2
Nay-anak si Jesus
1 Nonta timpon inkay-anak nen Juan, naytompong ngon waray inbilin nen Ari Agusto ey mesepol la emin na tood dobong, manpedista ira. 2 Sajay i pilmiron sinsos ja na-amag nonta timpon kagobinarol nen Kirino shi Siria. 3 Jet emin ira sota too, dimaw ira ja nanpalista, ja tinonton shay edapo-an ni apo sha. 4,5 Isonga si Jose, dima-jat ngo shi baley tod Nasarit ja ilin Galilia et dimaw shi Bitlihim ma ilin Jodia, ja kawad-an nen Ari David nonta bayag da. Shiman i dinawan nen Jose ja nanpalista-an tep poli nen Ari David. Nan-olop ira nen Maria, ja naykarin esaw-en to et naytompong ngon malokon nontan si Maria. 6 Jet nonta wara ira med Bitlihim, simabi sota timpo malen i-anak nen Maria. 7 Jet say in-anak to, daki, ja si-katoy besag. Dinampinan to et inparokol tod panganan ni animal. Sinodngan to iyay tep enshiy mebedin na ka-okipan sha nodta baley ya koston shiwesan.
8 Nontan na dabi, wara iray emanbantay ni kalniro shi bodosan ja nay-esop shi Bitlihim. 9 Jet nontan, nanpa-sas i sakey ya anghil nen Apo Shiyos son si-kara. Jet sota niyal ja edapo son Apo Shiyos, sinilwan to ira et etakot iren pasiya. 10 Nem kowan nonta anghil ey, “Karekayo ontakot! Dimawak alin mengikowan ni mapteng nga shamag son si-kayo, jet saja ikowan ko, pan-imdengan ni emin na totoo. 11 Niman na dabi, nay-anak sota Apo tayon inkari nen Apo Shiyos nonta bayag da ja en ali mengisedakan son si-kayo. Say nay-anakan to, shi Bitlihim ja ili da nen Ari David. 12 Say pengimatonan jo so, edampinan sota nga-nga, ja nayparokol shi panganan ni animal.” Kowan nonta anghil.
13 Idi naksheng nga inkowan to iyay, shimakel i anghil shi naykayang ja emengikankansiyon ni shayaw sha son Apo Shiyos, ja kowan sha ey, 14 “Si Apo Shiyos ja wared dangit i mayshedjaw! Jet niman, iyed jay i mengi-kan ni talna shiya dobong so nonta ira toon kinosto-an to.”
15 Idi imoli ira sota anghil shi dangit, nantatabal ira sota emanpastol ni kalniro, ja kowan sha ey, “Ondaw kito ka ngarod shi Bitlihim, tayo asen sota nay-anak ka nga-nga ja inpa-amta nen Apo Shiyos son si-katejo.”
16 Kinano-an shen dimaw shi Bitlihim et simbira si Maria tan si Jose et inon-an sha sota nga-ngen inparokol shed panganan ni animal. 17 Idi inon-an nonta emanpastol ni kalniro sota nga-nga, inkowan sha son Maria nen Jose sota inkowan ni anghil maypangkep niyay ya nga-nga. 18 Jet emin ali ira sota engitneng ni inkowan nonta emanpastol ni kalniro, nasshaaw iren pasiya. 19 Nem si Maria, eg to dibkan iyay ya epalabas, no diket ninemnemnem to ni olay.
20 Imoli ira sota emanpastol ni kalniro, ja ebadeg i iyaman sha so nen Apo Shiyos maypangkep nonta emin na intenengan sha, tan inon-an sha, tep etongpal sota inkowan ni anghil son si-kara.
Indaw sha si Jesus shi Timplo
21 Idi edabas i walon akew ni inkay-anak nen Jesus, dingkara sota ogadi ni Hodiyos ja shaka pesing ni may-enak ka daki, ja kowan sha ey kogit. Jet inpanngaran sha ni Jesus, tep nonta eg pay naydokon sota nga-nga, inkowan nonta anghil ey Jesus i ingaran sha so nonta nga-nga.
22 Nonta shimanon sota timpon penongpalan shi Jose nen Maria nonta dinteg nen Moises maypangkep ni biin ipan-anak to, ja kowan sha ey purification, indaw sha iyay ya nga-nga shi Jerusalem say maybidang ey i-awat shay biyag to son Apo Shiyos. 23 Sajay i inpasing sha tep say naysolat shi dinteg nen Apo Shiyos, “Emin na anak ni Hodiyos ja pangodowan na daki, mesepol la maybidang nga para son Apo Shiyos.” 24 Si Maria tan si Jose, ira engi-kan ni daton sha tep say kowan ni bilin nen Apo Shiyos, mesepol la mengi-kan ira ni daton shen sanparis ja kalopati.
