18
In-arig nen Jesus sota kowis ja enshiy kaasi to
1 Si Jesus, waray inkowan ton arig son si-kara say eg ira medismayen manshewat son Apo Shiyos, no diket manshewat ira son si-kato ni olay. Iyay sotan na arig: 2 “Wara konoy kowis shi sakey ya ili ja endedamsis tos Apo Shiyos, tan kasta met sota kaikowan ni kait ton too. 3 Jet wara ngoy ebalon bii nodtan na ili, ja kanayon na kaondaw son si-kato ja mengshaw ni kaasi, ja kowan to ey, ‘Apo, ibediwimak ka ta iman i kowan to ey memidiw ni kokowak.’ 4 Nem ebayag malen timpo, eg sinintil niyay ya kowis i shawat nonta biin ebalo. Nem idi emasig sota bii ni shawat to ni tolong, kowan nonta kowis shorog so ni bakdang to ey, ‘Angken bilang ey endedamsis kos Apo Shiyos tan totoo, 5 ibaliwan kos iyay say ibi-jag ton ondaw ali ni olay, say eg towak ma notengen.’ ” 6 Jet si Apo Jesus, intoloy to ey, “Nemnem jo iyay ya inpasing niyay ya kowis. Enshiy kaasi to, nem ibaliwan to ja biin emasig ni shawat to ni kaasi. 7 Jet si Apo Shiyos, mas pay todongan toy too ton memasig ja mengshaw son si-kato ni inakew tan dinadabi. Say kowan jo emo, eg to itenengan shagos aya i shawat jo? 8 Say kowan ko son si-kayo, si Apo Shiyos, aliston mengibediw so ni too to; isonga eg kayo koma medisdismaya. Enshiy showashowa maypangkep son Apo Shiyos, nem si-kayo mangon too, piga emoy memati pay laeng son si-kak ingkatod i-olik mowan ali?”
In-arig nen Jesus sota showen nanshawat son Apo Shiyos
9 In-arigan nen Jesus ira sota toon kowan sha ey si-kara i sigoradon mapteng mangoy aramid sha, jet kowan sha ey sota eshom, ayshi konoy kenkenshat sha. Jet kowan nen Jesus ey, 10 “Waray showen too ja nan-inshas ja dimaw shi Timplo ja manshewat son Apo Shiyos. Sota sakey, Parisiyo; sota sakey, para singil ni bowis. 11 Dimayat sota Parisiyo jet kowan to shorog shi bakdang to ni shawat to ey, ‘Salamat Apo Shiyos, tep aliwen inges ko iya para singil ni bowis ja enshiy kenkenshat to. Salamat tep aliwen mapidiwak, aliwen malokdoko-ak, aliwen mabii-ak, ja inges toy aramid ni eshom. 12 Naka ngidinay meminshowa ni makadomingko ja naka ibiyang i pengan, tan emin na naka epita, naka idaton pay i ikasampolo son si-kam.’ Kowan nonta Parisiyo ni shawat to. 13 Nem sota para singil ni bowis, dimayat shi naybetaw, ja embaing pay ya ontangkak shi dangit. Toka pay panpagpaga i pagew to ni toka panbebawi, jet kowan to ni shawat to ey, ‘Apo Shiyos, kaasi-imak ta eshakel i basol ko.’ ” 14 Jet intoloy nen Jesus ey, “Ikowan ko son si-kayo, sajay ya para singil ni bowis, si-katoy kinosto-an nen Apo Shiyos asan ka-akad shi baley to; nem sota Parisiyo, eg to kinosto-an. Sota toon mengingeto ni bakdang to shorog, si-kato et ngo mowan i maybeba; jet sota toon toka ibaba shorog i bakdang to, si-katoy mayshedjaw.” Kowan nen Jesus.
Inpalobos nen Jesus ja ondaw ira di sota a-anak son si-kato
15 Sota eshom iren too, indaw shay angken nga-nga son Jesus, ta kowan sha ey say pishaten ton bindisiyonan ira. Nem idi inon-an ira nonta too nen Jesus iyay, inseg-ang sha ira sota engidaw ali nonta a-anak. 16 Nem si Jesus, tina-wal to sota ira a-anak ja ondaw ali son si-kato jet kowan to so nonta ira too to ey, “Baybay-iyo ira di sota a-anak ja ondaw ali son si-kak; eg jo iparit. Tep inges iren jay ya a-anak bengat ja ekombaba i mayda-kam shi pantoshayan nen Apo Shiyos. 17 Podno iya ikowan ko son si-kayo. No eg kayo mengewat ni pantoshayan nen Apo Shiyos ja inges toy kepengewat ni a-anak, eg kayo mayda-kam ja onsekep shi pantoshayan nen Apo Shiyos.” Kowan nen Jesus.
Si Jesus tan sota baknang
18 Waray pangolo ni Hodiyos; inbag-an tos Jesus ja kowan to ey, “Maistoro, mapteng ken too. Ikowan mo ga no ngarantoy dag-en ko say mewad-anak ni biyag ja enshiy to engintegan.”
