Diac Loh Enh Hnem Cùh Waiq
47
1 Atìq ca aih, mangai aih 'ràng au trùh jang 'mang hnem cùh waiq; 'Màng aih cô! Au hnoq i diac loh enh 'neq ca radua 'mang, tangìa pah mat mahì loh; taiq ngìa hnem tangìa pah mat mahì loh; wa 'bài diac aih loh enh 'neq pah 'ma hnem, pah 'ma ca mat mahì loh ca'bŏng cùh waiq. 2 Mangai aih 'ràng au loh ti 'mang pah 'ngeo ca mat mahì loh, wa 'nong au lam dudan ti trong enh gùng, trùh 'mang enh gùng, aih trong 'mang pah mat mahì loh; 'Màng aih cô! Au hnoq i diac loh pah 'ma.3 Mangai aih 'ràng au lam ta pah mat mahì loh, tì wê mòiq hadrang caxi, wêh jah 1.000 hagat; mangai aih 'nong au pùh cwa diac; diac bu pàng mat ca. 4 Mangai aih wêh jah mòiq ngŏng, hi khoi 'nong au pùh cwa diac, diac bu trùh pàng cucràng au. Mangai aih wêh jah mòiq ngŏng, hi khoi thê au pùh cwa diac, diac trùh pàng ca'nam. 5 Mangai aih wêh hòm jah mòiq ngŏng hòm; manàiq aih mòiq toq diac cròng au pi jah pùh cwa; taiq diac khoi tŏc ha'nhèq, ep glài; aih mòiq toq diac cròng ma wì pi jah pùh cwa. 6 Jò aih mangai aih doi ca au: “Ô con mangai, ìh hnoq ùh?” Khoi èh mangai aih 'nong au wìh hlài nòi 'bùc diac. 7 Jò khoi trùh ta aih, cô, enh pah cô wa pah tau ca 'bùc diac i bàc long. 8 Mangai aih doi ca au: “'Bài diac cô hìu trùh pah mat mahì loh, loh ta nòi đùng tamang, wa hìu loh ta diac raxìq; jò khoi hìu loh ta diac raxìq, diac raxìq jah wìa diac nhim. 9 Nòi leq diac hìu trùh, rìm ngè rìh, aih ngè rìh ta diac, dìq dŏng jah rìh hlài; wa ŏi ta aih i bàc ca; diac aih trùh diac raxìq loh diac nhim, wa nòi leq diac aih trùh èh rìm ngè jah rìh ta aih. 10 'Bài mangai ranang ca jah yòng ti kenh diac aih; enh Ên-gê-đi trùh Ên-ê-gla-im, aih nòi đòiq tang hlàm; 'bài ca ta aih i tôm taih bàc hiniq, hadai tìah ca diac raxìq càn. 11 Mahaq dìq ca nòi ròc lai ùh jah loh diac nhim; nòi aih đòiq broq boh. 12 Haten ca diac aih, ti kenh pah cô wa kenh pah tau, jah hon tôm taih long i plì wìa caq, hla haq ùh hadrùih, wa plì haq ùh 'nì dìq. Rìm hì haq loh plì neo, taiq 'bài diac ma pùc haq aih loh enh nòi hadròih. Plì haq đòiq caq, hla haq đòiq broq jreo ôq.”
Acang Wa Bìac Lah Axong Taneh
13 Chuaq Boc Plình doi: “Cô acang da taneh ma pì jah axong am ca mòiq jàt baiq hadròng hadrech Is-ra-ên broq xôxech. Jôsep jah i baiq phàn. 14 Pì jah yŏc, èh axong ca dabau broq xôxech; taiq Au khoi hùaq am gùng cô ca boc yaq pì, èh pì jah yŏc taneh aih broq xôxech.
15 “Cô acang da taneh:
Pah 'ngeo ca mat mahì loh, enh diac raxìq càn, tiaq trong Hêtlôn trùh Xêđat, 16 Hamat, Bêrôt wa Sip-ra-im, ta'ne acang Đamach wa acang Hamat, Hat-se-hat-thi-côn ta acang Hauran. 17 'Màng aih Acang aih enh diac raxìq Hat-sa-ê-nan, trùh acang Đamach pah 'ngeo ca mat mahì loh, wa trùh acang Hamat pah 'ngeo ca mat mahì loh.
18 Pah mat mahì loh, enh Hauran, Đamat, Ga-la-at wa taneh Is-ra-ên, roc tiaq diac Jôđan, trùh Tama, aih acang pah mat mahì loh.
19 Pah 'ma ca mat mahì loh yŏc enh Thama lam trùh diac cròng Mê-ri-ba, ta Cađe trùh thòng Aicàp, trùh diac raxìq; aih pah 'ma ca mat mahì loh.
20 Pah mat mahì mùt jap diac raxìq, enh acang pah 'ma ca mat mahì loh trùh trong mùt Hamat; aih pah mat mahì mùt.
21 “Pì khòh lah axong taneh cô am ca dabau, tiaq hadròng hadrech Is-ra-ên; 22 Pì khòh pàih panàih èh lah axong am ca pì wa am ca 'bài mangai Diac 'noiq ma ŏi ta pì wa xa-ông con ta pì. Pì ngan wì haq tìah ca mangai mòiq tamoi ŏi ta'ne con caiq Is-ra-ên. Wì haq hadai jah cùng hang ti pì ŏi ta hadròng hadrech Is-ra-ên. 23 Mangai Diac 'noiq ŏi ta hadròng hadrech leq, èh pì jah yŏc cùng hang ta aih am ca wì haq.” Chuaq Boc Plình doi 'màng aih.