13
In-arig nen Jesus sota kalasin bo-day ja naysepa-an ni botil
1 Nontan met laeng nga akew, si Jesus, bimo-day nodtan na baley, jet dimaw nodta kilig ni baybay ja en mantosho. 2 Eshakel ngo i toon imonod ja sha binongolan si Jesus, jet kasoreng si Jesus ma ey man-a-tan nodta bangka ja wara nodta shanom, jet timongaw nodtan. Sota ira too, wara iren esalpag nodta kilig ni shanom. 3 Eshakel i inkowan nen Jesus son si-kara, nem poro arig i inpaspasing to.
Say sakey ya arig ga inkowan to son si-kara, sajay: “Waray too ja dimaw wa en nanbangkag shi oma. 4 Idi toka pan-iwaris sota botil, sota eshom, nayponta shi shalan, jet kinan ira ni titit. 5 Sota eshom ma botil nayponta ired kabato-an ja ma-ingpis i bo-day to, jet timemel la shagos, tep aliwen masshel i bo-day ja nayponta-an to. 6 Nem idi simekal i sekit, nakkit sota timemel la botil ta eg shimalem sota damot to. 7 Sota eshom ngon botil, nayponta ira shima similja ni sebit, jet idi bimengis iren showa, na-abak sota temel ni mola jet eg timoloy ya bima-deg. 8 Sota eshom ngon botil, nayponta shima mapteng nga bo-day. Jet sajay ira, waray nandames ni sandasos, waray nandames ni enem ma polo, tan wara pay i nandames ngo ni tedon polo. 9 Niman i waray waya jon mengitneng niyay ya naka pan-ikowan, isonga singpet jon itenengan.” Kowan nen Jesus.
10 Jet sota ira too met laeng nen Jesus, dimaw ira son si-kato et inbag-an sha, ja kowan sha ey, “Apay nga arig ga emin i moka pengitosho son si-kara?”
11 Simongbat si Jesus ja kowan to son si-kara ey, “Si-kayo nin i naypalobos ja on-awat so ni maypangkep nonta pantoshayan nen Apo Shiyos, nem si-kara, enshi nin. 12 Ta sota waray amta to, si-kato pay i metod-an, ingkatod eshakel i amta-an to. Nem sota enshiy am-amta to, angken sota ootik ja amta to, ma-kal son si-kato. 13 Isonga arig i naka pengitosho son si-kara, ta angken isi-ning sha, eg sha imatonan, tan angken itenengan sha, eg sha amtay olog to. 14 Si-karay kaytoshongan nonta padto nen Isaias nonta bayag da ja esel met laeng nen Apo Shiyos, ja kowan to ey, ‘Itenengan jo ali, nem eg jo ewatan! Tan asen jo ali nem eg jo idasin. 15 Ta say nemnem ira niyay ya too, timangken, nakol ni eg sha ewatan. Angken matesha, singa ekimit, nakol ni eg sha idasin. Jet eg ira ma ontorong son si-kak say pemapteng ko ira.’ Sajay i padto nen Isaias. 16 Nem si-kayo, pan-imdeng kayo, ta inewatan jo sota inon-an jo tan intenengan jo son si-kak. 17 Agpayso iya ikowan ko son si-kayo. Eshakel ira sota para padto tan sota eshom ma toon Apo Shiyos nonta bayag da, ja piyan shen on-an koma iyay ya inon-an jo niman na timpo, tan piyan shen itenengan koma iyay ya intenengan jo, nem eg sha sina-kop.
18 “Itnengi jo ngarod i olog niya arig maypangkep nonta inkowan ko la ey en engiweshis ni botil shi oma. 19 No sota kompormin too ket itenengan to sota maypangkep ni pantoshayan nen Apo Shiyos, nem eg to ewatan, ondaw ali si Satanas et dingdingen to sotan na intenengan to la. Sotan i kay-eshigan nonta inkowan kon nayponta-an ni botil ja shalan. 20,21 Sota nayponta-an ni botil la kabato-an, si-katoy kay-eshigan nonta toon engitneng ni esel nen Apo Shiyos ja emati ni sanka-atikan. No itenengan to, waren shagos i imdeng ton mengewat, nem eg may-a-det shi nemnem to. Isonga magenon ibi-jag to no onmotok ali sota digat to, ono okesen ni too maypangkep ni in-awat to so ni esel nen Apo Shiyos. 22 Sota nayponta-an ni botil ja similja ni sebit, si-katoy kay-eshigan nonta toon engitneng ni esel nen Apo Shiyos met laeng, nem say toka nemnemnema, sota pesing ton manbiyag, tan sota ekanas sa biyag ni baknang. Jet anongosto ma ey medingding sota esel nen Apo Shiyos son si-kato, jet enshi may mapteng nga pantongpalan to. 23 Sota nayponta-an ni botil ja mapteng nga bo-day, si-kato ngoy kay-eshigan nonta toon engitneng ni esel nen Apo Shiyos, ja imawat ni olog to. May-eshig ma ey sajay ira, waray dames sha: waray nandames ni eshakel, waray nandames ni kalaingan, tan waray nandames ni otik.”