19 Simongbat si Jesus ja kowan to ey, “Ngantoy mosoka ikowani so ey maptengak? Abos nen Apo Shiyos ja mapteng. 20 Nem no maypangkep nonta biyag ja enshiy to engintegan ja inkowan mo, amtam sota ira bilin nen Apo Shiyos: ‘kareka memii ono mekileki, kareka memono, kareka mengibot, aliwen mo ba-ngaten ja man-a-sel ni aliwen kosto; tan shayaw mos inam tan si amam.’ ”
21 Kowan nonta too ey, “Nontan pay laeng nga-nga-ak ingkato niman, inonod kon emin itan na bilin nen Apo Shiyos.”
22 Idi intenengan nen Jesus iyay, kowan to ey, “Wara pay laeng i sakey ya kolang mo. Ilekom ira sota kokowam et sota dako to, iweshis mo so nonta ira nankebiteg. No sajay i pesing mo, say kawad-an ni kabaknang mo ma, naytalo shi dangit. Jet no meksheng nga sotan i pesing mo, kay-eshom ka di so ira niya took!”
23 Nem idi intenengan nonta too iyay ya inkowan nen Jesus, ensakit ta pasiya i nemnem to, tep toka tepi-a i kabaknang ton pasiya.
24 Inningning nen Jesus iyay ya too et kowan to ey, “Edigat ja onsekep i baknang shi pantoshayan nen Apo Shiyos! 25 Sota animal ja kowan sha ey camel, no kas-anoy kalikat to ja on-osok shi ebot ni shakom, mas edigdigat pay ya onsekep i babaknang shi pantoshayan nen Apo Shiyos!”
26 Sota totoon engitneng niyay ya kowan nen Jesus, kowan sha ey, “No kasta, enshi ngarod i maysedakan?”
27 Nem simongbat si Jesus ja kowan to ey, “Agpayson eg kabaalan ni toon mengisedakan ni bakdang to shorog, nem sota eg mebedinan ni toon dag-en, mebedin na dag-en nen Apo Shiyos.”
28 Kowan nen Pedro ey, “Karam ngo dibdibkan ey si-kami, indekjas min emin i kokowa mi nonta nanbalinan min toom.”
29 Jet si Jesus, kowan to son si-kara ey, “Podno iya ikowan ko son si-kayo. No sipay engilekjas ni baley to, asewa to, a-aki to, annak to, ono sota maka-anak son si-kato, maypangkep ni pantoshayan nen Apo Shiyos, 30 ebadbadeg ga pasiyay ewaten to niman na kawasha tod ja dobong, tan no man-onod alin akew, kon-oren to pay i biyag ja enshiy to engintegan.”
Dinem-at mowan nen Jesus i mepesamak ali son si-kato
31 Inpata-nil nen Jesus ira sota sampolo tan showa ja apostol to et a-abos sha ma. Jet kowan to son si-kara ey, “Itnengi jo iya ikowan ko son si-kayo. Ondaw kito shi Jerusalem et emin sota insolat ira nonta para padto nen Apo Shiyos nonta bayag da maypangkep nonta kowan sha ey Anak ni Too, metongpal son si-kak. 32 Tep may-ewatak so nonta ira aliwen kait tayon Hodiyos. Sengsengkiten sha-ak, bebaingan sha-ak, toptopsha-an sha-ak. 33 Sepsepdaten sha-ak pay, asan sha-ak bono-a. Nem no maykatdon akew, manbiyagak mowan.”
34 Nem sota ira too to, eg sha inewatan iyay, ta nay-emot i olog nontan na inkowan nen Jesus son si-kara. Eg sha amta nem ngantoy olog nonta inkowan nen Jesus.
Inpan-asas nen Jesus sota toon ekorab ja i-Jiriko
35 Idi nay-esop ma si Jesus shi Jiriko, wara ngoy toon ekorab ja timongaw nodta naykilig ni kalsara, ja emankekkekshaw. 36 Idi intenengan ton waray eshakel la toon eman-ekad shi kalsara, inbaga to, ja kowan to ey, “Ngaran ira niyay?”
37 Kowan sha son si-kato ey, “Si Jesus ja i-Nasarit, ondabas alid jay.”
38 Idi intenengan to iyay, kimeljaw ja kowan to ey, “Jesus! Kaasimak, si-kam ma mengibengon son Ari David nonta bayag da!”
39 Sota toon epangdo ey si Jesus, inseg-ang sha sota ekorab, ja kowan sha son si-kato ey on-eket. Nem mina-ma to et ja inkedsang toy keljaw to, ja kowan to mowan ey, “Kaasi-imak, si-kam ma mengibengon son Ari David nonta bayag da!”
40 Kimi-neng si Jesus et kowan to ey, “Shawat jo did jay.” Jet idi nay-esop ma sota ekorab, inbag-an to, 41 “Ngarantoy piyan mon itolong ko son si-kam?”
Kowan nonta ekorab ey, “Apo, pan-asas mowak, say man-esasak mowan.”
42 Kowan nen Jesus son si-kato ey, “Mebedin na man-esas ka ma. Sota pamatim son si-kak, si-katoy kabol la pan-esasan mo.”
43 Jet nontan, nan-asas shagos, jet nay-eshom ma son Jesus. Jet idi inon-an ira nonta eshakel la totoo, inshayaw sha ngos Apo Shiyos.