6
Nanriri sota ira Parisiyo ni maypangkep nonta dingka ni too nen Jesus
1 Nonta akew ni ngilin ni Hodiyos, nanshalan si Jesus shi oma ja emola-an, jet sota ira too nen Jesus, ematod ira nonta naymola jet kinotim shen kinan. 2 Jet sota eshom iren Parisiyo, kowan sha son si-kara ey, “Apay nga joka dagdag-a itan ey kaiparit ni dinteg tayon Hodiyos i mengetod no akew ni ngilin?”
3 Si Jesus, simongbat ja kowan to ey, “Arig to ngo sota inpasing nen Ari David nonta bayag da ni inka-ekang to, tan sota ira too to. Apay eg jo aya amtay dingka to? 4 Dimaw shima tolshen baley ya para son Apo Shiyos et inda to sota tinapay ya naydaton son Apo Shiyos, jet kinan to. Jet in-aknan to pay ira sota too to. Sajay i dingka to anta nga nayparit son si-kato tan sota ira kait to i pengan sha nontan na tinapay ya naydaton son Apo Shiyos. Ta sota pari bengat i palobos sa mengan nontan na tinapay.” 5 Tan kowan pay nen Jesus ey, “Si-kak ja kowan nonta para padto nonta bayag da ey Anak ni Too, si-kak i mengikowan no ngantoy mebedin na dag-en no akew ni ngilin.”
Inpamapteng nen Jesus sota toon eki-ngoy
6 Idi sakey mowan na akew ni ngilin, dimaw si Jesus shi sa-nopan ni Hodiyos ja en nantoro. Jet nontan, naytompong ja wara nodtan i toon eki-ngoy i kanawan na takday to. 7 Sota mamaistoro ni dinteg ni Hodiyos tan Parisiyo, shaka si-siimi no waray ekasan to nontan na akew, tep kowan sha ey balang nem waray dag-en to ja ikowanan sha so ey nanbasolan to. Ta nayparit kono shi dinteg sha i pengekas no akew ni ngilin.
8 Nem si Jesus, amta toy wared nemnem sha, jet say kowan to nonta toon eki-ngoy i takday to, “Dayat ka et daw ka did ja sango.” Jet sota too, dimayat et dimaw nodtan.
9 Jet kowan nen Jesus so nonta ira emeniim son si-kato ey, “Nemnem jo kari iyay. Ngaaw aya i pandeka ni mapteng, ono pemiyag ni too, no timpon ngilin? Enshi: say ngaaw ja kaiparit ni dinteg tayo, sota pandeka ni ngaaw tan pemono.” 10 Insi-ning to iren emin, asan to ikowan nonta toon eki-ngoy i takday to ey, “Oyad mo ita takday mo.”
Pinati to sota kowan nen Jesus et mimapteng mowan na agpayso sota takday to. 11 Nem sota ira Parisiyo, ireka onbanonget et nantatabal ira nem ngantoy pesing sha son Jesus.
Pinidi nen Jesus sota sampolo tan showa ja apostol to
12 Nontan na timpo, dimaw si Jesus shi shontog ja en nanshawat ni sandabi son Apo Shiyos. 13 Idi na-akew, sina-nop to ali ira sota too to et pinispis toy sampolo tan showa son si-kara. Jet inngadnan to ira ja sampolo tan showa ni apostol to. 14 Sajay iray ngaran sha: si Simon ja inngadnan ton Pedro, tan si agin Pedro ja si Andres; tan say kait sha pay ja apostol, si Santiago, Juan, Felipe, Bartolome, 15 Mateo, Tomas, Santiago ja anak nen Alpio, si Simon ja bitirano, 16 si Judas ja anak nen Santiago mowan i ngaran to, tan si Judas Iskariote ja mengileko ali son Jesus shi anongosto.
