19
1 Gima ngwig leu lene dimiap mun di nok tungwatu nya ningot ndig ighyet di kui yam ei gwamti bipai <<Jikwei ba, inggei sut Allah! Noni teu tungwatu nya leu sisar biyai niyaijo nijep biyok ba, ninyeng jei bibor ba, Noni sindem bibor cem! 2 Hukum dino Noni kes ei tungwatu nya dip hagom ne igbit rin ba, sren-srau cem ri. Allah kes hukum ei sundal di bindei di tungwatu dihyeisi dini icut tut yam dip. Sundal dima tug ndei hukum drek dip gi noni hwen Allah de awak nya pima.>> 3 Leu api tungwatu ningot ndig ighyet tibim hanyen bu bipai <<Jikwei ba, inggei sut Allah! Hum di yem minu ndig di ninyeng jei dima nimmup brou bijo kikau buug hon nohonti bi o!>> 4 Lene nibou nya ibou nyatungwagom ba, bitai kin mindhe ningut bitai ikuk yok bak Allah di gwam banggo mbrei dip binggei sut Noni bipai <<Igbit ri! Jikwei ba, inggei sut Allah!>>Nibon pesta kep Domba Pmot niwak nitnemti
5 Nihyet gom tibim kwei leu banggo mbrei bipai <<Ma Allah de awak nya kin tungwatu di inyeng jei nya kin gi inyeng bi nya di ikuk yok bak Noni nya e, jikwei ba, inggei sut Allah.>> 6 Leu api dimiap nisu di nok tungwatu ningot ndig ighyet di kui yam noyam kin minyei ninyei di nisu bong nindig bibor kin kru di cut nibimbiti di nindig bibor cem di pai <<Jikwei ba, inggei sut ide Allah Di Sindem Bibor lewo Noni ne Nibou Ndig ri! 7 Jikwei ba, ingon llei bibor cem inggei ngwig sut Allah tut ninyeng jei biborti. Lewo tto bou dem mem Domba Pmot wak nitnem ba, no di sop tin ei mem niwak yamti tu. 8 Noni juk sinsun linen di jimjit.>> (Sinsun dima ne Allah de limwa nya igyai munti di kei bibor nya ri.)
9 Lo bi lene malaikati dima cuk da <<Ma apas kep srat nok gini <Yo dino Allah hig yok kwei mem ibon pesta bit Domba Pmot niwak nitnemti ne ingon nggei-hi-nggei.> >> Lene binut nihyet gom kin bu bipai <<Nihyet dini nijit-jau rin ba, tibim leu Allah nuhui him.>>
10 Leu api doom da ei malaikati noho bei ba, dipi bidikuk da bak noro noni srep <<Ayai nok au! Akuk na bida au! Noro ma akuk na bak Allah Nongkom! Dani ne awak rin noyam kin nani kin asut bat di ikrau kep nihyet di nijit di Yesus mbot kep tut.>>
Lewo nihyet di nijit di Yesus mbot kep tut sindem tut yo di itri tut Allah ningon kanti nya.
No di bri bigwam kuda di ninta tiei kei dip
11 Lo bi lene dingat lo, dimbou kau leu gwamti leu api kuda di ninta tiei kei ya niyati. No di bri bigwam kuda dip ninyeng Ningon Gom kin Ningon Sren. Noni ba ningon sren-srau bikes hukum ei tungwatu nya dip bikon pran bit Nide siceu nya. 12 Niyai njeng-jau nok hum ba, Noni ttin topi mas mang bibor. Srat bokti tut ninyeng hi jo ei Noni dip lo, Nongkom kan tut ninyeng mimun dima. 13 Noni juk sinsun ndok di jei di mun nggrom silipti. Ninyeng rino Allah Nihyet. 14 Tentara gwamti nya cem ijuk sinsun di tiei-tiau bipwoi kei lene ibri bigwam ei ide kuda di ninta tiei nya dip binjei bram Noni. 15 Singau simeda di nggwen bibor ntun nuhui him. Noni ba singau simeda dima bicut Nide siceu nya leu api ninyeng tak kep yok kin tom ngkimom nitu. Noni mikimut ba anggur ngat ei bak di ikimut ba anggur ngei eisi di bindo tut Allah Di Sindem Bibor nigga biborti. 16 Ninyeng di jo ei Nide sinsunti kin nindimihumti rinok gini <<Nibou Ndig di ninyeng tak kep yo di inyeng jei nya yahagom kin Tuhan di ninyeng tak kep nibou mien nya yahagom.>>
17 Leu api dingat malaikati gom di ya niyati ei mpia njap dip lene ba nihyet nindig bibor bijem kep ha di imba-mba nyen ei mpia-bbed him yahagom <<Jinduk yam kwei mem Allah de pesta di nindig bibor o! 18 Jikwei puk nibou ndig nya kin nibou pran nya kin tentara nya kin kuda nya kin yo di ibri bigwam ei kuda dip nya kin tungwatu yahagom bitut awak nya kin yo di igyati kwes nya kin yo di inyeng jei nya kin yo di inyeng bi nya yahagom inghuigya.>>
19 Leu api dingat lo, mindhe di niten-pos kin nibou ndig dihyeisi dini nya bitut ide tentara nya cem induk yam kwei mem ikon pran bit No di bri bigwam kuda nitiei dip kin Nide tentara nya. 20 No di bri bigwam kuda nitiei dip kat mindhe di niten-pos dima kin nide nabi nitrowai di bon mindur nya ei mindhe noho bei. (No dini ba nide mindur nya biris yo di igyai mindhe di niten-pos de nitak bukti kin yok kin yo di ikuk yok bak nide kwar.) No di bri bigwam kuda nitiei dip com mindhe di niten-pos kin nabi nitrowai tut igyaisi ug ei muk hum belerang di cig-cai. 21 Lene ba singau simeda di ntun nuhui him bibindei cut tentara nya di ibit mindhe di niten-pos dima bingwig ug. Leu api ha nya hagom ikwei puk inghui kikau bipu yok.