Bìac Ranàc Padon Trùh ca Is-ra-ên
“ ‘Bìac pulùch khoi trùh;
bìac pulùch khoi trùh ta pôn pah da crŏng taneh.
3 Cô bìac lùch da ìh hadai khoi trùh,
Au ùc 'noh can nòih Au ca ìh.
Au baxa ìh tiaq bìac broq da ìh,
Au ca'naih hlài da ìh bìac broq dìq jaq ramòt ma ìh khoi broq.
4 Mat Au ùh xa-ŏch ca ìh
wa ùh dèch dŏih ìh,
mahaq Au ca'naih hlài da ìh tiaq bìac ma ìh khoi broq,
aih bìac ramòt da ìh ta'ne ìh;
èh ìh jah loq Au cô Chuaq.’
5 “Chuaq Boc Plình doi: Cô bìac dìq jaq ramòt 'nang lam trùh!
6 “ ‘Bìac atìq lùch da ìh khoi trùh!
Bìac atìq lùch da ìh khoi trùh;
cô haq 'nang lam trùh ta ìh.
7 Ô dìq ca jàn ta gùng,
hì lùch da pì khoi trùh haten ca pì,
hì aih khoi trùh.
Hì jah i bàu cachech ta-oih ta bôi wang,
thai ca bàu lem bùi manè pôi.
8 Cô Au ùc can nòih Au loh ta ìh,
ùc dìq can nòih da Au ca ìh;
Au hadrah ìh tiaq bìac broq da ìh;
Au jah ca'naih da ìh tiaq bìac broq dìq jaq ramòt da ìh.
9 Mat Au ùh xa-ŏch ìh wa ùh dèch dŏih ìh,
ma jah 'màng aih,
Au yŏc bìac broq da ìh ca'naih hlài da cla ìh,
rìm bìac ramòt da ìh jah tabroq hlài ca ìh,
èh ìh jah loq Au cô Chuaq ma baxa ìh.
10 Cô, hì aih khoi trùh!
Hì aih 'nang trùh!
Bìac jêh đac khoi baxèm;
long hadrah khoi baxèm,
bìac loq catèh khoi trùh hì lùch.
11 Bìac hùng hang khoi yòng
tìah ca long jah blai wì haq taiq ngang dù wì.
Ta wì haq ùh mòiq ngai leq jah rìh;
cùng hang wa rìm bìac rahù wì haq hadai pi ŏi i.
12 Jò pajaq khoi trùh.
Mangai rŏt paq lem bùi,
mangai tech paq mango,
ma jah 'màng aih can nòih jah loh trùh ta dìq ca wì.
13 Joq 'nàng mangai tech ùh jah rŏt hlài dèh ngè haq khoi tech,
'nhac ca cla haq ŏi jah rìh,
ma jah 'màng aih bìac doi adroi ca jàn Is-ra-ên
joq 'nàng khoi trùh,
taiq rìm ngai khoi rìh tiaq dèh tôiq lôi cla,
'màng aih ùh mangai leq jah wèq dèh can rìh.
14 “ ‘Wì haq khoi hlôi ken tagop dabau wa rìm
bìac khoi jah padon đòiq,
mahaq ùh i mangai leq loh nòi tajêh,
ma jah 'màng aih can nòih Au khoi lam trùh dìq ca wì.
15 Mòiq phàn piq ŏi ta pì cachìt ca jìq blôh wa bìac pangot hrah,
mòiq phàn piq cachìt ca chang gùm ca wì pôn pah;
mòiq phàn piq hòm Au broq ca wì haq pac lac jàp gùng,
èh au dŏih chang gùm tiaq enh cloh ca wì haq.
16 Tàng mangai leq jah claih,
cadàu mot ta wang tìah ca chìm trù ŏi nòi gàu thòng;
rìm ngai èh crò hmoi
taiq tôiq cla wì haq.
17 Rìm capiang tì loh ca tagah lep,
rìm cucràng loh ca tabat tìah ca diac.
18 Wì caxùnh eo xam bai briang,
bìac 'mèq ranàc khoi paclùm ca wì haq;
rìm ngai jah camaih,
rìm gàu dìq tangùn.
19 “ ‘Wì haq jah hwenh đac dèh 'bac ti trong.
Wang loh ca dahwèq amùa,
ma jah 'màng aih wang loq 'bac
ùh jah dèch cla wì haq ta hì can nòih da Chuaq;
ùh jah broq ca wì haq brêh ca pangot loq jah panàc cliac,
taiq dahwèq aih raq broq ca wì haq cro ta tôiq lôi.
Hnem Cùh Waiq Khoi 'Bìq Broq Amùa Amech
20 Wì haq yŏc ngè padì xam wang,
broq loh dua 'mù dìq jaq ramòt đòiq cùh waiq,
aih joq ngè dìq jaq ramòt.
Taiq 'màng aih Au jah broq 'bài ngè
aih loh ca ngè amùa ca cla wì haq.
21 Au jah am ngè aih ca mangai Diac 'noiq broq ngè jah jò tajêh,
wa am ca mangai ngang dù ta crŏng taneh,
èh wì haq broq ngè aih loh amùa amech.
22 Au wìh đac mat khoi ca wì haq,
taiq wì aih broq amùa nòi hadròih da Au;
lình ma dìq jaq ngang dù jah mùt nòi aih,
broq ca nòi aih loh ca amùa 'mèq.
23 “ ‘Padon đòiq 'bài hadrang caxi xam mem beq!
Ma jah 'mang aih taneh cô khoi broq ta-ùc mahem,
phôq cô bình halùih bìac ngang dù.
24 'Màng aih, Au 'ràng trùh 'bài mangai dìq jaq ngang dù
đòiq ta'miaq yŏc taneh wa hnem wì haq.
Au broq bìac ma loq padèch dađeh da mangai dêh loh ca pat;
rìm nòi hadròih da wì haq loh ca amùa amech.
25 Jò bìac ta-oih trùh,
wì chaq nòi catèm, mahaq ùh i.
26 Bìac ranàc cô 'nhòq dìq khoi trùh ca bìac ranàc tau,
bàu dù cô 'nhòq dìq, khoi trùh ca bàu tau.
Wì chaq bìac mahno hnoq ti 'bài mangai capoch thai Boc Plình,
bàu ranenh da 'bài pajàu wa bìac tah bàu da craq broq gàu jah 'bìq hnhung.
27 Bùa loh ca crò hmoi, mangai wèq cwìang loh ca yùq crè,
mangai jàn loh ca tarìt.
Au tabroq ca wì haq tiaq bìac caq ŏi da wì haq;
Au jah hadrah wì haq tiaq bìac broq da wì haq.
Èh wì haq jah loq Au cô Chuaq.’ ”