Nhò Manoh Lùi Men Jah Dèch Claih
10
1 Ôi oh daq, bìac ngèh enh ta manoh au, wa bàu au waiq khàn ca Boc Plình, aih am ca jàn Is-ra-ên jah dèch claih. 2 Au anoi hlài bìac wì haq, aih wì haq i manoh dêh nhang trong Boc Plình, mahaq manoh dêh nhang aih ùh xài tiaq manoh 'nì loq. 3 Taiq wì haq ùh canao loq ca bìac ta-atoq da Boc Plình, mahaq wì chaq trong broq bìac ta-atoq crài tiaq cla, wì haq ùh chìuq iu tiaq bìac ta-atoq da Boc Plình. 4 Ma jah 'màng aih Chuaq Jêxu Crich aih đòiq pagêh ranenh đòiq rìm ngai ma lùi Haq èh khoi jah ta-atoq.5 Môise i achìh bìac ta-atoq trùh enh ranenh aih 'màng cô: “Mangai leq broq tiaq ranenh, èh ep caq ŏi iu tiaq rìm nà ta ranenh.”a 6 Mahaq bìac ta-atoq trùh enh manoh lùi, èh i achìh 'màng cô: Manoh ìh apaq hèm 'màng cô: “Cabô jah tŏc ta plình?”b Aih enh anoi đòiq 'ràng Chuaq Jêxu Crich loh, 7 Loq, “Cabô jah loh ta ralùng jrùq?”c Aih enh anoi, đòiq 'ràng Chuaq Jêxu Crich tŏc enh mangai cachìt, 8 mahaq Sech Hadròih khoi hnài 'màng leq? “Bàu lem ŏi haten ca ìh, ŏi ta hacùng wa ta manoh ìh.”d Aih bàu da manoh lùi nhèn ma anoi hnài: 9 Tàng hacùng ìh doi Chuaq Jêxu, aih Chuaq wa manoh ìh lùi Boc Plình khoi broq Haq rìh hlài enh mangai cachìt, èh ìh jah dèch claih. 10 Ma jah 'màng aih mangai leq lùi ta manoh èh jah ta-atoq wa anoi hloh xam hacùng doi dađeh lùi, aih jah bìac dèch claih. 11 Sech Hadròih doi: “Mangai leq lùi Chuaq èh ùh hìaq camaih.” 12 Ùh kè mangai Yothaiq loq mangai Hilap, ma jah 'màng aih Chuaq, Haq Chuaq da rìm ngai, am xôq ramŏt tôm tàu ca rìm ngai ma creo xìn Haq. 13 Ma jah 'màng aih, “Cabô creo dang hiniq Chuaq èh dìq jah dèch claih.”
14 Mahaq wì 'nhòq lùi Haq èh broq 'màng leq wì jah creo dang? 'Nhòq lah tàng anoi, èh broq 'màng leq ma lùi? Tàng 'nhòq i cabô anoi hlài, broq 'màng leq ma tàng? 15 Tàng 'nhòq i cabô thê loh lam, èh anoi hnài 'màng leq? Sech Hadròih achìh: “Capiang jènh mangai ma lam anoi hnài Bàu Lem aih lem lình dìq jaq!”
16 Mahaq ùh xài rìm ngai dìq dì tiaq Bàu Lem, ma jah 'màng aih Êsai khoi doi: “Waiq Chuaq, cabô ma khoi lùi bàu nhèn anoi hlài?” 17 'Màng aih manoh lùi trùh nhò wì tàng, wì tàng, aih jò Bàu da Chuaq Jêxu Crich jah anoi hlài. 18 Mahaq au bòch: I joq wì haq 'nhòq tàng ùh? Khoi, wì khoi tàng, ma jah 'màng aih,
“Bàu Chuaq khoi jah anoi hlài rìm nòi,
wa bàu aih khoi anoi hlài jàp crŏng taneh.”e
19 Au bòch hòm: 'Màng aih jàn Is-ra-ên ùh 'nì loq 'mòh? Baxèm adroi Môise khoi doi:
“Au broq ca pì jah tagrình ca mòiq jàn 'noiq ma ùh xài jàn Yothaiq.
Au jah broq ca pì loh nòih ca mòiq jàn 'noiq dìq jaq blùng.”f
20 Êsai xam manoh tanuq doi:
“'Bài mangai ùh i ti chaq Au, èh khoi glàm Au, Au khoi mahno dađeh ca mangai ùh ti chaq Au.”
21 Mahaq ca jàn Is-ra-ên, Haq doi 'màng cô:
“Au khoi hnhu tì xèq ca hì ta jàn ma ùh 'nì dì tiaq
wa loq tajraq hlài ca Au.”