26
Nantatabtabalan nonta makakontra son Jesus i pesing shen memono son si-kato
1 Idi enaksheng nga inkowan nen Jesus iyay ya emin, waray inkowan to so nonta ira too to, ja kowan to ey, 2 “Amtayo, no ondabas i showen akew, medeka sota piyasta tayon Hodiyos ja kowan tayo ey Paskowa, jet si-kak ja kowan ni para padto ey Anak ni Too, may-ewatak so ni toray say maydansa shi koros.”
3 Jet nontan met laeng nga akew, sota ira apo ni papashi, tan sota ira pangolo ni Hodiyos, esa-nop ira shima ebadeg ga baley nonta kangeto-an na pari, ja si Kaypas. 4 Jet nantatabal ira no ngantoy pesing shen memono son Jesus, jet ninemnem sha ey olboren sha kono say ma-shel et mebono. 5 Nem say kowan sha, “Aliwen tayo itompong no timpon piyasta, ta baka et ey mankodo ira sota eshakel la totoo.”
Shino-jagan ni sakey ya bii i toktok nen Jesus ni emanseng-ew wa dana
6 Jet nontan na akew, wares Jesus shi Bitania, shima baley nen Simon ja istay ebaybayang i bakdang to. 7 Wara ngoy biin dimaw ali son si-kato nodtan na baley, ja engita-jon ni palit ta danen emanseng-ew, ja nay-iyan shi botilja. Jet insho-jag to iyay shi toktok nen Jesus nonta maramen emengan si Jesus nodta damisaan. 8 Nem idi inon-an ira nonta too to, ireka mankotot ja kowan sha ey, “Ngantoy inpakewasan to so emo nima dana? 9 No istay indako to koma sotan na dana, istay asdeg to komay tongkal to jet mebedin na may-ekan so ni nankebiteg.”
10 Nem si Jesus, amta toy wared nemnem sha jet kowan to ey, “Baybay-iyo ita bii; karejo bedawen. Ta mapteng ita dingka to son si-kak. 11 Sota ira nankebiteg, wara ni olay son si-kayo, isonga mebedin na todongan jo; nem si-kak, eg mebedjag i pekikadwak son si-kayo. 12 Jet saja dana ja insho-jag to son si-kak, singa toka pan-isagana i kaybebka niya bakdang ko. 13 Jet agpayso iya ikowan ko son si-kayo. Shiya intiron dobong, no maytosho sota mapteng nga shamag maypangkep son si-kak, sajay ya dingka niyay ya bii, pekipedawag sha jet eg medibdibkan.” Kowan nen Jesus.
Bimaki si Judas ta ekitodag so nodta makakontra son Jesus
14 Sota sakey so nonta sampolo tan showen apostol nen Jesus, ja si Judas Iskariote i ngaran to, dimaw so nonta ira apo ni papashi ni Hodiyos, 15 jet kowan to son si-kara ey, “Ngarantoy i-akan jo son si-kak no itorok son si-kayo i kad-an nen Jesus?” Jet binayshan sha ni tedon polon palata. 16 Jet nontan ma, wara ni olay shi nemnem nen Judas Iskariote no toway pesing ton mengibaag so nen Jesus son si-kara.
Sota ka-onoran na pekipengan nen Jesus so nonta ira apostol to
17 Idi shimanon sota pilmiron akew ni piyasta, ja shaka pengan nonta tinapay ya enshiy daok ton para debag, dimaw ira di sota apostol nen Jesus son si-kato, jet kowan sha ey, “Toway piyan mon mi pansekana-an ni penganan mo nem ma-shem, tep Paskowa ma?”
18 Simongbat si Jesus ja kowan to son si-kara ey, “Daw kayo so nen iman na polano shi Jerusalem jet no sebi-en jo, ikowan jo son si-kato ey, ‘Kowan ali nen Maistoro ey mengan konod ja baley mo niman na piyasta, pati si-kamin too to, tep shanshani kono sota timpo to.’ ”
19 Jet sota ira too to, pinatira sota kowan nen Jesus jet dimaw ira ja sha insagana sota kenen sha ni mama-shem nontan na Paskowa.
20 Idi mama-shem mala, si Jesus tan sota sampolo tan showen apostol to, dimaw iren mengan nodtan, jet nansasango ired damisaan. 21 Idi maramen ireka emengan, kowan nen Jesus ey, “Agpayso iya ikowan ko son si-kayo. Waray sakey son si-kayo ja mengibaag son si-kak so nonta ira makakontra son si-kak!”