25 Jet nontan, waray tood man ja si Simeon i ngaran to ja nanbaley shi Jerusalem. Makedsang i pamati to son Apo Shiyos, tan eshayaw ey mapteng nga too. Jet toka sesseskera i ketongpal nonta kari nen Apo Shiyos ey waray ibetkag ton mengisedakan ni tood Israel. Jet say Ispirito Santo nen Apo Shiyos, wara son si-kato. 26 Sota Ispirito Santo nen Apo Shiyos, si-katoy engi-kan ni namnama to ey eg nin metey ingkatod on-an to sota naypadto nonta bayag da ey ibetkag ali nen Apo Shiyos ja mengisedakan. 27 Intorong ni Ispirito Santo si Simeon shi Timplo et nontan na akew, indaw ngo nen Maria tan si Jose sota anak sha shi Timplo say dag-en sha sota kowan ni bilin nen Apo Shiyos. 28 Jet si Simeon, inakwal to sota nga-nga asan eman-iyaman so nen Apo Shiyos ja kowan to ey, 29 “Niman Apo Shiyos, tinongpal moy karim et wara ma son si-kak i talna. Si-kak ja baga-en mo, palobosimak ja metey ma, 30 tep inon-an niya showen matak ma i inkowan mon mengisedakan ali, 31 ja si-katoy insaganam ma para so ni emin na totoo et si-katoy pengamta-an sha ni pesing shen maysedakan. 32 Si-katoy may-eshig ga silew ja ondawag ni toon eg maka-amta son si-kam Apo Shiyos, tan si-katoy mengi-kan ni kayshedjawan ni toom ja Israel.” Sajay i iyaman nen Simeon.
33 Sota ama tan ina nonta nga-nga, nasshaaw ira nonta inkowan nen Simeon ni maypangkep niyay ya nga-nga. 34,35 Jet kowan pay nen Simeon ey, “Si Apo Shiyos i onbindisiyon son si-kayo. Jet iyay i ikowan ko son si-kam ja ina niya nga-nga. Sajay ya nga-nga, shinotokan nen Apo Shiyos et si-katoy panshoki-an ni pandilinasin ira ni tood Israel. Eshakel i mengokes son si-kato, tan eshakel ngoy memati son si-kato ni pansigshan sha, tep idawdawag toy ngaaw wa nemnem ni eshakel la too. Maydesin ey wara son si-kato si Apo Shiyos, nem bedawen ni eshom. Jet si-kam ja ineto, sajay ya ibalaw sha di son si-kato, si-katoy kesekitan ni posom.”
36-38 Waray biin para padto ja eba-kol ja si Ana i ngaran to. Anak nen Panoil, ja poli nen Asir. Nontan met laeng nga oras, mimotok sota eba-kol nodta kawad-an sha et nan-iyaman so nen Apo Shiyos maypangkep nonta nga-nga, jet to inkowan i maypangkep nontan na nga-nga so ira nonta kait ton emansessesked so nonta ibetkag ali nen Apo Shiyos ja mengisedakan ni tood Jerusalem. Saja eba-kol, piton tawen na ekibiyag son asewa to da nonta kamashikit to et niman, ebalo. Nantawen ni walon polo tan epat. Wara ni olay shima Timplo; inakew tan dinedabin toka ibiyang i pangan to ni toka panshewat son Apo Shiyos.
39 Idi naksheng nga tinongpal shen emin sota kowan ni bilin nen Apo Shiyos ey dag-en sha, imoli ira shi Galilia, shi baley shed Nasarit. 40 Sota nga-nga, bima-deg, tan kimedsang. Enemneman ma, tep tinodongan nen Apo Shiyos.
Ekitongaw si Jesus so nonta ira mamaistoro shima Timplo
41 Tinaw-en ja sota ama tan ina nen Jesus, ireka ondaw shi Jerusalem ni timpon piyasta ni Hodiyos ja kowan sha ey Paskowa. 42 Nonta nantawen si Jesus ni sampolo tan showa, dimaw ira mowan shi Jerusalem ni timpon piyasta. 43 Idi naksheng sota piyasta, dima-jat iren on-akad shi baley sha ma, nem eg amta nen Maria tan si Jose ey edekjas si Jesus shi Jerusalem. 44 San-akew ja nan-akad ira ja eg sha dindinmo ey ayshi si Jesus. Kowan sha nem eki-odop nodta kagait sha, nem idi sha inena-enap nodta kad-an ni kagajem sha tan partido sha, ayshi gayam. 45 Jet idi eg sha simpol, nay-oli ired Jerusalem et sha inenap. 46 Idi maykatdon akew, simbira shi Timplo, ja ekitongaw so nonta ira mamaistoro ni Timplo. Toka itentenengiy kowan sha et nansalodsod ngo son si-kara. 47 Jet emin ira sota engitneng ni daing ton onsongbat so nonta ira mamaistoro, nasshaaw iren pasiya.
48 Si Maria tan si Jose, nasshaaw ngo ira ni in-asas sha so et kowan nen ineto ey, “Anak ko, apay nga dingkam iyay son si-kami? Si amam tan si-kak, eshanagan kamin pasiya ni ana-anap mi son si-kam.”
49 Kowan nen Jesus son si-kara ey, “Dimaw kayo gayam ali ja jowak kepan-enapa? Eg jo aya amta ey mesepol la man-iyanak shi baley nen Amak?”
50 Nem eg sha inewatan sota kowan to son si-kara.
51 Jet si Jesus, ekidaw son si-kara ja imakad shi Nasarit, ja toka pati-en emin i kowan sha son si-kato. Si ineto, emin iyay ya banag, toka nemnemnema shi poso to.
52 Si Jesus, bima-deg, makedsang, tan enemneman tep si Apo Shiyos, wara son si-kato, jet eshakel i toon makapiyan son si-kato.