¹ Jisu-oy huse Bhogobanla pola aro Bhogobanla basiyâ thowa-raja*. Aro ola bhala khoborra ingkâke arambo hoy. ² Bhogobanla bokra kowa-mân*, jala nam Jisoya, oy ingkâke likhiyâ thuse,

⁷ Aro Johon mânglâge bhalake hikiyâ bujiyâ dise. Ingkâke kuse, "Jala thây mola câyâw tamte bakhar bol-sukti ase, oy mola paseke ahibo. Aro moy ola agte kokra hoya mujun ola sendella phitârâ theng thiki khuliyâ debage nasaje.

⁸ Moy tuglâge pani diyâ sây gaw-gotorra suddhu-baptisma* koray. Kintu oy Bhogobanla Suddhu Mondage* tuglâ thây thakibage patheya dibo aro ingkâkehe suddhu korabo." ^b

⁹ Galil ke kowa arekra oncol ase. Aro ey oncolni Nasorot ke ekra town ase. Te ey town thiki Jisu-oy ahile. Je bhola Johon-oy mânglâge suddhu kore, Jisugew oy ôy bholay Jordon gangni suddhu korale. ¹⁰ Tane je bhola Jisu-oy pani thiki bârâle, logelogeke dindâ dui tukrâke khulile aro Suddhu Monda* uphur thiki kustur nekhan namiyâ Jisulâ thây thamile. Aro iglâ oy dikhile. ¹¹ Tane din uphur bhay raw hunile, "Toy Mola adori pola aro Moy tola loge tamte rong hoy."

¹² Ola paseke Bhogobanla Suddhu Monda* Jisuge logelogeke kurâ-bari* bhay agbariyâ thulegâ.

¹³ Aro udâni oy cullis dinâ ase aro Suitân*, jây hogolla câyâ dango thukâ, oy oge pap koraba bhulâbân. Oy kurâ-barilâ juntuglâ loge thake. Te Bhogobanla koy jhon dakraglâhe* Jisulâ bhay ahiyâ mujun oge bhalake case.

¹⁴ Tane Johonge Herud* raja-oy dhuriyâ mujun karagarni* jhapeya thuse. Ola paseke Jisu-oy Galil Oncol bhay ahiyâ mujun Bhogobanla bhala khoborra mânglâge bhalake hikiyâ bujiyâ dile. ^c

¹⁵ Ingkâke kule, "Bhogobanla kirâ khawa sumâyrâ ela huse. Bhogobanla sason* kuribâ thowa sumâyrâ kasase. Te pap thiki ghurik aro bhala khoborni bissâs kurik."

¹⁶ Tane arek dinâ Jisu-oy Galil billâ kola diyâ bereya thakate. Simon aro ola bhây, Andriyosgon dikhile. Uglâ mas mara mân hobân beden ôy bhola mas pabage panini jal pheleya thakibân. ¹⁷ Te Jisu-oy uglâge koy, "Mola gari-gari ay. Mas dhora bodol kingkâke mânglâge dhuribâ lage, udâ moy tuglâge hikâbo." ¹⁸ Te uglâw jal thoya mujun logelogeke ola gari-gari jale.

¹⁹ Tane oy Simon aro Andriyos loge udâ thiki ek sew jâyâ mujun Sibodiyolâ pola, Jakob aro Jakobla bhây, Johonge nâwkâni dikhile. Ôy bhola uglâ nâwkâni jalglâ bateya thakibân. ²⁰ Te Jisu-oy logelogeke uglâge ola sisso* hobage dakale. Aro uglâw baprage hâjrâ kamlaglâ loge nâwkâte thoya mujun Jisulâ gari-gari jale.

²¹ Ekra Kaphornahum kowa town thakibân. Te ôy town bhay Jisu-oy ola sissoglâ* loge jale. Aro Jhirâbâ Dinâ* Jisu-oy logelogeke Jihudiglâlâ dhormola kirtun ghorni* hameya mujun hikâbâ dhurile. ²² Udâni oy Jihudiglâlâ dhormo palla Udhikariglâ* nekhan nâyhikây. Kintu bol-sukti diyâhe hikâse. Aro mânglâw hâw khase.

²³ Aro ola kirtun ghorni thaka bholate, logelogeke ek jhon paglidew laga mândâ oge dukriyâ koy, ²⁴ "O Nasorot townla Jisu! Toge idâni ki kam ase? Na toy âmâglâ paglidewglâge, hobage ses kuribâ ahise? Moy jane toy kây! Toy pinni Bhogobanla Suddhu Pola hoy."

