26
1 A ku tangərmar təlkur nə Yehoyakim zər Yossiya təl njir Yahuda, ɓwanya na tə shili tə tsa Tlakəu,2 <<Janə sənda Tlakə tə na:Ta'i tangha ku babal nə mbwa'alə Tlakə ka ndəra nə dəhə njir mələm nə Yahuda nda shili ka həsəli ku mbwa'alə Tlakəu. Narnda dəhə sənda ya natə ngha, ngwa da həya mada ɗitlə wa.3 Kwa mbar ɗa ndo səndzi himi ba kala ndəa tubi cha ngyar ɗimikur nyi. Naya tsəu ba ya ngyar shilna təmachi nda ya ɓatləya ka nda, ka ngam chul ɗimikur nda nda məra.
4 Nar nda, <<Janə sənda Tlakə tə na:Ma'a hya sə himi tsa ya ga nəu gadlagadla ɗa, nda ya fətə man hi, 5 ana ma'a hya sə hima da ɓwanya nə kadakaliya ɗa njir mətakər, nda ya sətə hi vanya tə kəra vanyi (mada ngə a hya sə himi wa), 6 yo shandə mbwa'alə na wi Shiloh, mələm nə tsəu kwa ɗa ka sər həyati nə dəhə njir dunəya.>>
7 Friest i, njir mətakər i ana dəhə nji ngatə nda Irimiya kwa pə ɓwanya ina ku mbwa'alə Tlakəu. 8 Amma ɗəɗəu tanyi nda Irimiya tə wurandə natə nya nə dəhə nji kala sənda Tlakə tə tsaunyi cha natə nda, Friest i, njir mətakər ana dəhə nji inda tə səyanyi ga na, <<Tuku kəl ka tah! 9 Mya gwa'atə ko shilna takər ku tləmər Tlakə ənda mbwa'alə na kwa ɗa wi Shilo, ba'a mələm na kwa zhazha a tsəu ndə ndo ngya kwa wa?>> Ngə nji tə daɓəkənyi dza nə Irimiya ku mbwa'alə Tlakə nda.
10 Manda gau gau nə njir Yahuda tə ngatə chul ngəna sə i, ngə hya'atə tə patla təl ga təra yo mbwa'alə Tlakə ga yi uya mbwar ngya kənda tə taɗər nyavi nə gwa ku mbwa'alə Tlakəu. 11 Təma ngə Friest inda ka njir mətakər inda tə natə nya gau inda ana dəhə nji nda, <<Njo tlanda nyi nəumar tah nə ndə na, ngam cha shilna takər təkəra mələm na. A ngatə hi na hima kərnə hi!>>
12 Təma ngə Irmiya tə natə nya gau inda ana dəhə nji nda: << Tlakə ngə tə səɗa ka ga ya shilna takər tə mbwa'alə na, ana məlləm na, dəhə sə inga ngatə hi nga. 13 Sakan ja, shar ma laku kəhi ana səra məra hi, hya nəu sənda Hyel Tlakə tə na. Ba Tlakə ngyar shilna təmachi ngə nacha cho nda shilnə təkəra hi nga. 14 Ba naya na'a, aku cha hi ya; mərma sənda hya la'a durdur ana tsatsa'a naya. 15 Kəl ja, hya zəndə, ənda ma hya tsəya ɗa, hyo shilna bikər mashi nə ndə kəla bikə təkəra kərnə hi, na məlləm na, ana təkəra dəhə nji kwa ngya kwa, aka jirikur Tlakə ngə tə səɗa ka ga ya shil dəkar nyi dəhə ɓwany inə hyo ngatə na.