22 Jet sota ira too to, ensakit ta pasiya i nemnem sha, jet kowan ni sakey tan sakey son si-kato ey, “Sipa apo? Aliwen si-kak emo?”
23 Simongbat si Jesus ja kowan to ey, “Sota nay-okob son si-kak shi sakey ya pingkan, si-katoy mengibaag son si-kak. 24 Si-kak sota kowan ni para padto ey Anak ni Too jet kenshat ta metongpal sota padto ja naysolat nonta bayag da ni maypangkep son si-kak. Nem kaasi met laeng sotan na toon mengibaag son si-kak, ta meshosen pasiya! No da-kaman to sotan na shosa, ikowan to shorog shi bakdang to ey, ‘Agpos et nem ekak koma nay-anak!’ ”
25 Jet si Judas Iskariote ja mengibaag ali so nen Jesus, kowan to ey, “Sipa apo? Aliwen si-kak emo?”
Jet si Jesus, simongbat ja kowan to ey, “Siya, si-kam. Si-katoy inkowan mo.”
26 Nontan na maramen ireka ma emengan, inda nen Jesus sota tinapay et nan-iyaman son Apo Shiyos, asan toka showashowa-a. Jet in-akan to nodta ira apostol to, ja kowan to ey, “Iya, kan jo iyay. Sajay i bakdang ko.” 27 Jet idi naksheng, inda to sota tasa et nan-iyaman son Apo Shiyos, asan toka i-kan mowan son si-kara, ja kowan to ey, ‘Pan-i-inelbati jon inomen. 28 Ta sajay i shalak ja on-ayos ja pansigshan ni eshakel la totoo. Ta sota ketey ko di, si-katoy kepekawanan ni basol ni totoo, tan si-katoy panshoki-an nonta badon bilin nen Apo Shiyos so ni totoo. 29 Iyay i ikowan ko son si-kayo. Sajay i ka-onoran na penginom ko ni shanom niya obas, jet ekak nin menginom ingkatod onsabi sota penginom ko nonta badon shanom ni obas shima pantoshayan nen Apo Shiyos ja Amak; jet meki-inom kayo ngo.”
Naysigod ja inkowan nen Jesus sota ngaaw wa pesing ali nen Pedro
30 Nankansiyon ira ni maypangkep ni panshedjaw sha son Apo Shiyos, jet idi naksheng, bimo-day ira nodtan na baley jet dimaw ired ma shontog ga kowan sha ey Olibas. 31 Jet si Jesus, kowan to so nonta ira too to ey, “Niman na dabi, ibaing jowak ka emin jet onbetik kayo, ta si-katoy ketongpal nonta padton naysolat nonta bayag da, ja kowan to ey, ‘Bono-en ko sota para bantay ni kalniro, jet sota eman-o-odop ja kalniro, mebodak ira.’ 32 Nem no meksheng i pan-ongal ko, mepangdo-ak ja ondaw shi Galilia ey si-kayo.”
33 Nem si Pedro, kowan to ey, “Angken ibaing shaka ni emin na kait ko, eg taka mango ibaing.”
34 Simongbat si Jesus ja kowan to ey, “Podno iya ikowan ko son si-kam Pedro: niman na dabi, isaot mowak ni memintedo ja ikowan mo ey eg mowak am-amta. Jet no meksheng iyay, wara ngoy ontekok ja kawitan.”
35 Nem si Pedro, kowan to ey, “Angken na pekibono sha-ak son si-kam, ekak ikowan ey eg taka am-amta!” Jet sota ira kait to, sotan ngoy inonoran shen inkowan.
36 Jet si Jesus, inodop to sota ira apostol to shima dogad ja kowan sha ey Gitsimani jet kowan to son si-kara ey, “Tongaw kayod jay, ta ondawak shima a-adaw ja nak nin manshewat son Apo Shiyos.”
37 Inodop tos Pedro tan sota showen anak nen Sibidi, jet nontan ma, emankaikelkel-ewi. 38 Jet kowan to son si-kara ey, “Singa meteyak ni daringit ko! Shiyay kayo nin, eg kito ma-okip.”
39 Idi naksheng nga inkowan to iyay, bintawan to ira ni ootik, jet nanshomog ja nanshawat son Apo Shiyos, ja kowan to ey, “Ama, no mebedin koma, karam ipalobos iyay ya pandikat ko di. Nem say kowan ko, sota piyan mo, si-katoy metongpal; aliwen sota kostok.”
