7
Inkowan nen Jesus i ngaaw wa aramid nonta ira Parisiyo
1 Sota ira Parisiyo tan sota eshom so nonta ira mamaistoro ni dinteg ni Hodiyos ja edapod Jerusalem, ira nay-aspol son Jesus. 2 Inon-an sha sota eshom so nonta too nen Jesus ja ireka mengan ey eg ira nin nanbolo, jet shaka pan-inemnem ey edogit mala iren too. 3 Tep emin na Hodiyos—agdalo iray Parisiyo—ampet manbodo ira nin asan ireka mangan, tep shaka patkin pasiya sota ogadin inbangon ni apo sha nonta bayag da. 4 No mepewil ired malkaro, ampet odsan shay bakdang sha asan ireka mangan, ta shaka ibilang ey waray edogit ta naypeket son si-kara alid malkaro ja kawad-an ni eshakel la totoo. Eshakel pay i shaka on-onora ja ogadira: kaspangarigan sama ira maypangkep ni ki-wan ni tasa, takori, tan kambang. 5 Isonga inbag-an ira nonta Parisiyo tan mamaistoro ni dinteg si Jesus, ja kowan sha ey, “Apay nga sama ira toom ket eg sha pati-en sota sigod ja ogadi nonta bayag da? Ireka mengan ey eg ira nin manbodo.”
6 Si Jesus, sinongbatan to ira ja kowan to ey, “Si-kayo ngon toon kowan to ey wara son Apo Shiyos ni emin na poso to nem waray pangkep jon ngaaw! Agpayso ey si-kayo sota kaytoshongan nonta padto nen Isaias nonta bayag da ja esel nen Apo Shiyos met laeng, ja kowan to ey,
‘Sajay iren too, shi bongot bengat i engintegan ni shaka panshedjaw son si-kak, nem shi nemnem sha, arawi son si-kak. 7 Enshiy silbi ni shaka panshedjaw son si-kak, tep say shaka itodtoro ni olay, sota edapo met laeng shi nemnem ni si-karen too, asan sha mango ikowan ey bilin kono nen Apo Shiyos.’ Kowan ni esel nen Apo Shiyos ja naypadto.
8 “Jet si-kayo, joka ibiyang sota koston bilin ja edapo son Apo Shiyos, ey joka et ngo mowan nemnemnema i ogadi ni too!”
9 Inkowan pay nen Jesus son si-kara ey, “Kayoka takal ja mengibiyang ni koston bilin ja edapo son Apo Shiyos, say kowan jo ey ki-detan joy ogadiyo! 10 Kaspangarigan say sakey ya bilin nen Apo Shiyos ja joka ibiyang, sota kowan to ey, ‘Shayaw mo si amam tan si inam’, tan sota kowan to pay ey, ‘Sota toon ngaaw i toka ikokowan so nen ameto ono si ineto, kenshat ta mebono.’ 11 Nem si-kayo, say joka itoro, kowan jo ey mesepol la ibiyang ni too si ameto ono ineto, no ikowan to ma son si-kara ey, ‘Sota istay i-akan ko son si-kayo ja panbiyag jo koma, si-kato ma niman sota kowan sha ey Korban, tep indasin kon maytodong shi Timplo.’ 12 No sotan i ikowan ni too son ameto ono si ineto, joka iparit i penodong to ma son si-kara. 13 Isonga sajay ya joka pengonod ni ogadiyon joka itoro, inpaskit jo nodta koston bilin nen Apo Shiyos, ja singa enshiy silbi to. Jet aliwen sajay bengat, no diket eshakel i kait niyay ya ngaaw wa joka dagdag-a ni olay!”
14 Jet si Jesus, tina-wal to ira sota totoo ey ondaw ira di son si-kato jet kowan to son si-kara ey, “Itnengi jon emin iyay ya ikowan ko son si-kayo jet awatiyo. 15 Kowan ira nonta Parisiyo ey basol kono no eg kito manbodo asan mangan, ja si-katoy ondogit so ni nemnem. Nem aliwen sota ikem-ot jod bongot ja tetdenen jo i ondogit son si-kayo, no diket say ondogit so ni too, sota esel ton emedepo did poso to tan nemnem to. 16 Niman i waray waya jon mengitneng niyay ya naka pan-ikowan, isonga singpet jon itenengan.”
17 Idi bintawan nen Jesus sota eshakel la totoo, ja simekep nodta baley, insho-pet nonta ira too to no ngarantoy olog nonta arig ga inkowan to la.
