11
Edadsak i totoo nonta mimotok si Jesus shi Jerusalem
1 Nonta nay-esop ma shi Jesus shi Jerusalem ja wara ira shima dogad ja kowan sha ey Bitpag tan Bitania, ja osshong ni shontog ga kowan sha ey Olibas, engibetkag si Jesus ni showen too ton mepangdo, 2 jet inbilin to son si-kara ey, “Daw kayod ma dogad ja naysongbob et no onmotok kayo, waren shagos i asen jon kilaw ni animal la donkey, ja naypagod. Sajay ya kilaw, eg pay laeng ekabkabajo-an. Okasiyo et alejo did jay. 3 No waray mengibeka son si-kayo no ngantoy joka pan-okasi so, ikowan jo ey, ‘Si Apo Jesus, mesepol to jet pai-odi to met laeng alin shagos.’ Satan da i ikowan jo son si-kara.”
4 Jet siya, dimaw ira sota shadwa et simbira nga agpayso sota donkey ja naypagod shi kalsara ja nay-askang shi sakepan ni sakey ya baley, jet inokasan sha. 5 Jet naytompong nga waray too nodtan et kowan sha so nonta shadwen too nen Jesus ey, “Ngantoy? Joka pan-okasi ita kilaw?”
6 Jet insongbat sha sota inbilin nen Jesus ey isongbat sha, jet intolok ira nonta engibeka son si-kara i i-ala sha so nonta kilaw. 7 Jet indaw sha sota kilaw son Jesus et sota ta-kep ni baro sha, in-ap-ap sha nodta beneg ni donkey et nankabajo si Jesus. 8 Sota ira ngo eshakel la totoo, in-ap-ap sha ngoy baro sha nodta kalsaren panshalnan nen Jesus. Sota ira eshom, ira engala ngo ni emolong nga panga ni kadasan et in-ap-ap sha nodta kalsara. 9 Sota ira totoo ja epangdo ey si Jesus, tan sota ira na-onod, ireka onkaneljaw, ja kowan sha ey, “Salamat son Apo Shiyos tep inbetkag to di iya toon mengisedakan! Bindisiyonan to koma! 10 Iyay ali sota toon naypadto nonta bayag da ey mengibengon ni inpantoray nen Ari David ja apo tayo da! Bindisiyonan nen Apo Shiyos i pantoshay to di! Salamat son Apo Shiyos ja Kangeto-an!”
11 Idi mimotok si Jesus shi Jerusalem, simekep nodta Timplo, jet idi naksheng nga inon-an ton emin i wared bo-dayan ni Timplo, nan-o-odop si Jesus tan sota ira sampolo tan showen apostol to, jet dimaw ired Bitania, tep edabi ma.
Sota inpasing nen Jesus so nonta kadasan na eg ondames
12 Idi agsapa, ja eman-ekad si Jesus ja edapo ali shi Bitania, naytompong nga na-agang nontan. 13 Inon-an tod naybetaw i kadasan na emolong. Dimaw say to on-an nem waray sepolen ton dames to, nem idi onsabi, enshi gayam i dames to; bolong bengat i wara. Tep aliwen timpon idames to. 14 Jet kowan to ey, “Si-kam ma kadasan, manipod niman ingkatod ingka, polos sa enshiy en namtan ni too ja dames mo!” Jet intenengan ira nonta too to iyay ya inkowan to.
Shinagshag nen Jesus ira sota emandeko nodta Timplo
15 Nay-oli ired Jerusalem et dimaw mowan si Jesus nodta Timplo. Jet emin ira sota emandeko nodtan, tan emenongkal, shinagshag to iren inpabo-day. Jet tino-to-dang to pay ira sota damisaan ira nonta emena-dat ni pilak, tan sota tongawan ira nonta emandeko ni kalopati. 16 Jet eg to intolok i pengegshi ni kompormin dako shi bo-dayan ni Timplo. 17 Jet intod-an to ira ja kowan to ey, “Say kowan nonta esel nen Apo Shiyos ja naysolat nonta bayag da, kowan to ey sajay ya baley nen Apo Shiyos, nayngadnan ey si-katoy panshewatan ni emin na totoo son si-kato, nem inpanbalin jo et ni singa amotan ni tolisan!”
