'Bŏi Calêu ma Pulùch da Đawit
23
1 Cô bàu atìq lùch da Đawit, con Jêsê, doi:“Mangai khoi jah dèch ha'nhèq, doi:
Mangai Boc Plình da Jacôp khoi xùt dàu
wa mangai broq 'bŏi calêu rangot da Is-ra-ên.
2 “Yiang da Chuaq khoi broq ca hacùng au anoi;
bàu Haq ŏi nòi rapet au.
3 Boc Plình da Is-ra-ên khoi doi:
Hmu Talach da Is-ra-ên khoi doi ca au:
‘Haq ma wèq cwìang ta-atoq enh 'nhèq ca con mangai,
Haq ma wèq cwìang xam manoh loq crè ca Boc Plình.
4 Mangai aih jah tìah ca mat mahì jò xrŏih xroq,
Tìah ca jò xrŏih xroq ùh hìaq i yùc;
Tìah can 'ngah xreo ti nhat jò plôh loh
enh taneh atìq ca mè.’
5 “Joq 'nàng Boc Plình jah am xôq ramŏt ca cadraq au 'mang aih,
Ma jah 'mang aih Haq khoi broq wêh jao hloi hloi ti au.
Haq khoi pajaq wa broq cajap cajình rìm hiniq.
Haq broq gêh tôm rìm hiniq au ma ngèh enh,
Haq hloi hloi wèq ban au.
6 Mahaq blòq hlài, dìq dŏng 'bài mangai ùh dàng cleq,
Dìq tìah ca hila jah 'bìq hwenh đac, ùh jah cadop yŏc xam tì;
7 Mahaq mangai achùq ca wì haq,
Ep i ranac xam mem loq gàn jaoq.
Khoi èh ŏi jang aih raq, wì haq 'bìq bùh chêu ta ùnh.”
Hiniq 'Bài Lình Tanuq da Đawit
8 Cô hiniq 'bài mangai dêh tanuq da Đawit:
Jo-sep-ba-sê-bêt, mangai Tach-kê-môn, broq gàu 'bài lình tanuq da bùa. Haq hadai jah creo A-đi-nô. Haq yŏc jaoq jêh đac 800 ngai ta mòiq yàng.
9 Atìq ca mangai aih, i Ê-li-a-xa, con calô da Đôđô xao A-hô-a, mangai ta piq ngai dêh tanuq ma lam ti Đawit pađôq jàn Phi-li-tin ma khoi trùh đòiq tajêh. Dìq lình Is-ra-ên khoi cadàu mot. 10 Jò jàn Is-ra-ên khoi talùi, èh Ê-li-a-xa yòng jêh jàn Phi-li-tin trùh jò tì haq tagah cadop top hloi chang gùm cla haq. Ta hì aih, Chuaq broq ca jàn Is-ra-ên jah 'blêq dìq dŏng; wì toq tiaq atìq ca Ê-li-a-xa đòiq blah yŏc dahwèq lình wì ma tau.
11 Atìq ca mangai aih, i Samah, con calô Agê, mangai Hara. Lình Phi-li-tin hlài dìq ta Lêhi. Nòi aih i mòiq đùng pìt dŏng tòh. Lình Is-ra-ên cadàu mot ca lình Phi-li-tin. 12 Mahaq Samah ŏi ta'ne đùng, haq wèq đùng tàt aih, haq jêh jàn Phi-li-tin. 'Màng aih Chuaq broq ca jàn Is-ra-ên jah 'blêq dìq dŏng.
13 Ta piq jàt ngai lình tanuq, i piq ngai lam trùh ta Đawit ŏi ta còp hmu A-đu-lam wop jò mùa gat 'mau. Jò aih i mòiq lù lình Phi-li-tin đòiq traiq ŏi ta thòng Rê-pha-im. 14 Lình Phi-li-tin khoi blah yŏc Bêt-lê-hem. Jò aih Đawit ŏi ta đôn hanình. 15 Đawit rahènh mòiq hiniq, doi: “Au ngèh enh mangai am ca au ôq diac enh adràm ta 'mang phôq Bêt-lê-hem!” 16 'Màng aih, i piq ngai lình tanuq broq gàu, lam pagat traiq lình Phi-li-tin gôch diac adràm ŏi jang 'mang phôq Bêt-lê-hem, hi khoi wìh hlài dèch am diac ca Đawit, mahaq Đawit ùh ôq, haq yŏc ùc diac aih am ca Chuaq, 17 Đawit waiq doi: “Chuaq ôi! Au ùh manaq ôq diac cô. Diac cô ùh crài cleq ca mahem da piq ngai cô. Wì khoi tamùa dèh can rìh wì lam trùh nòi tau.” 'Màng aih Đawit ùh ôq diac aih. Aih bìac da wì piq ngai lình dêh tanuq khoi broq.
