Jôach Broq Bùa Juđa
12
1 Hanam tapèh 'nhòng da Jêhu, bùa da Is-ra-ên, Jôach tŏc broq bùa da Juđa, wèq cwìang pôn jàt hanam ta Jê-ru-sa-lem. Miq haq hiniq Xibiah ŏi phôq Bê-e-sê-ba. 2 Jôach broq lem jang enh ngìa ca Chuaq lùch dèh ca 'nhòng, ma jah 'màng aih nhò i pajàu Jê-hô-a-đa hnài haq. 3 Mahaq 'bài hnem tadreo roc go ha'nhèq xôq 'nhòq raliang cađac; jàn xôq ŏi trùh dèch am ngè tadreo wa bùh jrêu xua thùm ta aih.Ti Palaoq Hlài Hnem Cùh Waiq
4 Jôach doi ca 'bài pajàu: “Dìq ca 'bac oh daq ma dèch am ca Chuaq broq ngè tadreo ta hnem cùh waiq, ta aih 'bac khoi pajaq ca rìm ngai ma ep am, wa phàn 'bac da oh daq ma dèch am đeh ca hnem cùh waiq, 5 pì phai tagop dŏng dìq 'bac aih enh 'bài mangai ma dèch am, khoi èh yŏc 'bac aih đòiq ha'naoq hlài hnem cùh waiq jang leq ma raliang.”
6 Mahaq trùh hanam ma baiq jàt piq 'nhòng da bùa Jôach, 'bài pajàu xôq 'nhòq ha'naoq hlài hnem cùh waiq. 7 'Màng aih Jôach thê creo ca Jê-hô-a-đa wa 'bài pajàu ma 'noiq trùh, èh haq bòch: “Gleq pì ma 'nhòq ti ha'naoq hlài hnem cùh waiq? Pang cô èh pì, pi jah yŏc 'bac enh 'bài mangai ma dèch am ca Chuaq hòm, mahaq yŏc 'bac pì ma khoi gop aih, đòiq hi ha'naoq hlài hnem cùh waiq.” 8 Pang aih 'bài pajàu pi i yŏc 'bac hòm enh mangai ma dèch am ca Chuaq, èh wì haq hadai pi hìaq ep wiang ca bìac ti ha'naoq hlài hnem cùh waiq hòm.
9 Mahaq pajàu Jê-hô-a-đa yŏc mòiq thùng, pùng trom jang calàp haq, khoi èh đòiq haq kenh ca'bŏng tadreo. Jò wì mùt ta hnem cùh waiq da Chuaq, èh wì hnoq haq ŏi pah 'ma ca'bŏng tadreo jang 'mang ngo ma mùt ta hnem cùh waiq. 'Bài pajàu ma gòm 'mang ngo hnem cùh waiq tah ta thùng dŏng dìq 'bac wì ma 'ràng dèch am ca Chuaq. 10 Jò leq hnoq thùng tah 'bac aih hi 'bình, èh mangai thò kìq da bùa wa pajàu ma broq gàu, trùh rèn 'bac aih, tah ta 'bau càt ngah 'bau. 11 Khoi èh wì am 'bac aih ca 'bài mangai ma wèq 'bài thòq ma ha'naoq hlài hnem cùh waiq. 'Bài mangai aih yŏc 'bac aih am ca 'bài thòq ma broq long wa thòq broq hnem, aih 'bài thòq broq bìac ta Hnem Cùh Waiq da Chuaq. 12 Wì haq yŏc 'bac aih am ca thòq pah hmu wa thòq broq bìac xam hmu đòiq rŏt long wa hmu ma khoi pah, đòiq ti ha'naoq hlài nòi ma raliang da hnem cùh waiq da Chuaq, èh ti ca'naih dŏng dìq 'bac ma 'noiq hòm đòiq anoq hlài hnem cùh waiq.
13 'Bac cô wì ùh yŏc đòiq rŏt 'bài dahwèq xam wang xam 'bac, troi 'bài doi chê, keoq đòiq cat tìm đen, ken hlôi loq dahwèq ma 'noiq hòm ca hnem cùh waiq da Chuaq; 14 mahaq đòiq toq ca bìac ma ha'naoq hlài hnem cùh waiq da Chuaq. 15 Wì ùh thê 'bài mangai ma wèq mangai abroq ep tình sô jò wì haq ca'naih 'bac cùng ca mangai abroq, ma jah 'màng aih 'bài mangai cô broq bìac dìq jaq lem jang. 16 Wì ùh 'ràng 'bac ma dèch am broq ngè tadreo rŏt hlài enh tôiq wa rŏt hlài enh lôi, mùt ta hnem cùh waiq da Chuaq, ma jah 'màng aih 'bac aih đòiq ca 'bài pajàu.
17 Jò aih Ha-xa-ên, bùa Diac Siri trùh tajêh ca Gàt, èh blah yŏc taneh aih. Atìq ca aih Ha-xa-ên 'ràng lình trùh jêh Jê-ru-sa-lem. 18 Jôach yŏc dŏng dìq 'bài dahwèq hadròih da 'bài boc yaq haq, aih Jê-hô-sa-phat, Jê-hô-ram wa A-cha-xia ma khoi dèch am, xam 'bài dahwèq hadròih da cla haq ma khoi dèch am, dìq dŏng ca wang ma ŏi ta adùq đòiq ngè canaq da hnem cùh waiq, wa da hnem bùa, 'ràng am dìq ca Ha-xa-ên bùa Diac Siri. Ha-xa-ên men lùi khoi enh Jê-ru-sa-lem.
A-ma-xia Broq Bùa Thai ca Jôach
19 Bìac ma 'noiq da Jôach wa dìq dŏng bìac bùa ma broq, dìq khoi achìh hlài ta Sech 'Nhòng Bùa da 'Bài Bùa Juđa. 20 'Bài hapŏng da bùa Jôach broq pađim tajraq hlài ca haq, yòng tablàq hlài jêh đac haq ta hnem da Milô, jò haq 'nang lam ti trong trùh Sila. 21 Jô-xa-bat con calô Si-mê-at, wa Jê-hô-xa-bat, con calô Sômê, baiq ngai hapŏng bùa, jêh đac bùa. Haq cachìt, èh wì catùh haq pajùm ti boc yaq da bùa ta phôq Đawit. Con calô da bùa, aih A-ma-xia tŏc broq bùa thai dèh baq.