13
Indawag nen Jesus sota maypangkep ni pantepos ni dobong
1 Idi bimo-day si Jesus shi Timplo, imesel i sakey ya too to, ja kowan to son Jesus ey, “Apo, nankemapteng ira ja balbaley shiya nandiniked ni Timplo, tan memapteng ima engkakembaleg ga bato ja nay-amag shiyay! On-im, apo!”
2 Nem si Jesus, simongbat son si-kato, ja kowan to ey, “Owen, bisnayo niman ira ja mapteng nga baley. Tep wara aliy timpon onsabi ja angken sakey so ira nima baton mapteng i inkay-amag to, enshiy en mebay-an shima nay-amagan to; mesheshal la emin.”
3 Idi pinsak ja wares Jesus ja timongaw shima shontog ja kowan sha ey Olibas, ja naymamang nodta Timplo, abos nen Pedro, si Santiago, si Juan, tan si Andres, jet insho-petan sha si Jesus, ja kowan sha ey, 4 “Piyan min amta-en no pigan ali ita kowan mo ey kesheshal niya Timplo. Tan nganto pay i amta-an mi so ey shanshanin mepesamak itan?”
5 Simongbat si Jesus ja kowan to son si-kara ey, “Nemnemnem jo koma iyay. Karekayo pa-olbod so ni angken sipa, 6 ta eshakel aliy toon mengosal ni ngaran ko, ja ikowan sha ey si-kara si Cristo, jet eshakel noman i totoon may-owapan. 7 Jet wara pay i mismon mankokobat ja itenengan jo, tan waray shemagen jon kobat shi eshom ma ili. Nem karekayo meshanagan. Tep kenshat ta mepesamak ira jay, nem aliwen sotan i ka-amta-an to ey shanshani may pantepos ni dobong. 8 Angken ili tan ili, mankobat ira, jet angken pay sota ka-ili-ilin intorayan ni a-ashi, mankokobat ngo ira. Wara pay i jegjeg shi kedogadogad, tan epaladon bitil. Nem emin iyay ya mepesamak, sajay i panshoki-an bengat ni digat.
9 “Pantanshaan kayo, ta waray eshom ma totoo ja mengidaw son si-kayo shi oskaro. Tan angken shima sa-nopan sha, sepsepdaten shakejod man pay. Jet ikoyod shakejo pay shi sango-an nonta ira gobinarol, tan sango-an nonta ira ari, ta too takejo. Jet sotan i waya jon mengiringan na mengikowan son si-kara ni maypangkep son si-kak. 10 Jet sota mapteng nga shamag maypangkep ni pantoshayan nen Apo Shiyos, maypedawag shi emin na ka-ili-ili asan kesabi may pantepos ni dobong. 11 No ma-shel kayo ja mebistigal shi oskaro, karekayo meshanagan no ngarantoy isongbat jo son si-kara, no diket sota maypa-amta met laeng son si-kayo nontan na oras ja shakejosoka pan-ibag-i, sotan i isongbat jo. Ta aliwen si-kayon mismo i onsongbat so, no diket sota Ispirito Santo nen Apo Shiyos.
12 “Jet sajay alin timpo, angken san-agin daki, ibaag nonta sakey i agi to shi eshom, ey eg et meshanagan ey bono-en sha. Inges niyay met laeng i pesing ni a-ama shi annak sha. Jet angken sota ira a-anak, kontra-en shay maka-anak son si-kara et pebonora pay ira. 13 Jet angken si-kayo, sota joka pemati son si-kak, si-katoy kabol la okesan shakejo so ni karakdan na too. Nem sota mengitoded ni angken nganton digat ja onsabi son si-kato, si-katoy maysedakan.