²⁵ Kintu Jisu-oy paglidewrage dabreya koy, "Jhit ho! Aro ey mândâ thiki bârâw." ²⁶ Tane paglidewra ôy mândâge ban uthâle aro jureke dukriyâ mujun oge sarile.

²⁷ Tane udâni thaka mânglâ hogole hâw khale, aro ekon jhonge pusile, "Kibâ iglâ, jiglâ Jisu-oy hikây aro koy? Oy ungkâkehe hikây jingkâ ola thây bol-sukti ase kowa nekhan! Dew-bhutglâgew oy hukum deba pay aro uglâw oge mane." ²⁸ Te jidâ Jisu-oy kurise, udâ photke Galil Oncolla mânglâ hogole hunise.

²⁹ Tane Jisu-oy ola sissoglâ* loge logelogeke kirtun ghor* thiki bârâle. Aro oy Jakob aro Johon loge Simon aro Andriyosla ghorni hamale. ³⁰ Te udâni Simonla jor ahiwâ susrirâ tongni ase. Aro ola beden uglâ logelogeke Jisuge kule. ³¹ Te Jisu-oy ôy timâtlâ bara bhay ahile. Aro ola hatda dhuriyâ mujun oge tulile. Aro timâtlâ jorra logelogeke sarile. Paseke jor bhala howa timâtdâ uglâge khawa baneya dile.

³² Ôy dinây bela dubibâlâ paseke je bhola dindâ par hule, mânglâ beramiglâge aro dew-bhut laga mânglâge, hogolge Jisulâ bhay niyâ ahile. ³³ Aro Kaphornahum townla hogol mânglâw rong cabage cathalni ek loge dumâl hulehâ. ³⁴ Te Jisu-oy nananta dhokon bakhar beramiglâge bhala kurile. Aro dew-bhutglâge bakhar mânglâ thiki hakale. Kintu Jisu-oy Bhogobanla basiyâ thowa-raja* hoy ke dew-bhutglâ jane beden oy uglâge raw koba nâydey. ^d

³⁵ Tane, dholpohorte, rati andarni, Jisu-oy ghum thiki uthiyâ mujun, bârâlegâ. Aro nihat jaga bhay jale jidâni mân nây. Aro udâni oy Bhogoban loge raw kule. ³⁶ Simon aro ola loge thakibâglâw Jisula gari-gari jale. ³⁷ Tane oge bisriyâ paya mujun, koy, "Âmâglâ hogole toge bisrây."

³⁸ Kintu oy koy, "He, moy jane. Kintu moy Bhogobanla khoborra mânglâge janabahe bârâse. Udâ beden co âmâglâ ôy karate thaka alga gawglâ bhay jang. ³⁹ Te Jisu-oy Galilni hogol paray-paray jale. Aro paray-paray kirtun ghorglâni* hamale aro udâni Bhogobanla khoborra janale aro dew-bhutglâgew mânglâ thiki hakale.

⁴⁰ Tane Jisulâ bhay ek jhon kusto beram howa mândâ ahile. Aro oy Jisulâ agte athu pariyâ magile, "Moy jane, tola mon hule, toy moge bhala kuriyâ mujun sapake deba pay."

⁴¹ Jisuge maya lagile. Te oy hat dukiyâ mujun oge nareya koy, "He, mola mon ase. Ela toy sapa hol." ⁴² Idâ Jisu-oy kowa logelogeke kusto beramra ôy mândâ thiki sarile. Aro oy bhala hoya mujun sapa hule. ⁴³ Tane Jisu-oy bhala howa mândâge udâ thiki photke patheya dile. Aro patheya dewa age oge ingkâke dhongkeya koy, ⁴⁴ "Ca, tola beramra jingkâ bhala huse, udâ kakko kisui nako. Kintu dewsirage* tola bhala howa beramra bhalake caba di. Aro Bhogoban-oy tola beramra bhala kurise beden, jingkâ Mosi*-oy ola niyâmlâ bôyni hukum likhiyâ thuse, ungkâke buliglâ di. Aro tola beramra bhala huse ke dewsirâge hogolge sakhi deba ko." ⁴⁵ Tane beram bhala howa mândâ bârâlegâ. Aro oy nijây kingkâ bhala huse, udâ oy hogolgon janabage Galil oncolni hogolgon koba dhurile. Idâ beden Jisu-oy mânglâlâ dekhani kunu para bhay jaba napay. Aro idâ beden Jisu-oy olposa mân thaka jagaglâni thake. Kintu idâniu mânglâ cari-digi thiki Jisu bhay ahe.