In-arig nen Jesus sota edet ja naydaok shi pagey, tan wara pay i eshom ma arig ni pantoshayan nen Apo Shiyos
24 Wara pay i sakey ya arig ja inkowan to son si-kara, ja kowan to ey, “Say kay-eshigan nonta pantoshayan nen Apo Shiyos, inges to iyay. Waray too ja en nanmola shi payew to, jet tima-nil la poron pagey i inmola to. 25 Nem idi kalebi-an, nandibas ali sota makakontra son si-kato, jet en engilaok ni botil ni edet nodta naymolen pagey, asan kabetik. 26 Idi kimabay sota pagey, jet bimosbos ma, wara gayam i apil la naydaok. 27 Jet sota baga-en to, dimaw ira ja sha inkowan so nonta apo sha ey, ‘Apo, kowan ko nem poron pagey sota botil la inpaimolam shima payew mo. Apay nga idi bimosbos ira, waray edet gayam ma naydaok?’ 28 Kowan to son si-kara ey, ‘Sota makakontra son si-kak, si-katoy dimaga so nontan.’ Jet sota baga-en to, kowan sha so nonta apo sha ey, ‘Jet ngantoy kowan mo? Piyan mon mi demonen sota ira edet ja naydaok?’ 29 Nem sota apo sha, kowan to ey, ‘Enshi, bay-iyo, ta no demonen jo sotan na edet, mekigebot da sota pagey. 30 Isonga bay-iyo nin ingkatod onsabi sota timpon pan-eni. Jet ikowan ko so nonta man-eni ey idasin sha nin sotan na edet ja bedbeshan shen para maypool. Nem sota pagey, sa-nopen sha et italo sha shima sarosal ko.’ ” Sajay i in-arig nen Jesus nonta pantoshayan nen Apo Shiyos.
31 Wara pay i sakey ya arig ja inkowan nen Jesus son si-kara ja kowan to ey, “Say pantoshayan nen Apo Shiyos, may-eshig nodta botil ni sakey ya kalasin mola ja ootilik. 32 Sajay ya botil, si-katoy ka-otikan na botil so ni emin na botil, nem no i-esek nonta too nodta gardin to, ey onba-deg, si-katoy kabalkan so ni emin na mola. Jet sota ira titit, mebedin na man-obong ira shima pangpanga to.”
33 Wara pay i arig ja inkowan nen Jesus son si-kara ja kowan to ey, “Say pantoshayan nen Apo Shiyos, may-eshig pay nodta para debag ni tinapay ja inda ni bii, ja to indaok nodta eshakel la arina ingkatod inedinan ton emin.”
34 Nontan na timpo, emin na inpantoro nen Jesus so nonta ira totoo, arig ni olay i inpangitoro to. Enshiy eshom ma inkowan to son si-kara, nem eg sajay. 35 Sajay i tongpal nonta inkowan nonta para padto nonta bayag da ey, “Say pengikowan ko so ni totoo, arig, jet ipa-amtak son si-kara sota sigod ja plano nen Apo Shiyos ja eg sha amta, ja plano to nonta eg pay laeng epalsowa iya dobong.”
36 Jet si Jesus, indekjas to ira sota totoo jet simekep nodta baley. Jet sota ira too nen Jesus, dimaw ira son si-kato jet kowan sha ey, “I-odog mo ga sota arig ja inkowan mo maypangkep nonta edet shi payew ja naydaok shi pagey.”
