1 ईंक बाद मं ईसु गलील की झील क कराड़ा प मनख्यां क तांई फेर उपदेस देबा लाग्या।तो ऊंकॅ च्यारूमेर अतनी घणी सारी भीड़ भेळी होगी ।ई लेखॅ व्ह झील मं खड़ी एक नाव प चढ'र ऊमं बठग्या अर सारी भीड़ झील क कराड़ा प उबी र्‌ह'र व्हांकी बातां न सुणबा लागी छी। 2 अर ईसु न व्हांकतांई ढास्टान सुँ घणी सारी बातां सखाबा लाग्या।अर ईसु न अपणा उपदेस मं व्हां सुं अस्यां खी, 3 सुणो,एक बगत एक खास्तगार बीज बाभा काण ऊँका खेत मं ग्यो 4 तो अस्यां होई,क जद ऊं बीज बाभा लाग्यो,तब कोई बीज गेला क सायरॅ पड़या अर चड़ीचुडंगला न आ'र व्ह चुगलिया। 5 अर दूस्रो कोई बीज कांकरेली जमीन प गरपड़या ,ज्यां व्हानॅ जादा गार न्ह मली, तो जादा गार न्ह होबा क कारण उ बीज बेग साक उग्या आया अर बढ़बा लाग्या 6 पण जद सूरज उग्यो तो तावडा मं बीज बळग्या क कस्यां ऊंकी जड़ धस न्ह पाई। 7 अर कोई बीज झाड़यां मं जा पड़या,अर व्ह झाड़ीयां न बड़ी होर व्ह बीज दाबगाल्या।जि सुँ व्हा मं कोई दाणा न्ह पड़या। 8 अर कोई बीज छोखी जमीन प गरपड़या,ज्यां छोखा सुं उग्या अर बड़ताग्या जि सुँ खूब पनप्या,अर उमई सुं कोई तीस गुणा ,कोई स्याठ गुणा ,कोई सौ गुणा जादा फसल प'दा होई। 9 फेर जद व्ह ढास्टान ख'र सम्टया,तो ईसु न खी,क ज्ये कोई समझॅबो छावॅ तो ज्ये बातां म्हूँ थां सुँ खर्यो छूँ व्ह बातां न छोखा ध्यान सुँ सुणलीज्यो।

10 जद ईसु मसीह एकला छा,तो ऊंका बाराह चेला क लारां ज्ये मनख च्यारूमेर छा।व ईसु सुं ज्ये ढास्टान आपण क तांई अबाणु बताई छी ऊंका अर्थ क बारा मं बुझबा लाग्या। 11 ईसु न वासुं खी, थांक तांई तो परमेस्वर का राज्य क बारा मं गुपत बात की समझॅ दी गी छ, पण ज्ये कोई म्ह प बस्वास न्ह करॅ,व्ह मनख्यां क तांई तो सारी बातां न ढास्टान क दुवारा बतावॅ छूँ 12 ताकि परमेस्वर का य्हे बचन पूरा होग्या छ,क ,”जद व घड़ी घड़ी म्हारा कामां न देखलेवॅ छ तोभी व्हांनॅ सुझॅ कोई न्ह छ,अर व म्हारी बात न घड़ी घड़ी सुणलेवॅ छ तोभी व्हांकॅ समझ मं न्ह आवॅ छ, अगर अस्यां न्ह होव तो क व अपणा खराब बच्यार अर खराब कामा सुं मन बदल'र म्हारॅ गोड़यां आवॅ तो,म्हूँ, व्हांका पाप न धो सकॅ छूँ”।

