20
In-arig nen Jesus ey nan-i-inges i dagbo ni man-obded gardin
1 “Iyay mowan i kay-eshigan ni pantoshayan nen Apo Shiyos. Sota pesing nen Apo Shiyos ja menobalit ni too to, may-eshig so nonta toon emangardin ja engala ni obrantis to. Sotan na too, bimowas ja en mengenap ni toon dagbo-an to ja man-obda nodta gardin to. 2 Jet idi waray simbi ton totoo, ekitodag son si-kara ey dagbo-an to ira ni kosto asan to ibetkag iren man-obda nodtan. 3 Idi nonta alas nowibi ni agsapa, dimaw mowan et waray inon-an to ja emandaydayat shima malkaro ja enshiy obdara. 4 Jet kowan to son si-kara ey, ‘Daw kayo ngo shima gardin ko jet kayo pan-obda. Dagbo-an takejo ni kosto.’ Jet sotan iren too, dimaw ira ja en nan-obda. 5 Idi alas dosi, tan alas tris mowan, dimaw mowan sota toon waray gardin to, jet sotan met laeng i inpasing to. 6 Nonta shanshanin alas singko ni mama-shem, dimaw mowan jet wara pay laeng i inon-an to ja toon emandaydayat, jet kowan to son si-kara ey, ‘Ngantoy? Wara kayod jay ni san-akew? Apay, enshiy obdayo aya?’ 7 Simongbat ira ja kowan sha ey, ‘Enshi met i mengeda son si-kamin man-obda.’ Isonga simongbat sota waray gardin to ey, ‘Daw kayo ngarod shima gardin ko et kayo pan-obda.’ 8 Idi mama-shem mala, sota makakokowa nonta gardin, inkowan to so nonta emengimanshal nonta ira man-obda ey, ‘Ta-wal mo di ira sota nan-obda et dagbo-im ira, manshoki nodta na-onod ja mimotok ingkato nodta epangdo.’ 9 Isonga say pilmiron tina-wal to, sota ira engiroki ni obda ni alas singko ni mama-shem. Jet say inewat ni sakey tan sakey son si-kara, sota koston dagbo ni san-akew. 10 Idi tina-wal to ngo ira di sota epangdon nan-obda, say namnama sha, kowan sha nem mandesin ira. Nem iso met laeng nga say inewat ni sakey tan sakey son si-kara, sota koston dagbo ni san-akew. 11 Idi inewat sha mala sota dagbora, pan-ikotot nonta ira epangdon nan-obda sota toon nan-obda-an sha, 12 ja kowan sha ey ‘Apay nga saja ira na-onod, ja nan-obda bengat ni sakey ya oras ket in-inges moy dagbora son si-kami ja nan-obda ni san-akew? Inen-enosan mi pay i embel-at ta obda, tan sakit ni sekit!’ 13 Nem sota dimagbo son si-kara, sinongbatan toy sakey son si-kara ja kowan to ey, ‘Kajem, enshiy ngaaw wa nak dingka son si-kayo. Timolok kayo met ey say idagbok son si-kayo ket sota koston dagbo ni san-akew. 14 I-ekad jo et ita dagboyo, kosto itan; angken ondaw kayo. Sota ira na-onod ja nay-inges i dagbora son si-kayo ja epangdon nan-obda, nemnem ko ngon may-inges ira son si-kayo. 15 Sota piyan kon penobalit ni took, si-kato, enshiy mengipeshit. Apay, kayoka aya ma-epal ta ma-ekanak so ni eshom?’ ” Sajay i arig ga inkowan nen Jesus so nonta ira too to.
16 Jet si Jesus, intoloy ton kowan to ey, “Isonga sota toon namnama ni karakdan ey ootik i kon-oren to, si-kato et ngo mowan i mandesin aliy kon-oren to. Nem sota kowan ni karakdan ey ebadeg i ewaten to, si-kato et ngo mowan i ootik i kon-oren to ali.”
