Mpia-bbed him di nijep kin dihyei di nijep
21
1 Gima ngwig leu lene dingat mpia-bbed him di nijep kin dihyei di nijep bu. Mpia-bbed him nitimiei kin dihyei nitimiei hacem pror bitut muk ngeisi cem ba, hagom sar bihigom. 2 Lene dingat lo, minu di kwes-kwau di minu ndig Yerusalem nijep srek kwei leu Allah ei gwamti. Allah tin ei minu ndig dima dem kep sop di juk sinsun di tiei kei bitin ei mem gima wak nijep. 3 Leu api nihyet nindig bibor tibim kwei leu banggo mbrei bipai <<Nogindini Allah ningat rin bit tungwatu nya! Noni kwei bong bit yok ba, yoni ne Nide limwa nya ri. Allah Nonti di nok ide Allah ningat rin bit yok. 4 Noni midip tut igyai nggwei hagom bingwig leu yok. Imai cem ingon ngguk cem ipim cem inghuisi wei cem bu bi. Mun di nitimiei nya hagom pror leu su.>>5 Lene No di gwam banggo mbrei dip pai <<Nogindini dipai tes mun di hagom nok nijep-jau bu!>> Lene noni cuk da bipai <<Apas kep mun dini yok lewo nihyet dini igbit ba, suar ma tungwatu nya ingon jo kep hagom.>> 6 Noni pai bu <<Hagom put tu! Dingat rin ei nimbie him kin ningwig honti. Dani ne Tuhan ei nimbie him kikau ug ei nohon keti ri. Midibindei ba, yo di inggobiau nya idem mem gima idut minyei leu minyei bousi di bindei bigyai niyaijo mikuisi. 7 No di bindei cut sisar nisindemti miyai mun dini yok leu Da. Dani ne nide Allah lene Noni ne dipmot ri. 8 Noro yo di ingwes ttin kin yo di itri Da kin yo di irom ndok kin yo di ihwen mun kin yo di icut tut yam kin yo di inda dut kin yo di ikuk yok bak kwar nya kin niris kep mun cig nya yahagom mitug ndei hukum ei muk hum belerang di cig-cai ba, gini ne nimai gi nican ri.>>
Minu Ndig Yerusalem di nijep
9 Lene malaikati gom leu malaikati ibou muhwindacan di ikwei sut bokor di ut tut nsuwer ajar ningat muhwindacan di jo mem njap ningwig honti kwei pai bida <<Akwei bidindo no di sop di Domba Pmot wak tu ba, noni ne nitnem rin bina.>> 10 Lene Allah Ninnei bie tut da ba, malaikati dima buwak da ug ei mbigdip anai bibor. Noni ndo minu ndig di kwes-kwau di Yerusalem di sindi srek kwei leu Allah ei gwamti, 11 bikwei sut nisieng siausi kin Allah nikei-kau-keisi kin nijimjitti di nok tig permata di nibok kak kin tig baiduri pandan di pimbai kei nok kristal bida. 12 Minu ndig dima bon ngug di nindig bibor di krop ttai hagom ba, ngug dima bon nide dimbou pmem simnaibrimigcan. Ba, malaikati nya ibou simnaibrimigcan igya bikwop dimbou pmem hagom ser lene mben Israel ide keret simnaibrimigcan inyeng jo bikwop dimbou pmem nuhuigya. 13 Dimbou hui ningai jo ei nite bei mpia nipriti lene ningai kin bu jo ei nite bei mpia nibiho lene ningai kin bu jo ei nite bei mpia nijjai lene ningai kin bu jo ei nite bei mpia nicutti. 14 Ngug dima bon nikiou di nok hak nindig bibor nindak simnaibrimigcan ba, yo di igya kui Domba Pmot inyeng jo kin nikiou dima yok.
15 Leu api malaikati di mbrap bit da krau nai di iba mas bibon ei nindati bitin ei mem gima nai minu dima ningat kin dimbou hui nya kin ngug di krop ttai. 16 Minu dima nijeisi kin ninyanti hacem noyam. Malaikati nai minu dima ba, nijeisi kilometer sribu can sratus bitai ba, ningot muhwi. Lene nijeisi kin ninyanti kin nanaisi hagom noyam. 17 Noni nai ngug tig cem bingat lo, nanaisii dem meter ningot muhwindagom. Nai dima noyam kin tungwatu nya ide nai. 18 Ngug dima ne iba tig baiduri bibon ba, minu ndig ningat ne iba mas di pimbai kei dem kep sraba bibon. 19 Iba tig permata mang bibor bimau tig nindig bibor di nok minu ndig dima nikiou nya. Iba tig baiduri bibon tig di iprion mem nikiou gi nigom. Iba tig nilam bibon gi nican. Iba tig yakut bibon gi niningai. Iba tig zamrud bibon gi nibitai. 20 Iba tig baiduri nillikti bibon gi nimuhwi. Iba tig delima bibon gi nimuhwindagom. Iba tig ratna nipuk bibon gi nimuhwindacan. Iba tig pirus bibon gi nimuhwindaningai. Iba tig topas bibon gi nimuhwindatai. Iba tig krisopras bibon gi nisimnai. Iba tig lazuardi bibon gi nisimnaibrimiggom. Iba tig kecubung bibon gi nisimnaibrimigcan. 21 Iba sriou tiei njep bibon dimbou simnaibrimigcan ba, bikwop dimbou hagom iba sriou tiei njep ningat gom bibon. Iba mas di pimbai kei dem kep sra bibon simpak nya ei minu ndig dima.
22 Leu api dingat lo, Allah De Ig hi jo ei minu ndig dima bi. Lewo Allah Di Sindem Bibor kin Domba Pmot yonti ne Allah De Ig ri. 23 Minu ndig dima suar mpia njap kin bed mmun com digai bi lewo Allah nikei-kau-keisi piga digai hagom ba, Domba Pmot Nonti nok mini ninjeng mem. 24 Minu ndig mipiga digai tungwatu dihyeisi dini hagom imbutti ba, nibou ndig nya mikwei sut ide ndigban di nibok kui bibor binju eisi. 25 Dimbou nya ei minu ndig kau bijo njap jei ba, hi nggam bi lewo mmun nggai kep minu ndig dima bu bi sren. 26 Tungwatu nya mikwei sut ide ndigban di nibok kui bibor kin mun di bon ninyeng hagom binju eisi. 27 Noro mun di map kuisi kin yo di irom ndok nya kin yo di ibicum nya icoi ug ei minu ndig dima bi sren. Yo di inyeng jo ei Domba Pmot De Srat Yo Di Igyaijo Nyati he rimicoi a.