7
1 'Bang tìang lem yi hnao ca dàu canaq 'bac,wa hì cachìt lem yi hnao ca hì xa-ông.
2 Trùh nòi lòm hanang,
yi hnao ca trùh nòi caq hiniang,
taiq mangai leq hadai cachìt,
'màng aih mangai leq ma ŏi rìh ep ngan hlài dađeh.
3 Mango yi lem ca baxùh do, ma jah 'màng aih jò hadrò mango,
èh manoh jah loh yi lem.
4 Manoh hèm da mangai khôn rabiaq ŏi ta nòi crò hmoi,
mahaq manoh hèm da mangai blùng ŏi ta hnem baxùh do.
5 Tamàng bàu tagàih lech da mangai khôn rabiaq,
yi lem ca tamàng bàu mangai blùng calêu.
6 Ma jah 'màng aih bàu do da mangai blùng bu dàng long hila bùh cheo
i atêh đoh ta tanùh enh 'neq ca gŏc.
Bìac cô hadai bìac dech 'ngwan.
7 Mangai rabiaq ma 'bìq padit èh loh ca blùng,
dahwèq rŏt manoh broq loh ca manoh 'mèq 'mac.
8 Broq gêh mòiq bìac,
yi hnao ca baxèm mòiq bìac; chìuq àt yi hnao ca catèh.
9 Apaq loq enh nòih hon,
ma jah 'màng aih can nòih hon khoi gòm ŏi ta manoh mangai blùng.
10 Apaq bòch: “Gleq 'nhòng adroi yi lem ca 'nhòng manàiq?”
Tàng bòch 'màng aih ùh xài khôn rabiaq.
11 Bìac khôn rabiaq wa jah hùang xôxech,
aih lem ca con mangai rìh hnoq mat mahì.
12 Ma jah 'màng aih bìac khôn rabiaq wèq ban ca dađeh
tìah ca 'bac jèn wèq ca dađeh,
mahaq mangai i can khôn rabiaq yi hnao,
ma jah 'màng aih haq jah wèq can rìh dađeh.
13 Hèm haboq ca bìac Boc Plình beq;
bìac cleq Boc Plình broq tawech,
i cabô jah broq jang hlài ùh?
14 Glàm jò padrŏng can, lem bùi nhàn yŏc beq,
mahaq jò 'bìq baxa thù, hèm haboq beq,
ma jah 'màng aih baiq hì aih trùh ca bèn dìq Boc Plình thê,
đòiq loq ma ro con mangai ùh jah loq bìac dang ngìa trùh ca bèn 'màng leq.
Bìac Khôn Rabiaq, Bìac Ta-atoq, Bìac Ngang Dù
15 Ta 'nhòng rìh dech 'ngwan da au, au khoi ngan hnoq bàc bìac xa ca 'nì loq:
I mangai ta-atoq cachìt xrŏih 'nhac ca haq rìh ta-atoq;
mangai dù rìh dùnh, 'nhac ca haq rìh dù.
16 Apaq broq dađeh ta-atoq hrìn,
hadai apaq broq dađeh khôn rabiaq hrìn.
Gleq ma ràih yŏc ca dađeh bìac ranàc?
17 Apaq broq dađeh dù hrìn,
hadai apaq lam trong blùng.
Gleq ma phai cachìt adroi ca jò pajaq.
18 Lem yi hnao aih, apaq doi dađeh ta-atoq, apaq doi dađeh khôn rabiaq,
èh dêh nhang ta'blêq ca bìac dù.
Ma jah 'màng aih mangai leq yùq crè ca Boc Plình, jah i baiq hiniq aih.
19 Mòiq ngai canòm dèh ca khôn rabiaq broq padren,
yi dêh ca mòiq jàt ngai wèq cwìang ta phôq.
20 Joq 'nàng ùh i mòiq ngai ta-atoq leq ŏi crŏng taneh cô hloi hloi broq bìac lem,
ùh broq tôiq.
21 Apaq tamàng atùng rìm bàu khoi capoch,
yùq ìh loq tàng bàu hapŏng ìh hanip ìh.
22 Ma jah 'màng aih ìh hadai khoi bàc yàng hanip mangai 'noiq.
23 Au khoi ngan thù dìq ca bìac aih xam manoh khôn rabiaq wa doi:
“Au jah khôn rabiaq,”
mahaq bìac aih xôq ŏi hangai ca au.
24 Rìm bìac ma khoi trùh dìq hangai wa halac halùai.
Cabô jah chaq hnoq?
Hèm Trùh Bìac Con Mangai
25 Au hatình ca manoh hèm waq ca loq,
ti chaq wa ti ngan bìac khôn rabiaq,
wa bìac patô waq ca loq ngang dù da bìac blùng
wa bìac ranhùa.
26 Au ngan hnoq manoh mangai cadrì i bàc trong loq alùan,
broq loh bìac pagao pagùa yi hnao ca bìac cachìt.
Manoh haq tìah ca hlàm, tìah ca gùi,
tì haq bu dàng caxi mem griaq.
Mangai leq loq iu Boc Plình jah claih ca haq,
mahaq mangai broq tôiq èh jah 'bìq haq rùp.
27 Mangai anoi hnài doi:
“Cô bìac au jah hnoq atìq ca au ti gop dŏng dìq, đòiq chaq bìac patô,
28 mahaq 'nhòq chaq hnoq.
Ta mòiq ngŏng ngai con calô au khoi hnoq mòiq ngai lem jang,
mahaq mòiq ngai cadrì lem jang au chaq ùh hnoq.
29 Cô bìac au ma chaq hnoq:
Boc Plình broq loh con mangai i manoh lem jang,
mahaq cla con mangai to broq dèh ca manoh loh dù.”