40 Idi imekwas, dimaw ja to inon-an sota too to jet simbi to iren na-ogip. Jet kowan to so nen Pedro ey, “Ngantoy? Na-ogip kayo. Apay, eg mebedin ja itoled joy jo-kew jo ni angken sakey ya oras bengat, ja kadwa-an jowak? 41 Panmolakat kayo jet panshawat kayo ngo so nen Apo Shiyos ni kedsang say eg shakejo ebaken ni ngaaw wa onsabi son si-kayo. Sota nemnem jo, makedsang niman, nem baka et ey ma-ebak kayo tep ekapoy i bakdang jon ontongpal nonta wared nemnem jo met laeng.”
42 Jet nonta maykepinshowa, dimaw mowan na en nanshawat son Apo Shiyos et kowan to ey, “Ama, no kenshat ta ipalobos mon mandikatak, i-onod ko sota piyan mon dag-en ko!” 43 Jet nay-oli mowan ali jet simbi to ira sota too to ja na-ogip, ta epaladoy jo-kew sha. 44 Jet indekjas to mowan ira ja en nanshawat ni maykepintedo, jet iso met laeng i inkowan to ni shawat to son Apo Shiyos. 45 Idi naksheng, dimaw mowan ali so nonta too to, jet kowan to son si-kara ey, “Ngantoy? Piyan jon ma-okip ni olay? Edabas mala sota oras ja panshewat jo koma. Simabi ma sota timpo, jet si-kak ja kowan ni para padto ey Anak ni Too, may-ewatak ma so nonta ira toon nankekedsel. 46 Eti, ondaw kito. Iyay ma ali sota mengibaag son si-kak.”
Si Jesus, inshel ma nonta makakontra son si-kato
47 Idi maramen eman-a-sel si Jesus, si Judas Iskariote ja sakey so nonta ira sampolo tan showa ja apostol nen Jesus, engolop ali ni eshakel la too. Sota eshom, nan-etak ira, tan sota ira eshom, waray peg-as sha. Sajay iren too, inbetkag ira nonta apo ni papashi tan pangolo ni Hodiyos. 48 Si Judas Iskariote, insigod ton inkowan so niya ira inodop to ey, “Say pengimatonan jo son Jesus, ongo-an ko; jet tengel jo.” 49 Isonga dimaw alin shagos si Judas so nen Jesus jet kowan to ey, “Apo, iyay ka gayam shiyay!” Jet inongo-an to ja singa agpayson ensemek to noman.
50 Jet si Jesus, kowan to son Judas ey, “Kajem, ita et mangon wara ked jay?” Jet sota ira inodop ali nen Judas Iskariote, dimaw ira di jet tinngel shen shagos si Jesus ja a-shelen sha ma. 51 Jet nontan, sota sakey so nonta ira too nen Jesus, inokbos ton shagos i kampilan to jet kinimpas toy tangida nonta baga-en ni kangeto-an na pari.
52 Jet si Jesus, kowan to so nonta engimpas ey, “I-odim ita kampilan mo shita atip to, ta sota mengosal ni kampilan, kampilan met laeng i ipatey to. 53 Say kowan mo emo, eg mebedin na mengshawak so nen Amak ni tolong? Say agpayso, no mengshawak son si-kato, mengibetkag alin shagos ni dinibon anghil. 54 Nem no sotan i dag-en ko, eg metongpal sota esel nen Apo Shiyos ja naysolat nonta bayag da ja naypadto. Isonga sajay niman i medeka.”
55 Jet nontan met laeng, kowan nen Jesus so nonta ira eshakel la totoo ey, “No si-kak i kowan jo ey a-shelen jo, apay nga nan-etak kayo tan waray peg-as jo? Apay tolisanak? Inakew met ja wara-ak shima Timplo ja emantosho, ket apay nga eg jowak inshel nontan? 56 Nem mesepol la sajay i medeka ta say metongpal sota insolat ni para padto nonta bayag da.” Kowan nen Jesus.
Jet emin ira sota too to, namtik ira jet indekjas shes Jesus.