13 फेर ईसु न अपणा चेला सुं खी,कांई थां ये ढास्टान न कोई न्ह समझया क? अगर थां ईं ढास्टान न समझ न्ह पाया तो फेर दूसरी सारी ढास्टानां कस्यां समझ मं आवगी। 14 ऊ ढास्टान को मल्लब यो छ,क खास्तगार तो परमेस्वर का बचन औरां काण बताबाळा एक मनख क नांई छ, ऊ बीज तो परमेस्वर को बचन छ 15 अर कोई मनख ज्ये परमेस्वर का बचन सुणॅ छ व्ह गेला क सायरॅ मं पड़या बीज क नांई छ,क जस्यां व्ह परमेस्वर का बचन सुणॅ छ तो सेतान आ'र ऊ बचन न बिसरा देवॅ छ। जीनॅ व पहली सुणल्या छा 16 अर कोई मनख व्ह कांकरेली जमीन प पड़या बीज क नांई छ,क जस्यां व्ह परमेस्वर का बचन सुणॅ छ,तो व्ह हाथ्युहात आनंद क लारां अपणा लेवॅ छ। 17 पण व्हांको बस्वास अतनो मजबूत न्ह होवॅ छ क व्ह अस्या पौदा क नांई छ जींकी जड़ जमीन प छोखी न्ह धस्सी,ईं सुं व्ह घणा दना तांई न्ह रह' छ,अर जद बचन क कारण व्हां प दुख अर परेसान्यां आवॅ छ तो व्ह अपणा बस्वास न छोड़देवॅ छ। 18 अर कोई मनख छ ज्ये कोई बीज झाड़यां मं जा'र पड़या बीज क नांई छ, व तो परमेस्वर का बचन सुणॅ छ। 19 पण व्ह नथकई जीबा क बारा मं चन्ता करॅ छ,धन-समपत्ती अर मो-माया को लालच अर मन की बरी बातां ऊंका काळज्या मं छ ये परमेस्वर का बचन न दाब देवॅ छ,जस्यां झांडीयां बीज न दाब देवॅ छ,ई कारण परमेस्वर को बचन उ मं सूं खराब हो जावॅ छ,ईं सुं ऊ बीज बी फळ कोई न्ह लावॅ। 20 पण कोई मनख तो अस्यांका बीज क नांई छ ज्ये कोई बीज छोखी जमीन प पड़या छा,व परमेस्वर का बचन सुण'र ऊंक उपर बस्वास करॅ छ।अर ऊंका आधार प जीवॅ छ। अर व अस्यांका पौदा क नांई छ ज्ये कोई तीस गुणा ,कोई स्याठ गुणा,कोई सौ गुणा सुँ जादा फसल प'दावारी देवॅ छ।

21 फेर ईसु न सारा मनख्यां सुं एक और ढास्टान खी,क कोई दीपक जळा'र उनॅ पराण्डी अर खाट क तणॅ धर्यो थानॅ देख्या छ क?पण उनॅ आळया मं धर छ जी सुं ऊ पूरा घर मँ उजाळो होवॅ छ। 22 अस्यां छ,सारी डक्की होई बातां न उजागर करगो।अर ज्ये कोई बात उंधेरा मं छ व्हांनॅ उजाळा मं लाऊगो। 23 ज्ये ज्ये बात म्हूँ बतार्यो छूँ अगर कोई समझबो छावॅ तो छोखा सुं सुणलिज्यो। 24 फेर ईसु न भीड़ सुं खी,” म्हारी बातां मं ध्यान दे'र सुणलिजियो ,” जी नाप सुं थें दूसरा काण नाप छ उ नाप सुं थांक काण बी नाप्यो जाऊगो,अर थां काण जादा द्‌यो जावगो। 25 ज्ये कोई परमेस्वर का बचन न सुण'र जीवन मं मानॅबो छावॅ छ ऊंक काण परमेस्वर ओर जादा देवॅगा; पण ज्ये कोई परमेस्वर का बचन न सुण'र जीवन मं मानबो न्ह छावॅ तो परमेस्वर ऊंक गोड़यां पहली सुँ ज्ये कांई छ, ऊ बी लेल्यो जाऊगो।