Si Jesus, eshakel i intod-an ton too
17 Si Jesus, shimalong ja nay-olop so nonta apostol to et simalsheng ira nodta eshekdanan. Jet wara ngo ira nodtan i eshakel la too to, tan eshakel pay iray totoon edapod ili ni Jodia, Jerusalem, tan shi kilig ni baybay ja siyodad ja kowan sha ey Tira tan Sidon. 18 Dimaw iren en nanteneng ni kowan nen Jesus tan sha pay inpa-ekas i sakit sha. Angken sota ira toon pingketan ni dimonyo, dimaw ngo iren nanpa-ekas jet mimapteng ma ira. 19 Emin ira sota too, piyan shen pishaten si Jesus, ta makedsang nontan i panakabalin ton mengkal ni sakit, jet mimapteng iren emin.
20 Jet si Jesus, insi-ning to ira sota too ton eshakel et kowan to ey, “Si-kayon nankebiteg, bindisiyonan shakejo nen Apo Shiyos, ta mayda-kam kayod pantoshayan to! 21 Mebindisiyonan kayon nanka-agang niman, ta mepnek kayo di! Mebindisiyonan kayon emannengis niman ni daringit jo, ta mandadsak kayo di! 22 Mebindisiyonan kayo no okesen shakejo ono eg sha ikarin kait shakejo, ono bebaingan shakejo, ono ikowan sha ey ngaaw kayo tep too takejo. 23 Pan-imdeng kayo no sajay i mepesamak son si-kayo, ta ebadeg i naytalo shi dangit ja kon-oren jo ali. May-inges kayo nodta ira para padto nen Apo Shiyos nonta bayag da, ja pinedigat ngo ni too nontan da.
24 “Nem kakaasi kayon pasiya ja toon say kawad-an ni dadsak jo ket etopog shima kokowayo. Nam-ay i joka panbiyag! 25 Kayoka emepmepsel niman, nem wara diy timpon ma-ekang kayo! Kayoka mandaddadsak niman, nem wara diy timpon inangis joy daringit jo!
26 “Kakaasi kayo di no shakejoka i-et-etek tan ishayaw ni karakdan. Tep sota karakdan, enshiy semek sha so nonta ira toon Apo Shiyos. Angken nonta bayag da, sota ira sinan para padto ja o-owap i kowan sha, si-kara et ngo mowan i in-etek ni karakdan, jey aliwen sota koston inbetkag nen Apo Shiyos.
27 “Nem iyay i ikowan ko son si-kayon emengitneng son si-kak. Sota makakontra son si-kayo, semek jo mango tan dagejoy mapteng so ira nonta mengokes son si-kayo. 28 No waray mengi-ebig son si-kayo, ikowan jo ey, ‘Si Apo Shiyos komay ontolong son si-kam.’ Irewati jo son Apo Shiyos ira sota ememedigat son si-kayo. 29 No waray menengpel ni tamil mo, itodok mo pay ya angken pinshowa-en tod piig. No waray mengeda ni jakit mo, itodok mo pay ya angken al-en toy barom. 30 No waray manbeka son si-kam, i-kan mo son si-kara i piyan sha. Tan no waray indaren kokowam, angken eg mo en odi-en. 31 Sota piyan jon pesing ni eshom son si-kayo, si-kato ngoy pesing jo son si-kara.
32 “No say ensemek jo bengat ket sota toon ensemek shakejo ngo, eg shakejo i-etek nen Apo Shiyos. Ta sotan met laeng i kepesing ira nonta enshiy pamatira son Apo Shiyos. 33 No say dag-anan mo so bengat ni mapteng ket sota ira toon mapteng i shaka pesing son si-kayo ngo, eg shakejo i-etek nen Apo Shiyos. Ta angken sota ira enshiy pamatira son Apo Shiyos, mapteng i shaka pesing so ni kait sha. 34 Tan no say pebodoran jo bengat ket sota joka namnama ey i-oli to, eg shakejo i-etek nen Apo Shiyos. Ta angken sota ira enshiy pamatira, ireka emanbibinodod, jet odi-en sha met laeng sota kabebilang to! 35 No waray kowan to ey memodod son si-kayo, pabodori jo ira, angken eg to i-oli. Semek joy makakontra son si-kayo, tan mapteng koma mangoy pesing jo son si-kara. Ta no satan i pesing jo, joka pan-ipa-sas ey annak shakejo nen Apo Shiyos ja Kangeto-an. Ebadeg i kon-oren jon isobadit nen Apo Shiyos tep si Apo Shiyos, mapteng i toka pesing ni emin na too, angken sota eg man-iyaman son si-kato tan sota makedsel. 36 Kaasi-i joy eshom ja inges toy kepesing nen Apo Shiyos!