18 Jet si Jesus simongbat ja kowan to ey, “Apay angken si-kayo, eg kayo maka-aw-awat? Apay eg jo amta ey sota maykem-ot shi bongot ket eg mebedin na si-katoy ondogit so ni nemnem ni too? 19 Tep eg met manshedan shi poso, no diket say dawan to, shi ekes, jet onbo-day met laeng.” (Say sakey ya kaytoshongan niyay den inkowan nen Jesus, eg mesepol la mengidin i angken nganton mekan.)
20 Jet intoloy nen Jesus ey, “Say agpayson kaondogit ni too, sota esel ton emedepo did poso to tan nemnem to. 21 Ta say kedepo-i ni ngaaw wa pangkep ni too, shi nemnem to. Isonga waray ememii tan emekileki, 22 waray emengibot, waray ememono, waray emengamkam ni kompormi, tan waray toon maledamsis. Isonga wara pay iray emenaol ni kait to, waray toon enshiy baing ton mandeka ni angken nganto, waray ma-epal, waray emenomang ni kait to, waray edastog, tan wara pay iray eshom ma mandeka ni ekalkalasin dokodokon aramid. 23 Emin ira jay ya ngaaw, nankedapod nemnem ni too jet sotan iray kaondogit ni too ja mankebol ni panbesolan to.” Kowan nen Jesus.
Sota kaba-deg ni pamati ni sakey ya biin aliwen Hodiyos
24 Nontan ma si Jesus, indekjas to sotan na dogad jet dimaw shi sakey ya dogad ja nay-esop shi siyodad ni Tira. Kowan to ey manpokok nin shi sakey ya baley shiman, nem eg mebedin. Inamta-an shagos ni totoo nodtan ey wares Jesus, 25,26 jet waren shagos i simabi alin bii ja aliwen Hodiyos ja poli nonta sigod ja too nodtan na dogad. Sajay ya bii, waray anak ton bii ja pingketan ni dimonyo; isonga idi shinemag to ey wares Jesus, dimaw ali et nantalimokod shi sango-an nen Jesus et ekika-kaasi son Jesus ey pebtik to sota dimonyon pimeket nodta anak to.
27 Say songbat nen Jesus son si-kato, in-aknan to ni arig, ja kowan to ey, “Mepekan koma nin i a-anak. Aliwen nebeng ja nak pekewas sota istay para a-anak ja i-akan ko so ni aso.”
28 Nem inewatan nonta bii sota arig to, jet kowan to ey, “Owen niti apo, amtak ita kowan mo. Nem angken sota ira aso shima naydoong ni damisaan, mebedin met ja manbiyag ira nonta ema-kas shi damisaan na kepengani ni a-anak!”
29 Simongbat si Jesus so nonta bii ja kowan to ey, “Kostoy songbat mo. Angken on-akad ka ma niman, tep bimetik mala sota dimonyo ja pimeket nodta anak mo.”
30 Jet idi mimotok sota bii shi baley to, simbi to sota anak ton emansheshokol shi katiri ja mimapteng ma. Namtik da sota dimonyon istay pimeket son si-kato.
Inpamapteng nen Jesus sota toon omel
31 Idi nan-oli si Jesus ja edapo did ma dogad ja kasekopan ni Tira, shindan toy Sidon asan ma manshalan nodta naykawa ni dogad ja kowan sha ey Dikapolis, ingkato nodta baybay shi Galilia.
32 Jet in-ilaw ni too son si-kato i sakey ya toon etoleng tan eg metongolan na polos i esel to. Jet shinewat sha son Jesus ey pishaten to kono say onmapteng. 33 Si Jesus, to indasin sota etoleng nga too, ja bintawan sha sota eshakel la too, jet idi showa bengat ira, indolot nen Jesus i kalomot to shi showen tangida nonta etoleng. Timopsha si Jesus et pinishat toy shila nonta etoleng, 34 asan ma ketangkak shi naykayang. Ngimed-as si Jesus jet kowan to so nonta etoleng, ni esel shen Hodiyos ey, “Ipata!” (Say olog nonta inkowan nen Jesus, “Kalokati ka!”) 35 Sotan ey mebedin men mantetneng sota istay etoleng, jet kasta met sota toka pandikat ja on-esel: mapoot may toka pan-a-sel.
36 Jet kowan ma nen Jesus so nonta ira totoo ey, “Karejo ikokowan iyay so ni angken sipa.”
Nem angken intalengteng nen Jesus i bilin son si-kara, ey eg sha pa-amta shi eshom, mas pay et ja inshamashamag sha sota kaskasshaaw wa dingka to. 37 Jet nasshaaw wa pasiya sota ira totoo, jet kowan sha ey, “Emin na kedagdag-a nen Jesus, mapteng. Angken sota ira nanketoleng, toka pantetneng, tan sota nanka-omel, toka pa-sel.”