Wì Mangai Lình Lê Baxa Jêxu
19
1 Hi khoi, Philat thê wì 'nong Jêxu lam wa blai Haq. 2 Wì mangai lình broq cadoh xam hila pacôi ca Haq ti gàu, am ca Haq caxùnh eo ma gòh drinh. 3 Wì trùh ti Haq capoch lê, doi: “Waiq Bùa mangai Yothaiq.” Khoi ca aih wì tep hadrò Haq.4 Khoi èh, Philat loh enh gùng mòiq yàng hòm, doi ca wì: “Ngan cô, au 'ràng Haq loh enh ngìa ca pì, waq ca pì loq au chaq ùh hnoq tôiq lôi cleq ŏi ti Haq.” 5 Chuaq Jêxu cadiang loh; gàu côi cadoh broq xam hila; chac Haq caxùnh eo ma gòh drinh. Philat doi ca wì: “Ngan Mangai cô!”
6 Jò wì pajàu càn wa 'bài mangai rap hnoq Haq, wì creo bàu dêh: “Tiang đình Haq ta long pagat beq! Tiang đình Haq ta long pagat beq!”
Philat doi: “Pì tiang đình Haq beq! Au chaq ùh i tôiq lôi cleq ŏi ti Haq.”
7 Mangai Yothaiq tèo: “Nhèn i ranenh, tiaq ranenh cô Haq phai cachìt taiq Haq doi, Haq Con Calô Boc Plình.”
8 Jò Philat tàng bàu cô, haq yi yùq crè tam hòm. 9 Haq mùt hlài ta Adùq Hadrah, bòch Jêxu: “Ìh trùh enh leq?” Mahaq Jêxu ùh tèo haq. 10 Philat bòch hòm: “Gleq Ìh ùh doi ca au bàu cleq? Ìh ùh 'nì au i cwìang ca'naih Ìh wa i cwìang tiang đình Ìh 'mòh?”
11 Jêxu padreo hlài bàu: “Ìh toq i cwìang enh 'nhèq ca Au tàng Boc Plình am ca ìh cwìang aih. 'Màng aih, mangai ma khoi 'ràng Au am ca ìh, haq aih i tôiq yi càn.”
12 Enh jò aih, Philat chaq trong đòiq ca'naih Haq, mahaq wì mangai Yothaiq creo bàu dêh doi: “Tàng ìh ca'naih Mangai cô, ìh ùh xài bua da Sêsa. Mangai leq ma doi dađeh broq bùa, èh mangai aih enh ta'blêq ca Sêsa.”
13 Jò Philat tàng bàu cô, haq 'ràng Jêxu loh enh gùng. Haq ha'ngui ta gèq hadrah wì creo, Nòi Xap Hmu, bàu Yothaiq doi, Ga-ba-tha. 14 Manàiq Hì Padon Caq Lè Lam Cwa trùh ten mòiq jàt baiq jò.
Philat doi ca wì mangai Yothaiq: “Cô Bùa pì.”
15 Mahaq wì creo bàu dêh doi: “Jêh cađac Haq! Jêh cađac Haq! Tiang đình Haq ta long pagat.”
Philat doi ca wì: “Au tiang đình Bùa pì ta long pagat 'mòh?”
Wì pajàu càn padreo hlài bàu: “Enh gùng ca Sêsa, nhèn ùh i ca bùa.”
16 Khoi èh, haq am ca wì Jêxu waq ca wì tiang đình Haq.
Jêxu 'Bìq Wì Tiang Đình
Wì rùp Jêxu hi 'nong Haq lam. 17 Haq xùi dèh long pagat trùh ta nòi Cadôh, bàu Yothaiq doi, Gô-gô-tha. 18 Wì tiang đình Haq ti aih. I baiq ngai ma 'noiq hòm hadai 'bìq tiang đình troi Haq, mòiq ngai mòiq apah, Jêxu ŏi ta'ne.
19 Philat thê wì broq mòiq capiac long ban atua nòi long pagat Haq. Ta long ban aih, achìh 'màng cô: Jêxu Mangai Na-xa-ret, Haq Bùa Mangai Yothaiq. 20 I bàc Ngai Yothaiq jah đŏc bàu cô, ma jah 'màng aih nòi ma wì tiang đình Jêxu haten ca phôq. Khoi achìh chù cô xam bàu Yothaiq, bàu Rôma, bàu Hilap. 21 Wì pajàu càn Yothaiq doi ca Philat: “Apaq achìh: ‘Bùa Diac Yothaiq,’ mahaq phai achìh: Haq doi: Au broq Bùa jàn Yothaiq.”