37 Simongbat si Jesus ja kowan to ey, “Sajay i olog to: sota engimoda nonta tima-nil la botil ni pagey, sotan sota kowan sha ey Anak ni Too. 38 Sota oma, si-katoy kay-eshigan niya dobong. Sota ira botil ni pagey, si-kara sota kay-eshigan ira nonta mayda-kam shi pantoshayan nen Apo Shiyos. Sota ira botil ni edet, si-kara sota kay-eshigan ira nonta toon wara son Satanas. 39 Sota en engilaok nonta edet, si Satanas i kay-eshigan to. Sota pan-eni, say olog to, sota timpon pengigsheng nen Apo Shiyos no sipa shiya dobong i maysedakan. Sota ira man-eni, si-kara sota anghil nen Apo Shiyos. 40 Sota edet, ma-olnong jet mepoolan. Sotan i kay-eshigan ni pesing nen Apo Shiyos no mengigsheng ey eg maysedakan sota nankekedsel. 41 Si-kak sota inpadtora nonta bayag da ey Anak ni Too, jet ibetkag ko ali sota anghil ko jet si-karay mengkal ira nonta toon emengi-kan ni panbesolan ni kait sha, tan angken pay sota ira ngaaw i aramid sha, say eg ira mayda-kam nodta pantoshayan ko. 42 Jet say pesing ira nonta anghil, iteknal sha ira shima apoy ya empetang nga pasiya. Shiman, mannengnengis i totood man, tan panngedetnget shay sangi sha ni digat sha. 43 Jet sotan alin timpo, sota ira too nen Apo Shiyos, singa sekit iren menenili shima pantoshayan nen Apo Shiyos ja Amesha. Niman i waray waya jon mengitneng niyay ya naka pan-ikowan, isonga singpet jon itenengan.
44 “Say pantoshayan nen Apo Shiyos, ebanol; isonga may-eshig ey singa sota pilak ja pino-jasan ni too shi payew. Say inpasing nonta too, tina-bokan to mowan et ebadeg i imdeng to. To indako sota kokowa ton emin et tinongkal to sotan na payew, ta ebanol son si-kato sota simpol ton pilak nodtan.
45 “Say kay-eshigan pay nonta pantoshayan nen Apo Shiyos, singa sota toon emanbiyaki ja say toka en-enapa, sota ebanol la bato ja kowan sha ey pirlas. 46 Waray simpol ton sakey so nonta pirlas ja ebanol la pasiya. Jet say inpasing to, to indakon emin sota kokowa to et tinongkal to ma sotan na pirlas.
47 “Say kay-eshigan pay nonta pantoshayan nen Apo Shiyos, singa sota inpasing ira nonta toon nannigay. Inteknal sha shima baybay sota embanaw wa balshew sha say mengna ira ni eshakel la nigay ya ekalkalasi. 48 Jet idi enapno sotan na balshew sha, inkoyod ali nonta ira too shima naykilig. Pinispis sha sota mapteng, jet si-katoy in-iyan sha nodta ijanan. Nem sota ngaaw, in-ibong sha. 49 Inges niyay i medeka no timpon pengigsheng ali nen Apo Shiyos no sipay maysedakan. Sota ira anghil, si-karay ondaw ali jet idasin sha sota ira toon ngaaw i aramid sha so nonta ira too nen Apo Shiyos. 50 Sota ira toon ngaaw i aramid sha, iteknal sha ira shima apoy ya empetang nga pasiya. Shiman, mannengnengis i totood man, tan panngedetnget shay sangi sha ni digat sha.” Sajay iray arig ga inkowan nen Jesus.
51 Jet kowan ma nen Jesus son si-kara ey, “Jet inewatan jo ma i olog nonta arig ja inkowan ko la?”
Simongbat ira sota too to ey, “Owen.”
52 Jet kowan pay nen Jesus son si-kara ey, “No kasta, si-kayon maka-amta ni sigod ja bilin nen Apo Shiyos, no man-ashal kayo nonta maypangkep ni pantoshayan nen Apo Shiyos, komplito may amtayo. Jet may-eshig kayo so nonta toon waray baley to ja amta ton mengosal nonta kompormin shaan tan bado ja naytalo nodtan.”
Si Jesus, dinamsis ira nonta totoon kaidiyan to
53 Jet si Jesus, idi naksheng nga inkowan to iyay ya arig, indekjas to sotan na dogad. 54 Dimaw shima ili to, ja en nantoro shima sa-nopan ni si-karen Hodiyos. Jet sota ira too nodtan, ireka messhaaw nonta maypangkep ni toro to ja kowan sha ey, “Towa emoy inamta-an to so niman na daing to, tan towa emoy engal-an to niman na panakabalin ton milagro? 55 Sajay emo met sota anak nonta kalapintiro! Aliwa ayen si Maria i ineto? Amta tayo met sota ira a-aki to ja si Santiago, Jose, Simon, tan si Judas. 56 Tan iyay pay ired jay sota bibiin a-aki to. Towa ngatay inashalan to so niman na amta to?” 57 Jet sotan iren kaidiyan to, dinamsis sha si Jesus.
Nem si-kato, say kowan to son si-kara, “Emin ira sota toon inbetkag ali nen Apo Shiyos, mebedin na mayshedjaw shi emin na ili. Nem shi mismon ili to bengat i eg to kayshedjawan, tan angken pay sota mismon pamilja to, eg sha ishayaw.”
58 Jet si Jesus, aliwen eshakel i dingka tod man ja milagro, ta eg ira memati son si-kato.