18 A-bi-sai oh Jôap, con calô da yaq Xê-ru-ia, broq cwan wì piq ngai lình ma tanuq; haq yŏc jaoq jêh cachìt 300 ngai; haq i 'bang tìang ŏi ta piq ngai tanuq aih. 19 Ta wì piq ngai, A-bi-sai yi i 'bang tìang, wa broq gàu ca wì. 'Nhac ca 'màng aih haq ùh dàng wì piq ngai aih.
20 Èh hòm Bê-nai-a ŏi ta Cap-xê-ên con Jê-hô-a-đa, mangai dêh tanuq i tìang taiq haq broq bàc bìac càn. Haq khoi jêh đac baiq ngai, mangai yi dêh tanuq dìq dŏng ca Moap. Ta mòiq hì i twiac clìh, haq raq mangai ma loh ta hàm jêh đac mòiq toq baco hlari. 21 Haq jêh đac mòiq ngai mangai Aicàp, mangai càn caiq tanuq. Mangai Aicàp aih wê ta tì mòiq toq jaoq, mahaq Bên-nai-a toq wê mòiq toq long dùi. Haq loh dŏt jaoq enh tì mangai Aicàp, hi khoi haq yŏc jaoq aih raq, jêh đac mangai Aicàp aih. 22 Aih bìac Bê-nai-a, con calô da Jê-hô-a-đa khoi broq; haq jah i tìang dàng wì piq ngai lình tanuq aih. 23 Haq jah i tiang 'bang ta'ne piq jàt ngai lình aih, mahaq ùh dàng wì piq ngai ma adroi. Đawit thê haq broq gàu lình gŏc haq.
24 A-sa-ên oh Jôap, mòiq ta piq jàt ngai mangai tanuq;
hadai i Ên-ha-nan con calô da Đôđô mangai Bêt-lê-hem.
25 Èh i hòm Samah mangai Harôt,
Ê-li-ca mangai Harôt;
26 Hêlêt mangai Pantit;
Ira, con calô Ikêt mangai Tê-cô-a;
27 A-bi-ê-se mangai A-na-tôt;
Mê-bu-nai mangai Husa;
28 Xanmôn mangai A-hô-a;
Ma-ha-rai mangai Nê-tô-pha;
29 Hêlep, con calô da Ba-a-na mangai Nê-tô-pha;
Itai, con calô da Ribai mangai Ghi-bê-a, gùng Bên-ja-min;
30 Bê-nai-a mangai Phi-ra-thôn; Hiđai mangai Ga-ach;
31 A-bi-an-bôn mangai A-ra-ba;
Ach-ma-wêt mangai Ba-hu-rim;
32 Ê-li-a-ba mangai Sa-an-bôn;
'bài con calô da Jasen; Jô-na-than;
33 Samah mangai Hara;
A-hi-am, con calô da Sara, mangai Ara;
34 Ê-li-phê-lêt, con calô da A-hat-bai, mangai Ma-a-ca;
Ê-li-am con calô da A-hi-tô-phen mangai Ghilô;
35 Hêtrô mangai Catmên;
Pharai mangai Aràp;
36 Igan, con calô da Nathan, mangai Xôba;
Bani mangai Gàt;
37 Xêlec, mangai Ammôn;
Na-ha-rai ŏi Bê-ê-rôt, mangai xùi ranac tajêh da Jôap, con da Xê-ru-ia;
38 Ira mangai Itrit;
Garep mangai Itrit;
39 Uria mangai Hêtit.
Rèn dìq dŏng piq jàt tapèh ngai.