Samsôn Yŏc Mai
14
1 Samsôn loh ta Timna, haq hnoq mòiq ngai con cadrì adrùh Phi-li-tin ŏi ta aih. 2 Jò hlài dèh ta hnem, haq anoi hlài bìac aih dèh ca miq baq: “Au hnoq mòiq ngai con cadrì, mangai Phi-li-tin ŏi ta Timna, manàiq cô xìn miq baq lam capoch ca au mangai aih, broq mai.”3 Miq baq haq tèo: “Ŏi ta oh daq bèn loq ŏi ta dìq tamoi bèn, ùh xài i ca mòiq ngai con cadrì leq đòiq ca con broq mai, ma ep lam yŏc mòiq ngai con cadrì ta jàn Phi-li-tin ùh cat akia broq mai 'mòh?”
Mahaq Samsôn doi dèh ca baq: “Baq am au yŏc mangai aih, ma jah 'màng aih mangai cadrì aih lem ca mat con.” 4 Miq baq haq ùh 'nì ca bìac aih trùh enh Chuaq đòiq ca Samsôn jah i ta'nàih tabroq ca jàn Phi-li-tin, ma jah 'màng aih jò aih mangai Phi-li-tin 'nang wèq cwìang mangai Is-ra-ên.
5 Samsôn lam dèh ti miq baq loh ta Timna. Jò wì haq bu trùh ta wùan nho ŏi ta Timna, èh i mòiq toq baco hlari bu chuai rai ca-ùm rai cadàu trùh Samsôn. 6 Yiang da Chuaq loh ŏi ta Samsôn broq ca haq dìq jaq dêh. Samsôn xam tì dech hich baco, tìah ca haq hich mòiq toq bubi con. Mahaq Samsôn ùh doi dèh ca miq baq loq bìac haq ma khoi broq. 7 'Màng aih haq loh, capoch tùang ca mangai cadrì aih; mangai cadrì aih lem ca mat hnoq da Samsôn.
8 Atìq ca aih toq 'biaq, Samsôn trùh ta aih yŏc mangai aih broq mai. Ta trong lam, haq wech ngan hlài hanang baco hlari haq ma jêh đac hì adroi nèh, hnoq ta hanang baco aih i mòiq pù xùt wa diac xùt. 9 Samsôn acom yŏc toq 'biaq diac xùt aih rai lam rai caq. Glàm dèh miq baq, haq hadai am dèh ca miq baq caq, mahaq Samsôn ùh i doi dèh ca miq baq loq diac xùt aih haq yŏc enh hanang baco hlari.
10 Baq Samsôn trùh ta hnem mangai cadrì aih đòiq hatình ca bìac ban mangai cadrì aih ca Samsôn. Samsôn broq hiniang tiaq lè da 'bài con ŏng 'nhòng aih. 11 Bu hnoq haq, wì patô ca haq piq jàt ngai gu radam đòiq broq bua.
12 Samsôn doi ca wì: “Au xìn đôq pì mòiq bìac: Tàng trom tapèh hì ma caq hiniang, pì tèo troq, èh au am ca pì piq jàt blah eo bai habùac wa piq jàt blah eo cwàn hòm. 13 Mahaq tàng pì tèo ùh troq, èh pì ep am ca au piq jàt blah eo bai habùac wa piq jàt blah eo cwàn.”
Wì tèo haq: “Ìh pa'noh ca nhèn bàu đôq beq, nhèn tamàng cô.”
14 Samsôn doi:
“Enh ngè ma loq acaq, yŏc jah dahwèq caq,
enh ngè dêh yŏc jah ngè nhim.”
Piq hì lam cwa mahaq wì chaq xôq 'nhòq jah 'nì tèo hlài.
15 Trùh hì ma pôn, wì trùh doi ca mai Samsôn: “Ìh ep padô ŏng ìh đòiq haq doi bàu đôq aih ca nhèn, tàng ùh, nhèn bùh đac hnem ìh wa hnem baq ìh. Ìh akhen ca nhèn trùh ta cô đòiq tacaq ca nhèn 'mòh?”
16 'Màng aih, mai Samsôn trùh hmoi ca Samsôn: “Gè joq git đac ca au, gè ùh xa-ŏch ca au, gè pa'noh mòiq bàu đôq ca tamoi nhèn, mahaq gè ùh am ca au loq bàu đôq aih.”
Samsôn tèo haq: “Miq baq au ji au ùh doi ca wa haq loq, èh gleq au khòh doi ca gè?” 17 Enh hì aih trùh hì ma tapèh da hì caq hiniang, mangai cadrì aih xôq crò hmoi yôh 'màng aih, taiq 'màng aih trùh hì tapèh, Samsôn chìuq pi nui hòm, ma jah haq anoi paro bàu haq ma đôq aih dèh ca mai haq, ma jah 'màng aih mai haq xanh pangài yôt ca haq. Hi khoi mai haq doi hlài bàu paro aih dèh ca tamoi wì haq.
18 Adroi ca mat mahì mùt da hì tapèh, 'bài gu radam ta phôq aih trùh doi ca haq:
“Ma i cah cleq ma nhim yi ùh hnao ca diac xùt?
I cah cleq ma yi dêh ca baco hlari?”
Samsôn doi ca wì:
“Tàng pì ùh yŏc 'bo bu chuai au đòiq cai taneh,
èh pì broq 'màng leq ma tèo jah bàu au ma đôq.”
19 Yiang da Chuaq ŏi ti Samsôn broq haq dêh. Haq loh ta Ach-ca-lôn jêh piq jàt ngai mangai Phi-li-tin, yŏc eo yôh wì haq, khoi èh baha 'bài mangai ma tèo jah bàu đôq da haq. Hi khoi haq plôh nòih dìq jaq hlài dèh hnem baq. 20 Khoi èh mai da Samsôn wì rùp, taprŏi òn ca mòiq ngai radam 'noiq ta 'bài bua haq ma i lam caq hiniang hì aih.