26 फेर ईसु न भीड़ सुं खी,परमेस्वर को राज्य अस्यां छ, जद एक खास्तगार अपणा खेत मं बीज बावॅ छ । 27 अर ऊ रात मं सो'र दन मं जागॅ छ अर ऊ न्ह जाणॅ क बीज कस्यां उगॅ अर बढ़ॅ छ 28 बना खास्तगार की मदत सुँ,धरती खुद ही उपजावॅ छ।अर पहली कुपळां आवॅ छ जिंक बाद मं धंग्यां अर धंग्या मं घणा दाणा आवॅ छ। 29 अर जद धंग्यां पाक जावॅ छ तो ऊ बेगो सोक दांतळी ले'र काटबा लागजावॅ छ क कस्यां लावणी की बगत आ जावॅ छ।

30 फेर ईसु न भीड़ सुं खी,आपण परमेस्वर का राज्य न कस्यां दर्सा सकां छा,अर परमेस्वर का राज्य न कस्यां ढास्टान सुं समझा सकां छां? 31 ऊ एक सरस्युँ का बीज क नांई होवॅ छ।जद थां जमीन मं बाव छ ऊ सारा बीज्जा मँ सुं सारा सुँ छोटो छ। 32 पण जद उनॅ जमीन मं बावॅ छ तो ऊ दाणो उग'र धरती का सारां बीज्जा मँ सुं सारा सुँ बडो हो जावॅ छ।ईकी डाळयाँ अत्तनी बडी हो जावॅ छ ,क चडी चुडंग्ला ऊंकी छायाँ मं घुसाळा बणा सकॅ्क छ। 33 अर ईसु व्हांकतांई ई तरॅ सुं घणी ढास्टाना दे दे'र व्हांक समझॅबा क अनुसार बचन सुणावॅ छा । 34 फेर ईसु बना कोई ढास्टान दुवारा कांई बी न्ह ख'वॅ छा।पण जद व्ह अपणा चेला क लारां एकला रॅह छा, उ बगत मं ऊ ऊंक चेला क तांई सारी बातां को अर्थ खुल्लम खुल्ला कर'र बता दे छा क यांको कांई कांई मल्लब छ।

35 उ दन मं जद दन बुड़बाळो ई छो ईसु न अपणा चेला सुं खी,”आऔ,ल्यो आपण नाव मं बठ'र झील क पॅली पार चालां” 36 तो व भीड़ न ऊंठी छोड़'र ईसु जी नाव मं बठया छा ऊ नाव मं ही व्हानॅ ले'र चाल दर्या। ऊंठी ओर बी नावां ऊंक लारां चाल दर्यी छी। 37 व झील मं चाल दर्या छा क ईंक पाछ एक भारी आंधी आई जोर सूं रूछाड़बा लागी।अर झील मं पाणी हलोळा लेबा लाग्यो अर नाव क पछाड़ा मारबा लाग्यो अर नाव मं पाणी भरबा लाग्यो। 38 पण ईसु नाव क पाछॅ का कुणीयां मं एक सराणो प अपणो माथो धर'र सुत्या छा।तो ऊंका चेला न व्ह जगाया अर बार्हांपाड़'र खी,” हे गरुजी,थांनॅ चन्ता कोई न्ह क? म्हां तो मरबाळा छां 39 तो ईसु न उठ'र आंधी दकाल दी अर झील सूं खी,”थम जा”तो हाथ्युहात आंधी थमगी अर झील पहलीयां क नांई सान्त होगी 40 फेर ईसु न अपणा चेला सूं बुझी, क थां कांई काण अतना डरप ग्या? क हाल तांई थांक बस्वास कोई न्ह क म्हूँ थांनॅ सम्भाळॅ छूँ? 41 पण व्हांका चेला डरपग्या अर एक दूसरा सुं ख'बा लाग्या, अरे, “यो कुण छ? जींकी बात न आंधी अर पाणी बी मान लेवॅ छ।”