जूहन्ना
चो तीसर चिटी
मूर चो गोट
1
मय, मंडली चो धरम-सियान जूहन्ना, मोचो संगवारी गयुस चो नाव ने चिटी लिखेंसे, जेके मय सत मया करेंसे।
2 ए मोचो मीत, मोचो पारथना ए आय कि जसन तुय आत्मिक हिसाब ने चमकट आसीस उसनेची सपाय गोटमन ने बले बाड़ते जा आउर छुक-छुका रा।
3 जिदलदांय भाईमन एउन गवई दिला कि तुय सत बाट ने चलसीस, तेबे मोके खुबे हरिक लागली।
4 एचोले आगर काई गोट सुनतो के मोके हरिक नी लागे कि मोचो पिलामन सत बाट ने चलसोत।
गयुस के सहरातोर
5 ए मोचो मीत, तुय भाईमन काजे आउर हुन परदेसिया भाईमन काजे बले साका होतोने पतेयातो लाईक रयीस।
6 हुनमन मंडली ने तुचो करलो मया चो बारे ने गवई दिला। तुय हुनमन के महापरभु चो लोग के बिदा करतो असन बिदा करले नंगत होती।
7 कसनबलले हुनमन किरिस्त चो सेवा काजे निकरलासोत, आउर किरिस्त के नी पतेयातो लोगमन ले काईची नी धरोत।
8 एईकाजे आमी असन लोगमन चो सेवा-सुस्तारा करतोर आय, जेचोले आमी बले सत-सेवा ने हुनमन चो संगी होउं।
दियुतिरफेस आउर दिमेतिरयुस
9 मय मंडली काजे बले लिखुन रयें, मानतर दियुतिरफेस, जोन तुमी सपाय ले बड़े होउक मन करेसे, हुन आमके नी माने आउर आमचो गोट के बले नी धरे।
10 हुन आमचो बारे ने अडरा-अडरा गोटमन बलुन बदी देयसे, आउर इतलीचे नाई हुन आमचो भाईमन चो इजित-मान नी करे, आउर जोन इजित-मान करुक मन करसोत हुनमन के मान करुक नी देउन मंडली ले निकराउन देयसे। एईकाजे जिदलदांय मय एयंदे तेबे हुनचो बुतामन के हुनके सूरता करायंदे।
11 ए मोचो मीत, तुय अडरा बाट नाई, मानतर भलई चो बाट धर। कसनबलले जोन भलई करेसे, हुन महापरभु बाटले आय, मानतर जोन अडरा करेसे, हुन महापरभु के नी दखलोसे।
12 दिमेतिरयुस चो बारे ने सपाय लोग आउर हुनचो सत गोटमन बले गवई देयसे। आमी बले गवई देउंसे आउर तुय जानीस कि आमचो गवई सत आय।
सरासरी जुहार
13 मोके तुचो काजे खुबे गोटमन लिखतोर रली, मानतर सियाई आउर कलम ले लिखुक मन नी करें।
14 मानतर मय आसा करेंसे कि तुचो लगे झटके एयंदे आउर छमा-छम दखुन गोटेयावां।
15 तुके अस्तिर मिरते रओ। एथा चो सपाय मीतमन तुके जुहार करसोत। हुता चो सपाय मीतमन के नाव धरुन-धरुन जुहार बलुन देस।