Jop Anoi Boc Plình Jah Hadrah Mangai Dù
21
1 Èh Jop tèo:2 “Pì tamàng ma geo bàu au anoi;
aih trong pì jah alòng au.
3 Àt đò ca au beq, đòiq au capoch;
hi khoi ca au capoch, èh pì jah do halê ca au.
4 “Phàn au, au khoi mamùc ca con mangai 'mòh?
Gleq au ùh jah i manoh nòih?
5 Hamrìh ngan au wa hamàih beq;
yŏc tì bàng dèh hacùng beq.
6 Jò au hèm trùh, tajòi 'mòi au hidròt,
au tarìt tariang.
7 Gleq mangai ngang dù jah ŏi rìh,
rìh trùh craq, èh wìa mangai i cwìang?
8 Wì haq ngan hnoq dèh xinoi yòng cajap,
wa con xao wì haq hagao ŏi jang ngìa wì haq.
9 Hnem wì haq jah catèm, ùh crè cleq,
long roi da Boc Plình ùh lah blai chac wì haq.
10 'Bo calô wì loh adrech ùh hìaq thìuq,
'bo can wì xêh ùh hìaq ralech.
11 Wì haq am dèh con 'yoh loh lam pagôq tìah ca calùh trìu,
wa con caiq wì haq baxùh ca dabau.
12 Wì haq calêu tiaq atêh broc wa clùng 'yoh wa lem bùi tiaq atêh taliaq.
13 Wì haq rìh dìq jaq xùang tiaq dèh bìac can padrŏng ta 'nhòng cla;
khoi èh ta'ngàc wì loh ta ralùng hanang.
14 Wì haq doi ca Boc Plình: Ìh wia hangai ca nhèn beq,
ma jah 'màng aih nhèn ùh ngèh enh loq 'nì trong da Ìh.
15 Chuaq I Cwìang Itai Dìq Dŏng, Haq cabô ma nhèn ep patìh ca Haq?
Tàng nhèn creo dang Haq, nhèn jah i lòiq cleq?
16 Ngan cô, Wì haq hèm can padrŏng jah taiq cla tì wì haq broq.
Mahaq au wia hangai ca bàu hèm 'màng aih.
17 “Toq leq yàng đen mangai dù pat wa ranàc ùc ta wì haq?
Jò Boc Plình nòih, Haq loq axong bìac raliang đac loh ca wì haq ùh?
18 Wì haq tìah ca hri 'bìq cayeo hlôi,
wa tìah ca manùh tarŏng tariac jò bahùt trùh ùh?
19 Pì doi: Boc Plình yŏc bìac baxa wì haq đòiq bla èh baxa con caiq wì haq.
Mahaq au doi xìn Boc Plình ta'mòq ca cla haq raq đòiq haq loq ca bìac dađeh khoi broq.
20 Đòiq mat cla haq hnoq dèh bìac haq raliang wa ôq can nòih da Chuaq I Cwìang Itai Dìq Dŏng.
21 Ma jah 'màng aih jò 'nhòng rìh da haq khoi dìq,
haq ùh hèm trùh cleq ca bìac trùh ca cadraq haq bla èh.
22 “I cabô hùa hnài Boc Plình cleq,
taiq cla Haq raq ma hadrah wì 'bình plình ti 'nhèq?
23 Mangai cô cachìt 'nang jò ŏi tadêh,
jah xùang wa catèm rìm trong;
24 Chac hamac haq bech lem,
caxènh wa ngot trom caxènh ŏi lem.
25 Mangai tau hadai cachìt, mahaq 'nhòng rìh da haq toq xa lep hêq,
'nhòq lah 'nì loq bìac xôq ramŏt 'màng leq.
26 Baiq ngai cô dìq ca'nùng ta blo taneh wa hrai glom chac wa haq.
27 “Cô, au khoi loq ca manoh pì,
wa 'bài trong pì ma tình ca raliang đac au.
28 Pì bòch: ‘Hnem mangai rahù ŏi ta leq?
Traiq da mangai ngang dù ŏi nòi leq?’
29 Gleq pì ùh bòch tamoi lam ti trong?
Gleq ùh loq tàng ca bàu wì haq anoi hlài?
30 Hì ranàc khoi padon đòiq am ca mangai ngang dù;
wì haq jah 'bìq 'nong lam ta hì loh can nòih.
31 Cabô hùa lech ca mangai ngang dù ŏi jang ngìa haq?
Cabô hùa broq chao bìac haq khoi broq?
32 Jò haq cachìt wì 'ràng hanang haq ta ralùng hanang,
i mangai gòm rap ralùng haq.
33 'Bài hato taneh broq pà-em ca haq;
'bài mangai lam lòm hanang haq;
'nah ngai lam adroi 'nah ngai lam atìq, bàc pi nui rèn.
34 “'Màng aih, 'màng leq pì ma alòng au xam bàu 'ngwan aih,
taiq pì toq tèo au xam bàu bình bàu amòng?”