Bàu Pariaq Hnài Rabiaq
26
1 Bìac loq iu ùh tajì ca mangai blùng,tìah ca twiac ta jò padrang, tìah ca mè ta jò gat 'mau.
2 Tìah ca chìm xê pan ta cô ta tau, tìah ca chìm plahaiq gliang dàc gliang jùa,
bàu waiq hanip ùh i ca nen trùh hadai 'màng aih.
3 Caxi roi đòiq ca axêh, caxi khàp wèq đòiq ca lùa,
wa long roi đòiq ca crŏng mangai blùng.
4 Apaq tèo bàu mangai blùng troi bìac blùng haq,
yùq ìh loq tìah troi haq.
5 Tèo bàu ca mangai blùng tajì ca bìac blùng haq,
èh yùq haq xoh dađeh rabiaq.
6 Mangai leq nhò mangai blùng lam bahìa bàu,
ùh crài cleq ca pŏt đac dèh jènh wa pòq bìac raliang.
7 Tìah ca jènh mangai cwê tadai ùh i ca lòiq;
mòiq bàu rabiaq ta hacùng mangai blùng hadai 'màng aih.
8 Padèch mangai blùng,
aih tìah ca tah hmu ta wòt tèm hmu.
9 Mòiq bàu rabiaq ŏi ti hacùng mangai blùng,
bu dàng hila hin ta tì mangai bù ca alac.
10 Cabô bòch baha mangai blùng wa tamoi lam cwa,
tìah ca mangai penh panenh broq loh habau ca rìm ngai.
11 Mangai blùng broq hlài dèh bìac blùng,
ùh crài cleq ca coq hac, khoi èh lìah hlài dèh hac.
12 Ìh i hnoq mangai leq hèm dađeh khôn rabiaq tiaq dèh mat cla ùh?
Mangai blùng jah ŏi i bìac ngèh gòm yi hnao ca haq.
13 Mangai aroh doi: “I baco hlari ti trong;
mòiq toq baco ŏi ta'ne phôq.”
14 Mangai aroh cadro cadria dèh ta jùang,
ùh crài cleq ca 'mang dai dađeh ti ban lè.
15 Mangai aroh 'bŏc tì ta dòt,
lep tagah ca dèch tŏc ti hacùng.
16 Mangai aroh hèm dađeh khôn rabiaq
yi hnao ca tapèh ngai tah bàu khôn rabiaq.
17 Mangai leq 'mùt dađeh ta bìac tarahen ti trong, 'nhac ca bìac aih ùh đùng trùh haq,
ùh crài cleq ca mangai rùp baiq don coq.
18 Mangai leq tèm ùnh cheo, penh panenh,
wa broq loh bìac cachìt,
19 ùh crài cleq ca mangai ranhùa 'nùt dèh mangai haten hatìa,
khoi èh doi: “Au toq baxùh oq.”
20 Ùnh pat taiq thìuq long ùnh;
jò pi i mangai ha-ìa, bìac tarahen jah hêq.
21 Tìah ca cachah bùh loh ngìa ùnh, wa long tah ta ùnh;
mangai loq ta'miaq broq loh tarahen hadai 'màng aih.
22 Bàu mangai ha-ìa tìah ca dahwèq caq jìang,
mùt trùh ta cliac.
23 Blìa hacùng 'noh bàu lem mahaq manoh dù,
ùh crài cleq ca abôq taneh lìch xam cràc crac 'bac.
24 Mangai leq git, yŏc hacùng bàu capoch jìang,
mahaq ta manoh haq ban bìac caq jŏng;
25 Jò haq capoch bàu rangot, apaq lùi;
taiq ta manoh haq i tapèh bìac ramòt.
26 'Nhac ca bìac git cadoc ta bìac patìah,
bìac ngang dù haq jah pa'noh ro nòi tagop mangai jàn.
27 Mangai chìa ralùng haq taclìh ta aih; mangai cadro hmu,
hmu cadro lùi troq ca haq.
28 Rapet amòng git ca 'bài mangai haq khoi jôiq nunit đac;
wa hacùng bàu padô alùan broq loh bìac raliang.