Ca'bŏng Bùh Jrêu Xua Thùm
30
1 “Ìh phai broq mòiq toq ca'bŏng xam long a-kê-si-a đòiq bùh jrêu xua thùm. 2 “Ca'bŏng aih pôn pah ta-atoq: pah dang yôh 1 hagat, wa pah dang gat 1 hagat, pah ha'nhèq 2 hagat, broq pôn toq aki ta mùm ca'bŏng wìa mòiq calôq. 3 Ìh phai 'bìt wang enh 'nhèq, pôn pah panàt dudan wa 'bài aki, wa broq grôi xam wang dudan ca ca'bŏng. 4 Enh 'neq ca trong grôi aih, nòi baiq pah mùm, broq baiq toq gwiang xam wang đòiq 'mùt long tanòng đòiq tòng. 5 Broq long tanòng tòng xam long a-kê-si-a hi khoi 'bìt wang. 6 Ìh phai đòiq ca'bŏng bùh jrêu xua thùm aih jang ngìa bai prình ma tù Hom Wêh Jao wa Calàp Baxŏng Tôiq, nòi Au jah glàm ìh.7 “Rìm xroq jò Arôn palaoq đen, haq phai bùh jrêu xua thùm ta ca'bŏng aih. 8 Jò xèq dradrich, Arôn bùh đen, haq phai bùh jrêu xua thùm. Phai i jrêu xua thùm bùh jang ngìa Chuaq hloi hloi, cwa rìm 'nhòng. 9 Ta ca'bŏng bùh jrêu xua thùm cô apaq bùh jrêu xua thùm 'noiq, hadai apaq dèch am ngè tadreo bùh, ngè tadreo xam dahwèq caq, loq lè am ngè ôq leq ma 'noiq. 10 Mahaq rìm 'nhòng, mòiq hanam mòiq yàng, Arôn phai yŏc mahem ngè tadreo rŏt hlài enh tôiq lôi, xùt jang aki ca'bŏng bùh jrêu xua thùm cô đòiq rŏt hlài enh tôiq lôi. Aih bìac dìq jaq hadròih am ca Chuaq.”
'Bac Rŏt Hlài
11 Chuaq hadai doi ca Môise: 12 “Jò leq ìh rèn jàn Is-ra-ên đòiq achìh hiniq, mòiq ngai jàn phai am 'bac rŏt dađeh am ca Chuaq. 'Màng aih, ùh hìaq i can hinìq ramòt leq loh ca wì jò ìh rèn sôq wì haq. 13 Mangai leq i hiniq ta sô ep am mòiq hliac 'bac 'yoh wìa ngè hadròih am ca Chuaq. (Hliac 'bac cô 'ne siêclò tiaq siêclò da Hnem Traiq Cùh Waiq – aih troq baiq jàt gêra). 14 Rìm ngai i hiniq ta sô pang baiq jàt hanam dang tŏc, dìq phai am 'bac cô ca Chuaq. 15 Jò hnhu am 'bac cô ca Chuaq đòiq đèn dađeh, mangai padrŏng can ùh am yi bàc, wa mangai pa ùh am yi 'biaq ca 'ne siêclò. 16 'Màng aih, ìh gop yŏc 'bac đèn dađeh da jàn Is-ra-ên, hi khoi yŏc 'bac aih 'mùt ta bìac Hnem Traiq Cùh Waiq, aih mòiq bìac bahmàng hlài da jàn Is-ra-ên jang ngìa Chuaq đòiq đèn dèh can rìh.”
Thùng Càn Xam Đùng
17 Chuaq doi hòm ca Môise: 18 “Ìh phai broq mòiq toq thùng càn wa jènh thùng xam đùng đòiq 'nheo, hi khoi đòiq ŏi ta'ne 'mang Hnem Traiq Cùh Waiq wa ca'bŏng tadreo, èh ùc diac ta thùng. 19 Arôn wa 'bài con calô haq phai 'nheo dèh jènh tì cla ta thùng càn aih. 20 Jò wì haq mùt ta Hnem Traiq Cùh Waiq, wì phai yŏc diac 'nheo dađeh waq ca wì haq claih ca cachìt, wa jò thia haten ca ca'bŏng tadreo đòiq patìh, aih bùh ngè tadreo yŏc ùnh am ca Chuaq, wì haq hadai ep wèq 'màng aih. 21 'Màng aih èh, wì haq phai 'nheo tì wa jènh waq ca claih ca cachìt. Aih mòiq trong ranenh broq hloi hloi am ca Arôn wa xinoi haq cwa rìm 'nhòng atìq.”
Dàu Xùt Hadròih
22 Chuaq doi ca Môise: 23 “Gop 'bài ngè ma i hòi dìq jaq xua thùm: mùc jùac diac 6 kg, cwèq aih 3 kg, riah cachiq phùc 3 kg. 24 Cwèq capiac padam hrinh siêclò tiaq siêclò da Hnem Traiq Cùh Waiq, wa 4 lìt dàu ôliu. 25 Ìh phai yŏc 'bài ngè i hòi xua thùm aih alôn ca dabau broq loh dàu xua thùm đòiq broq dàu xùt hadròih. 26 Khoi èh, yŏc xùt ca Hnem Traiq Cùh Waiq wa Hom Wêh Jao, 27 ca'bŏng đòiq 'benh hadròih wa 'bài ranac, jènh đèn wa 'bài ranac, wa ca'bŏng bùh jrêu xua thùm, 28 ca'bŏng tadreo bùh wa dìq ranac haq, thùng càn wa jènh thùng. 29 'Màng aih, ìh phai lah crài 'bài ngè cô loh hadròih waq ca broq dìq jaq hadròih. Tàng ngè leq hi achùq, aih jah wìa hadròih.
30 “Ìh phai xùt dàu ca Arôn wa ca 'bài con calô haq, lah crài loh hadròih, đòiq wì jah broq pajàu patìh ca Au. 31 Ìh hadai phai doi ca jàn Is-ra-ên: ‘Dàu cô jah broq dàu xùt hadròih am ca Au ta 'nhòng da pì atìq. 32 Ùh khòh ùc ta chac hamac mangai, hadai apaq broq dàu 'noiq crài tìah dàu aih, taiq dàu cô hadròih, wa hadai hadròih am ca pì. 33 Tàng i mangai leq broq xua thùm tìah ca dàu aih, wa 'ràng da'rat ta chac mangai jàn 'noiq, jah 'bìq hnan đac loh khoi ca jàn Is-ra-ên.’ ”
Jrêu Xua Thùm Hadròih
34 Chuaq doi hòm ca Môise: “Yŏc 'bài ngè xua thùm, ma pajùm bàc hiniq aih jan xua thùm, riang yim hùang, phong chi hùang, wa nhu hùang. Rìm hiniq mòiq phàn. 35 Tiaq trong alôn jrêu, broq loh jrêu xua thùm, xang boh, hliang wa hadròih. 36 Yŏc mòiq 'nah padit haq loh dàc, hi khoi 'ràng jang ngìa hòm wêh jao ta Hnem Traiq Cùh Waiq, aih nòi Au jah glàm ìh. Phàn da ìh, jrêu xua thùm cô dìq jaq hadròih. 37 Apaq yŏc jrêu xua thùm cô broq troi trong ma broq jrêu am ca dađeh. Phai ngan jrêu xua thùm cô hadròih am ca Chuaq. 38 Tàng mangai leq broq jrêu xua thùm tìah 'màng aih đòiq am ca dađeh hìp hòi, mangai aih jah 'bìq hnan đac loh khoi ca jàn Is-ra-ên.”