¹ Si Jesucristo , poli nen David tan si Abraham. Nem wara pay iray eshom, jet sajay iray ngarangaran sha: ² Si Abraham, ama nen Isaac; jet si Isaac, ama nen Jacob; jet si Jacob, ama nen Joda, asan wara pay iray potot to ja agi nen Joda. ³ Jet si Joda nen Tamar, anak sha si Piris nen Sara. Jet si Piris, ama nen Isrom; si Isrom, ama nej Aram. ⁴ Si Aram, potot tos Aminadab; si Aminadab, ama nen Naason; si Naason, ama nen Salmon. ⁵ Jet si Salmon nen Rahab, anak sha si Boos; jet si Boos, inesawa to si Ruth et anak sha si Obid; jet si Obid, ama nen Jesse. ⁶ Si Jesse, ama nen David ja nan-ari, jet si David, inpotot tos Solomon. (Say ina nen Solomon sota istay asewa nen Orias.) ⁷ Si Solomon, ama nen Roboan; si Roboan, ama nen Abias; jet si Abias, potot to si Asa. ⁸ Si Asa, ama nen Josapat; si Josapat, ama nen Joram; jet si Joram ama nen Osias. ⁹ Potot ngo nen Osias ma si Joatam; si Joatam, ama nen Akas; jet si Akas, ama nen Isikias. ¹⁰ Jet si Isikias ama nen Manasis; si Manasis ama nen Amon, jet si Amon ama nen Josias. ¹¹ Jet si Josias potot to si Jikonias, tan wara pay iray a-aki nen Jikonias. Sajay iren a-aki nen Jikonias, pati si-kato, nay-anak ira nonta timpon in-ilaw sha sota toon i-Israel ja maybedod shima dogad ja kowan sha ey Babilonia.

¹² Idi nonta wara ma ira shi Babilonia, waray inpotot nen Jikonias ja inpanngaran to ni Salatiil, jet si Salatiil, inpotot to ngo si Sorobabil. ¹³ Naytoltoloy ja naypolipoli ira jay jet si Sorobabil, ama nen Abiod. Si Abiod i ama nen Iliakim; si Iliakim, ama nen Asor; ¹⁴ si Asor, ama nen Sadok; si Sadok, ama nen Akim; si Akim, ama nen Iliod; ¹⁵ si Iliod, ama nen Eleazar et si Eleazar ama nen Matan. Si Matan ma i ama nen Jacob. ¹⁶ Jet si Jacob, potot to si Jose et si-kato may maka-asewa so nen Maria ja engi-nak so nen Jesus, ja inewagan sha met laeng ja si Cristo.

¹⁷ Jet sajay iren nanpolipoli, manshoki so nen Abraham ingkato so nen David, sampolo tan epat ta apo. Jet manshoki mowan so nen David ingkato nonta timponindaw sha so nonta tood Israel shima dogad ja kowan sha ey Babilonia, sampolo tan epat mowan na apo. Manshoki mowan nonta wara ired Babilonia ingkato ngo nonta inkay-anak nen Cristo, sampolo tan epat ta apo mowan.

¹⁸ Iyay i shoki-an ni inkay-anak nen Cristo. Nonta aneng pay laeng nga may-enak si Cristo, si Maria ja mengi-nak ali son si-kato, naykari ja esaw-en nen Jose. Jet si Maria, nonta eg ira pay laeng nan-asewa nen Jose, na-amta-an ey malokon. Nem sotan na dokon to, in-iyan gayam ni Ispirito Santo nen Apo Shiyos. ¹⁹ Nem si Jose ja naykarin mengesawa so nen Maria ali, kowan to ey eg to itoloy ya esaw-en si Maria. Nem piyan ton dibas i pesing ton mengisi-jan, ta eg to koston mebebaingan si Maria. Si Jose, na-anos sa daki, isonga sajay i kowan to ey pesing to. ²⁰ Nem idi sajay i toka nemnemnema ja kowan to ey dag-en to, nanpa-sas i anghil nen Apo Shiyos shi kokokip to, ja kowan nonta anghil son si-kato ey, “Jose ja poli nen Ari David, kareka manshanag ja mengesawa so nen Maria, ta sama dokon to, Ispirito Santo nen Apo Shiyos i engi-jan so. ²¹ Say i-anak to ali, daki et say ingaran mo son si-kato, Jesus (ja say olog to, mengisedakan), ta si-kato diy mengisedakan ira nonta too to say eg ira meshosa pangkep ni basol sha.”

²² Sajay ya emin i epasemak say mayto-to-wa sota kowan ni para padto nonta bayag da ja esel nen Apo Shiyos, ²³ ja kowan to ey, “Wara aliy balasang ja enshiy dakin en imaro-arol so, nem on-anak ali. Say i-anak to ali, daki jet say ingaran sha so nontan na i-anak to ali, si Emanuel.” (Say olog niyay ya ngaran shi esel ira ni Hodiyos, “Si Apo Shiyos, wara son si-katejo.”)

²⁴ Jet idi bimangon si Jose, pinati to sota inkowan ni anghil nen Apo Shiyos shi kokokip to et inesawa to si Maria. ²⁵ Nem eg to ineshol si Maria nonta maramen malokon. Jet idi nay-anak sota dokon nen Maria, inpanngaran nen Jose ni Jesus sota nga-nga.