Bìac Broq da 'Bài Mangai Lêwi
23
1 Jò Đawit khoi craq, hanam hadai khoi bàc, haq yŏc dèh con Sa-lô-môn tŏc broq bùa Is-ra-ên.2 Haq tagop dŏng dìq mangai Is-ra-ên, 'bài pajàu wa 'bài mangai Lêwi. 3 Mangai Lêwi rèn pang piq jàt hanam dàng tŏc, dìq dŏng jah 38.000 ngai. 4 Ta aih 24.000 ngai wèq bìac broq Hnem Cùh Waiq da Chuaq; wa 6.000 ngai broq cwan wa cwan hadrah. 5 4.000 ngai gòm 'mang ngo, 4.000 ngai calêu padèch hiniq Chuaq xam ranac rawêh nhŏc Đawit khoi broq.
6 Bùa Đawit axong mangai Lêwi loh piq lù tiaq dèh hiniq piq ngai con calô da Lêwi i: Getsôn, Kêhat wa Mê-ra-ri.
7 'Bài con da Getsôn i hiniq:
Lađan wa Si-mê-i.
8 'Bài con calô da Lađan i piq ngai:
Baxèm i Jê-hi-ên, khoi èh trùh ca Xêtham wa Jôên.
9 'Bài con calô da Si-mê-i i:
Sê-lô-môt, Ha-xi-ên wa Haran, piq ngai.
'Bài mangai cô broq gàu da cadraq dèh baq Lađan.
10 'Bài calô da Si-mê-i i:
Jahat, Xina, Jêut wa Bê-ri-a.
11 Jahat broq gàu cadraq, ma tìa i Xixah; mahaq Jêut wa Bê-ri-a taiq 'biaq con xau, 'màng aih baiq cadraq cô broq mòiq.
12 'Bài con calô da Kêhat i pôn ngai:
Amram, Ixha, Hêprôn wa U-xi-ên.
13 'Bài con calô da Amram i:
Arôn wa Môise.
Arôn khoi jah lah crài đòiq dìq jaq hadròih hloi hloi, haq wa con calô haq, đòiq wì haq bùh jrêu xua thùm enh ngìa ca Chuaq, wa patìh Chuaq wa padèch hiniq Chuaq hloi hloi. 14 Mahaq Môise, haq mangai da Boc Plình, 'bài con calô haq khoi achìh 'mùt ta sô hadròng hadrech Lêwi.
15 'Bài con calô da Môise:
Getsôn wa Ê-li-ê-se.
16 Con calô da Getsôn:
Sê-bu-ên broq gàu.
17 Con calô da Ê-li-ê-se:
Rê-ha-bia, haq broq gàu;
Ê-li-ê-se ùh i ca con calô ma 'noiq hòm enh gùng ca Rê-ha-bia, mahaq Rê-ha-bia i bàc con calô.
18 Con calô da Ixha:
Sê-lô-mi, haq broq gàu.
19 'Bài con calô da Hêprôn i:
Jêriah con ramua. Hatìa i A-ma-ria; Piq i Ja-ha-xi-ên wa pôn i Jê-ca-mê-am.
20 'Bài con calô da U-xi-ên i:
Mica, ramua èh trùh I-si-a.
21 'Bài con calô da Mê-ra-ri i:
Mahli wa Musi.
'Bài con calô da Mahli i:
Ê-li-a-xa wa Kich.
22 Ê-li-a-xa cachìt, ùh i ca con calô, toq i con cadrì, 'màng aih 'bài oh daq calô da Kich, yŏc wì haq broq mai.
23 'Bài con calô da Musi i piq ngai:
Mahli, Êđe wa Jê-rê-môt.
24 Cô i 'bài con calô da mangai Lêwi tiaq dèh 'bài cadraq ma broq gàu dèh ta xinoi jah achìh 'mùt hiniq tiaq dèh xinoi dađeh. Rìm ngai pang baiq jàt hanam dang tŏc, dìq patìh bìac ta Hnem Cùh Waiq da Chuaq. 25 Ma jah 'màng aih Đawit i doi: “Chuaq Boc Plình da Is-ra-ên khoi am ca jàn Haq jah i catèm, èh cla Haq trùh ŏi ta Jê-ru-sa-lem hloi hloi. 26 'Màng aih, 'bài mangai Lêwi pi hìaq tòng Hnem Traiq Cùh Waiq wa dìq ranac ta aih hòm.” 27 Tiaq bàu tanap da bùa Đawit adroi ca haq cachìt, dìq ca con calô da Lêwi jah rèn pang baiq jàt hanam dang tŏc.
28 'Màng aih, bìac broq da mangai Lêwi, aih wiang ti con calô Arôn ta bìac patìh ta Hnem Cùh Waiq da Chuaq, hwit hamlang, hwit hnem wa lo broq hreo ranac hadròih wa patìh ta Hnem Cùh Waiq da Chuaq. 29 Wì haq hadai padon 'benh ta ca'bŏng jrêu xua thùm, dàc 'yêq broq ngè tadreo dèch am xam 'mau mì; 'benh ùh i blo, 'benh bùh ta khai, 'bài dahwèq alôn wa dàu wa 'bài ngè kìq wa đòiq wêh. 30 Mòiq hì baiq yàng daxroq wa chìu, mangai Lêwi phai yòng ta Hnem Cùh Waiq đòiq manè pôi wa calêu padèch hiniq Chuaq. 31 Èh 'bài lè hì Sabat, hì gàu khê wa 'bài hì lè ma càn, wì haq ep hloi hloi patìh bìac dèch am ngè tadreo bùh enh ngìa ca Chuaq, tiaq dìq bìac ep broq.
32 'Màng aih, wì haq hadai ep ŏi wèq ngan Hnem Traiq Cùh Waiq wa nòi hadròih, 'bài con calô Arôn, wa oh daq wì haq, đòiq patìh Chuaq.