37 “Karejo nemnemen i nankamali-an ni eshom ja si-katoy pengikowanan jo ma ey ngaaw ira, say eg ngo ikowan nen Apo Shiyos ey ngaaw kayo. 38 I-akniyo iray eshom et si Apo Shiyos i mengi-kan ngo son si-kayo. Sota karakel ni joka i-akan, si-kato ngoy karakel ni i-akan nen Apo Shiyos son si-kayo. Nem i-aknan tokejo ni sobda, ja angken iteded jo tan itelneg jo, onja-bis pay ali shi sango jo.”
39 Si Jesus, in-arigan to ira, ja kowan to ey, “Say toon ekorab, mebedin ayen mengibalnay ni kait ton korab? Eg ira aya ma-kas sa showa shi pel-og? 40 Waray nandasinan nonta maistoro nem say sota man-ashal, jet sota man-ashal, toka onoray kaitoro ni maistoro. Jet no meksheng may ashal to, man-inges ira ma nonta maistoro.”
41 In-arigan to pay ira ja kowan to ey, “Apay nga sota ootik ka naybosi shi mata ni kait mo i moka iningning, ey si-kam ma mismo ket eg mo nemnemen ey ebadeg i naypadkal shi matam? 42 Na-alas ja mo ikowan so ni kait mo ey a-kalen mo sota naybosi shi mateto, ey si-kam ket ebadeg i naypadkal shi matam ma shorog. Ngaaw ita moka pesing ja moka idibak i ngaaw wa nemnem mo! Ekal mo nin sota mismon naypadkal shi matam say kosto may pan-esas mo, et say asen mo men pasiya sota a-kalen mon naybosi shi mata ni kait mo.
43 “Sota molen ngaaw, eg ondames ni mapteng, nem say mapteng nga mola, mapteng ngoy dames to. Jet sota ngaaw wa mola, ngaaw ngoy dames to. 44 Emin na mola, ma-amta-an i kalasi to no ondames. Sota kowan sha ey higos, say dames to ngo, higos; aliwen medepod sebit. Tan eg meboshas i kowan sha ey obas shi kompormi. 45 Sota mapteng nga too, mapteng ngoy wared poso to jet si-kato ngoy toka dagdag-a. Nem say toon ngaaw, ngaaw ngoy wared poso to et ngaaw ngoy aramid to. Ta sota wared nemnem ni too ni olay, si-kato ngoy onbo-day shi bongot to ja esel.
46 “Apay nga kayoka mengewag ey apo jowak, nem sota naka ikowan ket eg jo met tongpalen? 47 Emin ira sota ondaw alin piyan ton manbedin ni took, no itenengan toy esel ko, tan pati-en to, 48 may-eshig shi toon engitowen ni baley tod naypilmin bato. Kinaotan toy naydeshek et intowen toy tokod to nodtan na naypilmin bato. Idi nandayos ali ni makedsang, nanshalan nodta baley, nem eg to tinowang, tep na-det i naytowenan nonta tokod to. 49 Nem sota toon intenengan toy kowan ko, nem eg to pati-en, may-eshig shi toon engitowen ni baley tod bo-day ja enshiy naytowenan ni tokod ton na-det ta bato. Idi nandayos ali, nanshalan nodta baley i shanom jet shinepos ton shagos jet kolpin epilshi sota baley.”