kayo ja mengikowan ni esel ton mismo, ja inges toy inpangibetkag to son si-kak. Si-katoy sakey ya poli tayo di.’ 38 Jet saja si Moises, si-kato sota eki-od-odop so nonta i-Israel ja appo tayo da ni inpan-ak-akad sha shima shinshindan sha, tan si-kato pay i ekitbal so nonta anghil shi shontog ni Sinai ja engi-wat nonta naysolat ja bilin nen Apo Shiyos son si-kato say itawid to ngo son si-katejo.
39 “Nem sota appo tayo da, inbiyang sha ja eg sha pinati si Moises, jet inpa-agpos sha et ja on-oli ira shi Egypt. 40 Isonga inkowan sha son Aaron ey mandeka et ni sinan shiyos ja mepangdo ey si-kara, ni shaka pan-ekad, ta kowan sha ey, ‘Si Moises ja engibo-day son si-katejo shi Egypt, ebayag met ded ma shontog; tawey nem toway dinawan to.’ 41 Jet nontan ma, nandaga ira ni sinan shiyos sha, ja singa baka i itsora to, jet si-katoy in-aknan sha so ni daton sha; nandaladsak pay ira ni shayaw sha so nontan na dingkaren sinan shiyos sha. 42 Nem si Apo Shiyos, binay-an to ira ja angken manshedjaw ira ni talaw. Sajay i inkowan ni padto nonta bayag da ja esel nen Apo Shiyos ey,
‘Si-kayon toon i-Israel, aliwen si-kak i in-aknan jo so nonta animal ja pinadtiyo tan eshom ma daton jo, ni kawashayo shima nan-ak-akshan jo ni epat ta polon tawen. 43 Sota tolsha ja kampo ni sinan shiyos jo ja kowan sha ey Molok ja joka ita-ta-jon, tan si Ripan ja sinan shiyos jo ja talaw, sajay iren dingkayo, si-katoy kabol la indawan takejo so shi arawin dogad ja dabsan jo pay i Babilonia.’ Kowan nen Apo Shiyos.
44 “Idi dimabas i pigen tawen da, nandaga ira sota appo tayo da ni kampo ja tolsha ja panshedjawan sha son Apo Shiyos nonta nan-aka-akad ired ma dogad ja enshiy balebaley. Jet inonod shen dingka sota intoro nen Apo Shiyos son Moises ey dag-en sha. 45 Jet sota annak sha i imelbat so nontan na tolsha ja kampo, jet sinaksakbat sha ni inpakidaw sha son Josue ni inpiliw sha so nonta ili ira nonta enshiy Shiyos sha ni inshagshag so nen Apo Shiyos son si-kara. Jet sajay ya tolsha, wara ingkato nonta inpan-ari nen David. 46 Jet si David, kinosto-an nen Apo Shiyos, jet enangshaw son Apo Shiyos ni palobos to ja mandeka ni Timplo ja baley nen Apo Shiyos, ja Shiyos ni Israel. 47 Nem say dimaga niyay ya Timplo nen Apo Shiyos, si Solomon, ja anak nen David. 48 Nem si Apo Shiyos ja Kangeto-an, eg man-iyan shi baley ya dingka ni too, jet angken sota para padto, inkowan sha iyay ya esel nen Apo Shiyos ey,
49 ‘Say dangit, si-katoy naka tongawi, jet say dobong, si-katoy kaketketini ni shapan ko; isonga angken nganton kalasin baley ya dag-en jo para son si-kak ja kowan jo ey pan-inan ko, eg mansilbi. 50 Ta emin ira ja waren ma-esas, si-kak i pimalsowa so.’ Kowan nen Apo Shiyos.”
51 Jet si Esteban, intoloy to ja kowan to so ira nonta esa-nop pa toray ni Hodiyos ey, “Epalado kayo, etangken i toktok jo! En-asneng jon itenengan i bilin nen Apo Shiyos! Nay-inges kayo met laeng so ira nonta appoyo la, ja eg jo kosto ni olay ja ishalan shakejo ni Ispirito Santo! 52 Sipay amtayo ja para padto nen Apo Shiyos nonta bayag da ja eg pinedigat ni appoyo? Enshiy sha binaybay-an! Binonoren emin ira sota engipadto nonta bayag da ey waray ibetkag ali nen Apo Shiyos ja mengisedakan! Jet idi nay-agpayso sota padto ni indaw ali nen Cristo, si-kato sota inpa-shel jo jet inpabonoyo, ey enshiy basol to. 53 Si-kayo i engawat nonta bilin nen Apo Shiyos ja in-awat ni anghil so nen Moises, nem eg jo pinati!” Sajay day inkowan nen Esteban son si-kara.
Si Esteban, kinespigan sha ni bato et etey
54 Jet idi intenengan ira nonta toray ni Hodiyos sota inkowan nen Esteban, dimeshang ira ja emanngedetnget i sangi sha ni bonget sha son si-kato. 55 Nem si Esteban ja inshalan ni Ispirito Santo, timangkak shi dangit jet inon-an toy emenenilin edapo son Apo Shiyos, tan inon-an to pay si Jesucristo ja dimayat shi apit ni kanawan nen Apo Shiyos. 56 Jet kowan to ey, “Tangkak kayo! Inon-an kon edo-katan i dangit, jet sota kowan sha ey Anak ni Too, dimayat shi apit ni kanawan nen Apo Shiyos!”
57 Nem sota ira toray ni Hodiyos, inopop sha et i tangidara, ja ireka mankeljaw, jet bintik shen shagos si Esteban. 58 Inbo-day sha nodta ili jet nan-a-atangan shen kineskespigan ni bato. Jet sota ira engikowan ni kowan sha ey basol nen Esteban, si-kara i epangdon engikespig ni bato son si-kato. Jet sota ira engespig, insepara sota ta-kep ni baro sha shi sango-an nonta balodaki ja manngeshan ni Saulo, ja kowan sha ey bantayan to.