Bìac Ngang Dù Da Padit Padiang
4
1 Au wìh hlài ngan bìac padit padiang 'nang broq enh 'neq mat mahì.Au hnoq mangai 'bìq padit loh diac mat bàc,
mahaq ùh i mangai leq alòng wì haq;
mangai ma padit i cwìang,
mahaq mangai 'bìq padit ùh i cabô alòng wì!
2 Taiq 'màng aih au hèm mangai khoi cachìt
yi xùang ca mangai ma 'nang ŏi rìh.
3 Mahaq ma yi xùang ca wa baiq ngai tau,
aih mangai ma 'nhòq xa-ông,
taiq haq 'nhòq hnoq bìac ngan
dù da con mangai broq loh enh 'neq ca mat mahì.
4 Au khoi hnoq rìm bìac wa rìm bìac broq ragài, aih khoi broq loh nhò tagìq tagìa ta'ne mangai wa mangai haten hatìa. Aih hadai bìac dech 'ngwan wa hnan tiaq cayeo.
5 Mangai blùng ha'ngui cwat bao
broq ca dađeh 'bìq raliang.
6 Mòiq tì bình catèm lem yi hnao ca baiq tì bình mahaq xa lep wa hnan tiaq cayeo.
7 Èh au wìh hlài ngan hòm, hnoq bìac dech 'ngwan enh 'neq ca mat mahì.
8 I mangai calô,
ùh i ca con, ùh i ca oh daq,
mahaq haq xôq broq xa lep dìq jaq ùh padài.
Joq 'nàng, mat haq ùh loq mech jò ngan hnoq cùng hang;
haq ùh jò leq hèm: “Nhet ca cabô au abroq xa lep
wa hangah ca dađeh bìac baxùang?”
Aih hadai bìac dech 'ngwan
wa bìac broq mango.
9 Baiq ngai lem yi hnao ca mòiq,
taiq wa haq broq pajùm hadai jah i lòiq tam.
10 Ma jah 'màng aih tàng mòiq ngai tacro,
mangai bua dèch haq.
Xa đeh dìq jaq ca mangai rìh mòiq ngai,
jò tacro ùh i ca cabô dèch haq.
11 Hadai 'màng aih, tàng baiq ngai cùi pajùm jah hatôq,
mahaq tàng cùi toq mòiq ngai, haq jah hatôq 'màng leq?
12 Tàng mòiq ngai ta'blêq haq ma ŏi mòiq ngai,
èh baiq ngai jaq ta'blêq hlài haq;
mòiq toq caxi mahaq i piq hadrang caxenh hlài ùh xùang ca catech.
13 Mòiq ngai 'yoh hanam pa, mahaq i khôn rabiaq, yi hnao ca bùa càn hanam padrŏng can mahaq blùng, ùh tamàng hòm bàu pariaq hnài da mangai 'noiq. 14 Ma jah 'màng aih mangai 'yoh hanam loh enh hnem tù tŏc broq bùa, 'nhac ca haq xa-ông loh đeh nòi dìq jaq ùh nèn ta Taneh Diac cô. 15 Au khoi hnoq rìm ngai rìh ŏi crŏng taneh cô dìq yòng enh mangai 'yoh hanam tau, ma jah 'màng aih haq mangai ma jah thai broq bùa. 16 'Bài jàn ma yòng iu bùa cô dìq jaq bàc, mahaq 'bài mangai ma atìq ca haq ùh iu haq. Bìac aih hadai dech 'ngwan wa hnan tiaq cayeo.