Indaw shes Jesus nodta totoon pangolo ni Hodiyos
57 Jet si Jesus, indaw sha shi baley nen Kaypas ja kangeto-an na pari, tep shiman i na-olnongan ira nonta mamaistoro ni dinteg tan sota ira pangolo ni Hodiyos. 58 Jet si Pedro, tinned to ira nem bimetaw, ingkatod simabi nodta bo-dayan ni kangeto-an na pari jet simekep nodtan. Ekitongaw so nonta ira kowadja ta piyan ton asen no ngantoy pesing sha son Jesus.
59 Nontan, sota ira apo ni papashi tan sota ira esa-nop pa toray, ireka mengenap ni ikowan shen basol nen Jesus, angken o-owap koma, say waray kabol la ikowanan sha so ey si-katoy kebono-an to. 60 Nem enshiy shaka sepolen koston basol to. Angken eshakel sota sistigon dimaw ali ja o-owap i kowan sha, enshiy eki-det kari. Nem shi ka-onoran, waray showen dimaw ali, 61 jet kowan sha ey, “Sajay ya too, kowan to ey mebedin ton sheshalen kono ima Timplo nen Apo Shiyos jet i-oli to kono mowan na dag-en ni tedon akew.”
62 Jet sota kangeto-an na pari, dimayat et kowan to son Jesus ey, “Jet enshiy isongbat mo? Sajay met i kowan ira niya too ey basol mo!” 63 Nem si Jesus, imeg-eket. Jet sota kangeto-an na pari, kowan to ey, “Ipodnom no agpayson si-kam sota Anak nen Apo Shiyos ja inkari to nonta bayag da ey ibetkag to alin mengisedakan! Si Apo Shiyos, wara ni olay ingkatod ingka jet si-katoy pansangba-an mo!”
64 Simongbat si Jesus ja kowan to ey, “Sota inkowan mo, si-kato. Nem say kowan ko ngo, si-kak sota kowan ni para padto ey Anak ni Too, jet no ekay ali, ontongawak shi apit ni kanawan nen Apo Shiyos ja Manakabalin, jet asen jowak ali mowan ja metaksholan ni kolpot.”
65 Jet sota kangeto-an na pari, bini-nik to sota baro to shorog ni bonget to, jet kowan to ey, “Eg mesepol la wara pay i sistigo! Intenengan jo met i inkowan to! Toka pa-so-is Apo Shiyos! 66 Jet ngarantoy piyan jon pesing son si-kato?”
Simongbat sota kait ton toray, ja kowan sha ey, “Anam ton mebono!”
67 Jet tinopsha-an shay dopa to. Shinengpel sha, tan wara pay aliy eshom ma enedpak son si-kato, 68 ja kowan sha ey, “Tiga, si-kam ma inbebetkag kono nen Apo Shiyos ali, ikowan mo ga no moka idasin met laeng sota enengpel son si-kam?”
Indibak nen Pedro ey am-amta to si Jesus
69 Nontan met laeng, emantetongaw si Pedro nodta bo-dayan ni baley nonta kangeto-an na pari, jet waray biin baga-en nonta kangeto-an na pari ja dimaw ali son Pedro, jet kowan to ey, “Angken si-kam met, eki-od-odop ka son Jesus ja i-Galilia.”
70 Nem si Pedro, indibak to son si-karen emin, ja kowan to ey, “Enshiy am-amtak shita moka pan-ikowan!”
71 Jet idi dimaw si Pedro nodta pasbol, wara mowan i biin kowan to so nonta ira toon wara nodtan ey, “Sajay ya too, eki-od-odop met so nen Jesus ja i-Nasarit!”
72 Nem insaot nen Pedro mowan ja tinaksholan to ni sangba ja kowan to ey, “Angken pansangba-an ko, ekak am-amta itan na too!”
73 Idi ekay, sota ira toon wara nodtan, dimaw ira di son Pedro jet kowan sha ey, “Ayshiy showashowa! Kenshat ta si-kam i sakey ya kait to did Galilia! Ma-imaton shi moka pengibodikas ni esel!”
74 Nem si Pedro, nansangba mowan ja kowan to ey, “Angken shosa-en towak nen Apo Shiyos, no o-owap iyay ya inkowan ko la! Ekak am-amta itan na too!”
Jet nontan, timekok nga agpayso sota kawitan.
75 Jet idi intenengan nen Pedro, ninemnem to ma sota inkowan nen Jesus ey, “Isaot mowak ni memintedo, ja kowan mo ey eg mowak am-amta, jet no meksheng, wara ngoy ontekok ja kawitan.” Jet si Pedro, dimaw shima powisha ja epaladoy nangis to tep naydaw-an.