18 Shinemag ira nonta apo ni papashi ni Hodiyos tan mamaistoro ni dinteg ni Hodiyos iyay et pineshas shen enganap ni pesing shen memono son Jesus, tep ireka manshanag ey si Jesus i kabol ni eg sha ma so ira pati-an ni karakdan kabol ni na-awisan sha nonta toka pan-itoro.
19 Idi shanshani men medebi, si Jesus tan sota ira too to, bintikan shay siyodad ni Jerusalem.
Say kasapolan na pasiya, sota pamati son Apo Shiyos
20 Idi nonta agsapa mowan ja shaka pankedabasi nodta kadasan na enshiy dames to, inon-an shen nakkit ta emin sota kadasan, pati damot to. 21 Ninemnem nen Pedro sota inkowan da nen Jesus so nonta kadasan et kowan to son Jesus ey, “Apo, asas mo kari! Nakkit sota kadasan na in-abigan mo.”
22 Simongbat si Jesus ja kowan to ey, “Pamati kayo son Apo Shiyos. 23 Agpayso iya ikowan ko son si-kayo. Angken sipen too, no memati son Apo Shiyos ey tongpalen to sota ishawat to son si-kato, ja enshiy showashowa to, sigoradon eg nagshengan i mebedin ton dag-en. Mebedin na ikowan to niyay ya shontog ey ma-tan shorog ja ondaw shima baybay et mayto-to-wen medeka. 24 No ngantoy ibaga jo so nen Apo Shiyos, ewaten jo, no enshiy showashowa jo nonta panakabalin ton mengi-kan son si-kayo.
25 “Jet no maramen kayoka manshewat son Apo Shiyos, ey waray nemnemen jon eg jo kosto ja inpasing ni eshom son si-kayo, mesepol la pekawanan jo sotan na too, say si Apo Shiyos ja Amejo shi dangit, pekawanan to ngoy nanbasolan jo. 26 Nem no eg jo pekawanan ira sota toon waray nanbasolan sha son si-kayo, si Apo Shiyos ja Amejon wared dangit, eg tokejo ngo pekawanan ni nanbasolan jo.”
Sinongbatan nen Jesus sota ira eg makakosto ni dingdingka tod Jerusalem
27 Idi mimotok ma ira mowan shi Jerusalem, dimaw shima Timplo, jet idi emanpasiyal si Jesus shima bo-dayan ni Timplo, en simbi nonta ira apo ni papashi tan sota mamaistoro ni dinteg tan sota ira eshom ma pangolo ni Hodiyos. 28 Kowan sha son si-kato ey, “Sipay engikowan ey dag-en mo ira ta moka dagdag-a shiya Jerusalem? Sipay engibetkag son si-kam?”
29 Simongbat si Jesus ja kowan to ey, “Ibag-an takejo nin, jet no songbatan jo ni kosto iya salodsod ko, mebedin na ikowan ko son si-kayo no sipay engibetkag ali son si-kak ja mandeka niyay. 30 Ikowan jo son si-kak nem sipay engibetkag so nen Juan ja en memonjag nontan—nemnem to ngo shorog, ono inbetkag ali nen Apo Shiyos? Songbati jowak ka.”
31 Nem sota ira pangolo ni Hodiyos, nantatabtabal ira ja kowan sha ey, “No ikowan tayo ey si Apo Shiyos, mesampolo kito tep ikowan to ey, ‘No kasta, apay nga eg jo ngarod pinati si Juan?’ 32 Nem no isongbat tayo ey nemnem ngo nen Juan, ngaranto ma?” (Ta sota ira pangolo ni Hodiyos, entakot sha ira sota karakdan na totoo tep shaka pati-en pasiya ey si Juan ket podnon inbetkag ali nen Apo Shiyos ja para padto.) 33 Jet say songbat sha so nen Jesus, kowan sha ey, “Tawey, eg mi amta no sipay engibetkag so nen Juan ja memonjag.”
Jet kowan ma nen Jesus ngo son si-kara ey, “Angken si-kak ngo, ekak ikowan son si-kayo no sipay engibetkag son si-kak ja mandeka niya naka dagdag-a niman.”