Sota maykepintedon engikowanan nen Jesus ni maypangkep ni ketey to
17 Idi nonta kepan-ekad ira nen Jesus ja ondaw shi Jerusalem, inpata-nil to ira sota sampolo tan showa ja apostol to et a-abos sha ma. Nonta wara ired ma shalan, kowan to son si-kara ey, 18 “Itnengi jo iya ikowan ko son si-kayo. Agpayson si-kak sota kowan ira nonta para padto nonta bayag da ey Anak ni Too. Nem no onmotok kitod Jerusalem, may-ewatak ma so nonta ira apo ni papashi tan mamaistoro ni dinteg tayon Hodiyos ja makakontra son si-kak. Jet sotan may timpo ja pengikowanan sha ey mebono-ak koma. 19 I-awat sha-ak so nonta ira too ja aliwen kait tayon Hodiyos say si-karay memebaing son si-kak. Sepsepdaten sha-ak pay, asan sha-ak ilansa ma shi koros. Nem no maykatdon akew, pan-ongal towak met laeng nen Apo Shiyos.”
Inshawat nonta asewa nen Sibidi ja al-en nen Jesus iray anak to ni toray
20 Jet nontan, sota asewa nen Sibidi, dimaw ali so nen Jesus et pati sota showen anak to. En nantalimokod shi sango-an nen Jesus, ta waray ibaga to. 21 Jet si Jesus, kowan to son si-kato ey, “Ngantoy ibagam son si-kak?”
Simongbat sota bii ja kowan to ey, “Pangaasim, ikowan mo niman ey no mantoshay ka, mekitoshay ngo ira ja showen anak ko. Sota sakey, ontongaw shi petek ni kanawan mo et sota sakey, ontongaw shi petek ni kanigid mo.”
22 Simongbat si Jesus ja kowan to ey, “Joka ba-ngatay baga ey eg jo nin nemnemen. Wara aliy tasen napno ni digat jet mesepol la nak inomen. Kabaalan jo ayen mengenos ja meki-inom nontan?”
23 Jet simongbat mowan si Jesus ja kowan to ey, “Agpayson mekila-kam kayo nonta digat ja da-kaman ko. Nem sota itongaw jo shi petek ni kanawan ko, tan kanigid ko, aliwen si-kak i mengigsheng so. Sajay, para so nonta ira sigod ja insagana-an so nen Amak.”
24 Idi intenengan ira nonta kait shen sampolo ja apostol nen Jesus iyay ya keshaw nonta san-agi, ngaaw i deknara son si-kara.
25 Nem si Jesus, tina-wal to ira jet kowan to son si-kara ey, “Amtayo met i kepesing ira nonta mantoshay shima kompormin ili, tan sota eshom ma toon nankengatoy saad sha. Shaka ipakat i saad sha, ni shaka pengitoshay met laeng so ni sinekopan sha. 26 Nem no si-kayo, aliwen inges nontan i pesing jo so ni sakey tan sakey son si-kayo. Sota kowan to ey si-katoy kangeto-an son si-kayo, mesepol la si-kato et ngo mowan i mengibeba ni bakdang to et si-katoy man-obda ni pansigshan ni kait to. 27 Jet sota piyan ton si-katoy mandesin son si-kayo, mesepol la panbedin toy bakdang to ni baga-en jon emin. 28 Ta angken si-kak ja naypadto nonta bayag da ey Anak ni Too, ekak dimaw ali ja pansilbi-an ni karakdan, no diket dimawak ali say mansilbi-ak son si-kara. Tan say sakey pay ya dinawan ko di, say itolok koy bakdang kon metey, tep si-katoy kaysedakan ni eshakel la totoo.”
Inpan-asas nen Jesus i showen ekorab
29 Nonta shaka pan-idekjas i Jiriko, eshakel la pasiya ira sota toon imonod son si-kato. 30 Jet nodta kalsara, waray showen toon ekorab ja timongaw nodta naykilig. Idi intenengan sha ey si Jesus i ondabas ali nodta kalsara, kimeljaw ira ja kowan sha ey, “Kaasi-i jokami, si-kam ma mengibengon son Ari David nonta bayag da!”
31 Nem sota ira eshakel la too, sinelkag sha ira, ja kowan sha ey, “Eka-eket kayo!”
Nem mina-mara et ja kimeljaw ja kowan sha ey, “Apo! Kaasi-i jokami, si-kam ma mengibengon son Ari David nonta bayag da!”
32 Kimi-neng si Jesus et tina-wal to ira ja kowan to ey, “Ngarantoy piyan jon itolong ko son si-kayo?”
33 Simongbat ira ja kowan sha ey, “Apo, pan-asas jokami, say man-esas kami ngo.”
34 Jet si Jesus, toka ira kaasi-i, isonga pinishat to i matesha. Jet mimapteng iren shagos ja nan-asas. Jet nay-eshom ira ma son Jesus.