14 “Jet on-an jon mepesamak sota naypadto nonta bayag da ja kowan sha ey ‘Kataktakot alin ondogit’. Jet isaad toy toray shi dogad ja enshiy kanebengan ton man-iyan. (Sota memasa niyay, ewatan to komay kaytoshongan niya kowan nen Jesus.) No on-an jo iyay, say pesing koma ira nonta naytompong nga wared Jodia, onbetik ira et ja manbakwit shi shonshontog. 15 Sota toon maytompong nga man-adibay shi bo-dayan, eg to koma nemnemen ja onsekep shima baley to ja en mengeda nonta kompormin wara nodta naydaem ni baley. 16 Kasta met sota wared payew, eg koma mesiwat ni aleto nonta insepa ton baro to. 17 No timpon kepesamak niyay, kakaasi ira din pasiya sota bibiin malokon, tan sota bibiin waray anak shen emenoso. 18 Irewat jo son Apo Shiyos ey eg koma mepesamak iyay ni timpon powek, say mariwes i pemtik jo. 19 Ta sotan alin digat ja onsabi, enshiy to kay-ingesan nodta ira digat ja epaspasemak, manipod nonta pinalsowa nen Apo Shiyos iya dobong ingkato niman. 20 No eg ninemnem nen Apo Shiyos ey tikeyen to iyay alin digat, istay angken sipen too, enshiy mebay-an na mebiyag. Nem si Apo Shiyos, tikeyen to iyay ya digat, ta toka isakit ira sota too ton pinidi to, ja i-okong ton para si-kato.
21 “Sotan alin akew, no waray mengikowan son si-kayo ey amtaray kad-an nen Cristo, ja kowan sha ey jo asen, karejo patpati-en. 22 Ta eshakel aliy toon kowan sha ey si-kara si Cristo, ono kowan sha ey si-karay para padto nen Apo Shiyos, jet eshakel i dag-en shen kaskasshaaw wa aramid ono milagro. Jet no mebedin, kowan sha pay ey i-owapan sha ira sota too nen Apo Shiyos ja pinidi to. 23 Nem tanshaaniyo ira jay! Naka pan-isigod iya banshaan son si-kayo say amta-en joy mepesamak ali.
24 “Jet no onsabi sotan na timpo ja kekshengan nonta digat, ma-shep shagos sota niyal ni sekit tan bolan, 25 jet sama talaw, mepedaspas ira, jet mebediwan i itsora nima naykayang. 26 No meksheng iyay, mismon asen sha-ak ni totood dobong ja ma-odopanak ali ni kolpot, tan asen sha pay i itsora ni bakdang kon emenenili, tan asen sha ngo sota ebadeg ga panakabalin ko. 27 Jet ibetkag ko iray anghil ko ja mengolnong ira nonta pinidik ja took shi emin na sakop niya dobong, shi angken towen dogad.”
28 Jet si Jesus, arig mowan i inpasing ton engilewag nonta idaw to mowan ali, ja kowan to ey, “Nemnem jo kari sota kadasan na kowan sha ey higos. Shiya kad-an tayo, no asen jon ondongkey sota panga to, asan somimit mowan i bolong to, amtayo ma ey shanshani sota timpo ni petang. 29 Inges niyay aliy i-olik. No asen jon emanketongpal ira ja inkowan ko la, amtayo ma ey sota timpon idaw ko ali, shanshani ma, ja singa wara-ak nodta pasbol. 30 Podno iyay ya ikowan ko son si-kayo. Saja ira too niman, eg ira nin metey, no diket sa-kopen shen emin ira jay ya mepesamak ali. 31 Sama naykayang tan saja dobong, mebedin na ma-enshi, nem saja esel la inkowan ko, kenshat ta metongpal, ja eg ma-enshi.
32 “Nem si Apo Shiyos bengat i maka-amta no pigan i ketongpal niyay ya inkowan ko la. Angken sama anghil shi dangit, tan si-kak ja Anak nen Apo Shiyos, eg mi ngo amta. 33 Isonga pantanshaan kayo; mesepol la esagana kayo ni olay, mesepol la manshewat kayo ni olay son Apo Shiyos. Ta eg jo amta sotan alin timpo ja idaw ko di. 34 May-eshig i kasesaad jo nodta baga-en nonta baknang. Sota baknang, waray dawan ton nay-arawin ili, isonga indekjas to sota baley to et sota ira baga-en toy maka-amta so. In-epeng toy obda son si-karen emin et inbilin to ey sota para dekeb ni baley, singpeten ton manbantay ni baley. 35 Sajay i kay-eshigan jo, isonga mesepol la esagana kayo ni olay, ta eg jo amta nem pigan aliy imotok nonta apo jo—no mama-shem, ono kawa ni dabi, ono nem ikagang ni manok ni daem, ono agsapa. Isonga pan-alisto kayo, 36 say no bilang ey onmotok sota Apo jo ni palibdibag, eg tokejo sa-kopan na na-ogip.
37 “Saja ikowan ko son si-kayo, emin na tooy naka pengikowani so: pansagana kayo ngarod!” Sajay ya emin, inkowan nen Jesus.