15
In-arigan nen Jesus ira ni showen arig pay say balang nem manbebawi ira ni basol sha
1 Idi sakey ya timpo, eshakel iray dimaw alin para singil ni bowis, tan sota eshom iren inbiyang ni karakdan tep kowan sha ey managbasol; dimaw ira son Jesus ja en nanteneng ni kowan to. 2 Jet sota ira Parisiyo tan mamaistoro ni dinteg ni Hodiyos, inkotot sha si Jesus, ja kowan sha ey, “Sajay ya too, inewat to ira sota totoon eshakel i basol sha, tan ekipengan pay son si-kara!”
3 Jet si Jesus, in-arigan to ira, ja kowan to ey, 4 “Kaspangarigan ey waray nankalniro son si-kayo ni sandasos, nem ma-etiw i sakey, ngantoy pesing jo? Eg jo aya idekjas nin sota siyam ma polo tan siyam ja kalniro nodta pastolan et jo enapen sota sakey ya kalniron na-atiw, ingkatod sepolen jo? 5 Jet no sepolen jo, sakbaten jon i-akad et man-imdeng kayo ma. 6 Jet no i-akad jod baley jo, ta-walen jo ira sota kagajem jo tan inaskang jo, ja kowan jo ey, ‘Mandaladsak kito, ta simpol ko sota kalnirok ka na-atiw!’ 7 Say kowan ko son si-kayo, inges niyay i pandadsak nonta anghil shi dangit no manbebawi i sakey ya toon eshakel i basol to, nem say sota siyam ma polo tan siyam ja maronong, ja eg mesepol la manbebawi.
8 “Kaspangarigan mowan ey waray bii ja waray sampolon palata to jet ma-etiw i sakey, ngantoy pesing to? Eg to aya enapen ja silwan shima emin na shogo? Si-si-an to pay i baley to, jet singpeten toy anap ingkatod sepolen to. 9 Jet no simpol to, ta-walen to iray kagajem to tan inas-askang to et ikowan to ey, ‘Mandaladsak kito, ta simpol ko sota palatak ja na-atiw!’ 10 Inges niyay i pandadsak nonta ira anghil nen Apo Shiyos no manbebawi i sakey ya toon eshakel i basol to.”
In-arigan ira nen Jesus ni arig ja sota ama, kinaasi-an to sota anak ton naynemneman
11 Si Jesus, intoloy to, ja kowan to ey, “Waray sakey ya too ja waray showen dakin potot to. 12 Sota orishiyan, kowan to so nen amesha ey, ‘Tatang, al-en ko sota tawid kon ibingay mo son si-kak.’ Jet sota amesha, timolok, jet inpanbingay to sota tawid so nonta ira showen potot to. 13 Idi edabas i pigen akew, sota orishiyan, indako to sota tawid to et dimaw shi arawin ili. Nem sota pilak to, kinasto to ni kaloko-an. 14 Binolbol ton emin sota oltimon pilak to, ey onsabi i bitil nodtan na ili ja dinawan to. 15 Jet sinodngan ton en eki-iyan shi sakey ya too nodtan na ili et inbetkag shen para pakan ni keshel. 16 Singa piyan to ngon mekikan ira nodta keshel, ta enshiy emengi-kan son si-kato ni kenen to. 17 Jet idi anongosto ma, naynemneman sotan na balodaki jet kowan ton shorog shi bakdang to ey, ‘Si amak, eshakel i toka pandagbo-in too et sobday shaka pankena. Nganto emoy naka ka-eg-ekangid jay! 18 Agpos et ngo ey on-oli-ak shi kadnan nen amak et nak manpasinsiya son si-kato. Ikowan ko ey nanbasolak son Apo Shiyos tan son si-kato. 19 Ikowan ko ey ekak maykeshin anak to; no diket angken ibilang towak ka sakey ya baga-en to.’ Kowan tod nemnem to. 20 Jet siya, dima-jat et on-akad ma ja on-oli son ameto. Nem idi nonta arawi pay laeng nodta baley sha, inimatonan nen ameton shagos et naysemekan. Kinano-an ton to inaspol et to inakdop et inongo-an to pay. 21 Kowan nonta anak to ey, ‘Tatang, nanbasolak son Apo Shiyos tan son si-kam. Ekak ma maykeshin anak mowak.’ 22 Nem say inpasing nonta ameto, kowan to so nonta baga-en to ey, ‘Kano-iyo, alejo di sota kamaptengan na baro et paibeshoyo! Singsingi jo pay, tan sapatosi jo! 23 Daw kayo, jo di shonshon sota kilaw wa baken inpatebayo et paltiyo! Piyasta-en tayoy inmotok ni anak ko! 24 Sajay ya anak ko, kowan ko nem etey, nem iyay gayam ma sibibiyag. Istay ya nan-atiw, nem iyay ya nay-oli di!’ Kowan nen ameto. Jet nayshogi may piyasta.
25 “Nontan na oras, wara sota pangodowan shi payew. Jet idi imesop med baley sha ni in-akad to, inteneng toy mosiko tan toon emandaladsak nodta naydaem ni baley. 26 Jet tinewal to sota sakey ya baga-en sha, ja kowan to ey, ‘Nganto ayay emankepasemak shi naydaem?’ 27 Kowan nonta baga-en ey, ‘Mimotok ali sota agim! Jet si tatang jo, inpalti-an to ni mateben baken kilaw, tep imoli alin sibibiyag.’ 28 Nem epaladoy bonget nonta pangodowan jet en-asneng nga onsekep. Sota amesha, bimo-day ali ja to inadok sota pangodowan ja onsekep ngon mekiladsak. 29 Nem sinongbatan to et si ameto, ja kowan to ey, ‘On-im kari mango! Pigen tawen na nan-ob-obda-ak ja singa baga-en mo! Enshi pay i taka sinopngilan! Jet ngarantoy in-akan mo son si-kak? Angken komen kekanshing, say wara koma ngoy pandadadsakan mi ni kagajem ko, nem enshi met! 30 Nem satan na potot mo, inomas toy kameng mo shi dinedokon aramid, asan may-oli di, jet niman, inpalti-an mo mango ni mateben kilaw!’ 31 Jet kowan nonta amesha ey, ‘Anak ko, wara ka son si-kak ni olay shiya baley jet emin na wara son si-kak, singa kowinta ey kokowam. 32 Mesepol la dag-en tayo iyay; pandadsak ka et, tep si agim, kowan ko nem etey, nem wara gayam ja sibibiyag. Istay nan-atiw, nem imoli di.’