Chuaq Nòih ca Jê-ru-sa-lem
2
1 Chuaq yŏc can nòihtìah ca yùc clam paclùm ca phôq lem lình da Jê-ru-sa-lem.
Enh plình ha'nhèq Haq khoi ca'nìh đac
trùh ta taneh can 'ngah 'ngai da Is-ra-ên,
ta hì nòih Ìh ùh hmàng trùh dèh
ca long thòt.
2 Chuaq khoi raliang đac
nòi da Jacôp ùh xa-ŏch toq xit,
Haq hadai raliang đac đôn hanình phôq
lem lình da Jê-ru-sa-lem ta jò Haq nòih,
Haq khoi broq ca wì cro trùh taneh,
hadai broq camaih ca Taneh Diac wa xam cwan bùa ta aih.
3 Ta jò dìq jaq nòih,
Haq khoi goh đac aki da Is-ra-ên;
Haq dèch đac tì pah 'ma Haq,
am ca mangai tagit jah mùt.
Ta nòi Jacôp Haq khoi bùh wawenh
đac dìq dŏng xam ùnh tôq dìq jaq.
4 Chuaq dèch tì 'nat panenh
tìah ca mangai tagit,
Haq pagang tì pah 'ma tiaq mangai tagit,
hi khoi Haq tajêh dìq ca mangai i hadrò ma lem;
Ta phôq Jê-ru-sa-lem lem lình,
Haq ùc can nòih xrông da Haq tìah ca ùnh.
5 Chuaq khoi tìah ca mangai git.
Haq khoi lŏn jàn Is-ra-ên;
Haq khoi lŏn dìq ca hnem bùa;
Haq khoi raliang đac đôn hanình da haq,
broq ca mangai da Juđa tŏc tam bìac ha-on.
6 Chuaq khoi raliang đac Dèh hnem cùh waiq,
broq ca 'mat bu dàng raliang đac wia;
Haq khoi raliang đac nòi tagop da con jàn Haq;
Haq khoi broq ca hì lè wa hì Sabat ùh jah hmàng trùh hòm ta Jê-ru-sa-lem.
Ta jò dìq jaq nòih Haq khìn đac
hloi bùa wa pajàu da Haq.
7 Chuaq 'noh đac ca'bŏng cùh waiq,
wa cađac dèh nòi hadròih;
Haq khoi am panàt
wa hnem bùa Jê-ru-sa-lem ca mangai tagit;
wì cachech cajiah ta hnem Chuaq
tìah ca hì lem bùi i lè càn.
8 Chuaq khoi dì ca raliang
đac panàt da phôq lem lình da Jê-ru-sa-lem;
Haq khoi tang caxi đòiq wêh phôq,
Haq ùh padràng tì enh bìac raliang đac,
Haq khoi broq ca pagia enh trom,
lì enh gùng wa dìq bìac crò hmoi mango ta manoh.
9 'Bài ngo phôq hlòp dìq ta taneh,
Chuaq khoi raliang đac wa hadai goh hloi long clòng ngo,
dìq ca bùa wa 'bài cwan khoi 'bìq hnan đac hangai dèh ca gùng,
ranenh hadai pi i hòm;
'bài mangai capoch thai Boc Plình pi jah
bìac mahno leq enh Boc Plình.
10 'Bài mangai craq da mangai phôq lem lình da Jê-ru-sa-lem
ha'ngui paglình ta taneh,
caxùnh bai briang
rai blo tanùh ta gàu.
'Bài gù adrùh da Jê-ru-sa-lem
bla-op cùp gàu ta taneh.
11 Mat au loh ca pònh taiq loh diac mat bàc;
yiang au hlè lèt wa manoh au khoi padah
taiq jàn au khoi 'bìq raliang,
wa jò con 'yoh wa con nga hlach ta trong phôq.
12 Wì crò hmoi dèh ca miq rai bòch:
“Miq ôi! dahwèq caq wa diac ôq ŏi ta leq?”
Khoi èh wì haq hlach
tìah ca mangai 'bìq habau roc trong ta phôq,
jò wì haq da-adia pat hihèm
dèh ta achong miq ma dìq jaq loq waq.
13 Ô mangai da Jê-ru-sa-lem,
au capoch 'màng leq cô èh?
Au achùa ìh wa cabô?
Ô mangai da Jê-ru-sa-lem,
au achùa ìh wa cabô đòiq jah alòng ìh?
Ma jah 'màng aih bìac raliang da ìh càn dàng diac raxìq;
Cabô nui broq hlài?
14 'Bài mangai capoch thai Boc Plình
da ìh khoi capoch amòng ca ìh wì 'nùt ìh;
wì ùh pa'noh tôiq ìh đòiq ìh jah dèch khoi ca broq hapŏng dìch,
mahaq wì toq mahno ca ìh bìac amòng wa padô 'nùt.
15 Dìq mangai lam trong tep tì,
ngu ngìu gàu wa hanip Jê-ru-sa-lem, rai doi:
“Cô joq phôq wì ma doi dìq jaq lem wa tôm gêh,
aih nòi jah broq lem bùi da crŏng taneh 'mòh?”
16 Dìq ca mangai ma tagit ca ìh hah hacùng
capoch 'mèq ca ìh;
wì bahech ca dabau cadrit hanenh bùi ta manoh doi:
“Yàng cô bèn khoi jah lŏn adrìh haq!
Bèn gòm hì cô khoi dùnh,
mahaq manàiq bèn khoi jah hnoq enh ngìa ca bèn.”
17 Chuaq broq bìac Haq khoi pachì,
pagêh bàu Haq khoi anoi calah nèh,
Haq hacùp đac ùh toq xit manoh xa-ŏch,
Haq broq ca mangai tagit ca ìh jah lem bùi;
Haq broq tadêh tam aki wì haq.
18 Manoh wì haq dang
creo ca Chuaq:
“Ôi panàt da Jê-ru-sa-lem,
đòiq diac mat da ìh hìu dahì damang tìah ca diac cròng!
Ìh ùh jah hatenh!
Wa mat ìh ùh jah padài.
19 “Yòng beq, dang creo ca Chuaq jò 'ne mang,
wa rìm jò baxèm da mangai yòng gòm damang;
ùc dèh manoh enh ngìa ca Chuaq tìah ca ùc diac,
dèch baiq pah tì beq ta ngìa ta Chuaq dang xìn Haq thai ca con 'yoh da ìh,
ma jah 'màng aih wì haq khoi hlach tacro roc trong
wa ti ngo phôq taiq pangot.”
20 Chuaq ôi, ngan hlài beq.
Ìh khoi lah baxa bô ma hrìn hran 'màng cô ùh?
'Bài mangai miq phai caq dèh jam con đòiq jah rìh 'mòh?
Aih mangai con ma cla wì haq dìq jaq loq waq,
khoi èh 'bài pajàu ìh wa mangai capoch thai Boc Plình phai 'bìq jêh
cachìt ta hnem cùh waiq da Chuaq cô 'mòh?
21 Mangai 'yoh mangai craq cùi rapàc
roc trong ta phôq;
gù radam gù adrùh
tacro cachìt ca chang gùm;
hì Chuaq nòih Haq jêh mangai
ùh toq xit manoh loq xa-ŏch.
22 “Ìh khoi creo bìac ramòt enh rìm nòi lam trùh,
tìah ca Ìh creo wì lam trùh ta hì caq hiniang dìq jaq càn.
Hì Chuaq nòih,
ùh mòiq ngai leq jah claih wa jah rìh.
'Bài con Au ma ca'mìn wa wèq ban,
mangai tagit khoi jêh dŏng khoi dìq.”