22 Philat tèo: “Bìac ma au khoi achìh, đòiq 'màng 'mat raq.”
23 Jò wì mangai lình khoi tiang đình Jêxu, wì yŏc eo Haq, axong pôn phàn, mòiq ngai mòiq phàn, mahaq eo yôh ùh i ca trong jìp, khoi jah tenh enh 'nhèq trùh ta 'neq.
24 'Màng aih, wì doi: “Apaq hich eo cô. Bèn pàih panàih beq, loq jah cabô.”
Wì khoi broq bìac cô đòiq xìt ca Bàu Sech Hadròih khoi achìh:
“Wì axong eo Au,
wa pàih panàih waq ca loq eo yôh Au jah cabô.”a
Wì mangai lình khoi broq troq bìac cô.
25 Mahaq i miq Jêxu wa daq miq, aih Mari mai Clôpa, wa Mari Ma-đò-len, wì yòng haten ca long pagat Jêxu. 26 Jò Jêxu hnoq miq Haq wa mangai hŏc tiaq cô ma Chuaq loq waq ca haq, Haq doi ca miq Haq: “Miq ôi, haq con ìh.” 27 Hi khoi, Haq doi ca mangai hŏc tiaq aih: “Cô miq ìh.” Pang aih, mangai hŏc tiaq cô 'ràng miq Jêxu ahlài dèh ta hnem wèq haq.
28 Khoi èh, Jêxu khoi loq rìm bìac dìq dŏng khoi broq gêh đòiq jah xìt troi bàu ma khoi achìh ta Sech Hadròih, Haq doi: “Au croh ranŏng.” 29 Jang aih i mòiq toq padrì ùc bình diac jòq. Wì yŏc mòiq cato yù dayan chùq ta diac jòq, càt ta hamenh long xônh, dèch ahacùng Haq. 30 Jò Jêxu khoi ôq diac jòq cô, Haq doi: “Dìq ca hiniq khoi gêh!” Khoi ca aih, Haq cùp gàu, hi 'noh dèh mahua yiang.
31 Hì aih Hì Padon Caq Lè Lam Cwa. Wì mangai ma wèq cwìang mangai Yothaiq, ùh enh đòiq hanang ŏi ta long pagat ta hì Sabat taiq hì aih hì càn. 'Màng aih wì xìn Philat am ca wì tong tagoh caxènh tangon wì đòiq 'noh hanang loh ha'neq. 32 Wì mangai lình trùh ti mangai baxèm, wì tong tagoh caxènh tangon haq, wa mangai 'noiq hadai ma wì khoi tiang đình adrình ca Jêxu. 33 Mahaq jò wì trùh jang Jêxu, wì hnoq Haq khoi cachìt. Wì ùh broq tagoh caxènh tangon Haq. 34 Mahaq i mòiq ngai lình yŏc jaoq bìt caxènh himìa Haq. Tajòi 'mòi i mahem wa diac loh. 35 Mangai ma hnoq bìac cô anoi hlài bàu cô. Bàu cô joq 'nàng, wa mangai aih loq ca dađeh capoch joq 'nàng waq ca pì hadai lùi. 36 Bìac cô, aih broq xìt troi bàu ma Sech Hadròih khoi achìh: “Ùh i mòiq toq caxènh leq da Haq jah tagoh.”b 37 I brong ma 'noiq ŏi ta Sech Hadròih khoi achìh: “Wì jah ngan Mangai wì ma khoi bìt.”
Bìac Catùh Chuaq Jêxu
38 Khoi èh, i Jôsep mangai ŏi plài A-ri-ma-thê, aih mangai hŏc tiaq Jêxu, mahaq haq tiaq đeh hlèp taiq Haq yùq crè ca mangai Yothaiq. Haq bòch Philat xìn yŏc 'ràng hanang Jêxu. Philat am. 'Màng cô haq lam yŏc hanang Jêxu, 39 wa i Ni-cô-đem, mangai jò aih nèh i trùh ta Jêxu damang, hadai lam tiaq Jôsep. Haq 'ràng jah piq jàt pôn kìq mùc jùac wa riah lô hôiq. 40 'Màng cô wa 'noh hanang Jêxu, wa yŏc bai habùac wa jrêu caxop hanang Haq tiaq ranenh catùh hanang mangai Yothaiq. 41 Nòi ma wì tiang đình Haq i wùan. Ta cô i còp hmu broq ralùng neo 'nhòq lah đòiq cabô. 42 'Màng cô, taiq ten trùh hì Lè Lam Cwa da mangai Yothaiq, wa ralùng còp hmu haten ti aih, wì 'mùt prôih hanang Jêxu ta aih.