Sundal di ninyeng jei
17
1 Lene malaikati nya di ikwei sut ide bokor nya igom kwei pai bida <<Akwei ba, dindo sundal di ninyeng jei di mitug ndei hukum bina. Noni ne minu ndig bibor di iwin dideu minyei mang biborti ri. 2 Nibou ndig dihyeisi dini nya icut tut noni ba, tungwatu dihyeisi dini idut nide ba anggur ngei di ndo tut nide sisar nicut tut yamti ba, ningei pu yok.>>3 Leu api Allah Ninnei bie tut da ba, malaikati dima buwak da ug ei iggum ndigsi. Ei sirima ne dingat lo, sop gom bri bigwam ei mindhe ningwoi di niten-pos dip. Leu api srat bokti di tibim tut ninyeng di wer mpiahi tut Allah jo bidem mindhe ningkek dip hagom. Mindhe dima bon nibou muhwindacan ba, nibou nggai simnai ntun him. 4 Sop dima juk sinsun di nok nghei nta kin ningwoi cem ba, ndei mas kin tig permata kin sriou tiei njep mang bibor. Noni krau mok mas di ut tut mun di mpiei cem rom-rau cem di ntun nide sisar nicut tut yamti him ei nindati. 5 Ninyeng di jo ei ningwakti ne Babel Di Ninyeng Jei rin noro bon mimun di jo nding. Sop dini ne pung di sundal nya kin yo di ikrar kep yam ei dihyeisi dini yahagom intun him ri. 6 Dingat lo, mun di pu noni ne Allah de limwa nya kin yo di igyai nimai drek dip ingon di gom tut Yesus inggrom ri.
Tirigi dingat noni lene dinga leu tut nindig bibor. 7 Leu api malaikati dima hig ser da <<Nggon rino anga leu tut noni i? Midimbot kep tut mimun tut sop dima kin mindhe di noni bri bigwam dip di bon nibou muhwindacan ba, nibou nggai simnai ntun him dima bina. 8 Mindhe di niten-pos di angat dima niyaijo nipou su noro niyaijo bu bi. Jei bi ne noni hei kwei leu ninnei rom nya ide jui nsi bidor ug ei nisar bihigomti. Tungwatu dihyeisi di inyeng jo ei srat niyaijoti habiei ei nimbie him tirigi po Allah pai tes dihyeisi dini bigyo bi nya inga leu tut noni. Lewo niyaijo nipou su noro tini bu ne niyaijo bi noro noni ttau hanyen kwei.
9 Tut mun dini yok ne isuar ningon di ki cem ningon di dorti tut cem. Mindhe nibou muhwindacan dima ne nungug ttou muhwindacan di no di sop gwam dip kin nibou ndig nya ibou muhwindacan cem rin lo, 10 ibou muhwi icut tu lene nibou ndig gom ninyeng tak kep mem nijam dini lene gom kin bu ttau kwei bigyo. Tirigi noni ttau kwei su lene ninyeng mitak kep nide limwa nya mem nijam di jei bi. 11 Mindhe di niten-pos di niyaijo nipou su noro tini bu ne niyaijo bu bi dima ne nibou ndig gi nimuhwindaningai ri. Noni ne nibou ndig gom leu nibou ndig muhwindacan pima rin ba, nogindini dor ug ei nisar bihigomti.
12 Nibou nggai simnai di angat dima ne nibou ndig ibou simnai di inyeng tak kep ide limwa nya bigyo ri. Noro yoni mikrau nisindemti binok nibou ndig di inyeng tak kep ide limwa nya bit mindhe di niten-pos mem jam gom ngat he. 13 Nibou ndig ibou simnai ingon kanti nya hagom noyam ba, ikes ide nisindemti kin inyeng tak kepti bak mindhe di niten-pos. 14 Nibou dini yok mikon pran bit Domba Pmot noro Domba Pmot kin Nide limwa di Noni hig yok ba, dimig yok di ingon gom tut Noni mibindei cut nibou ndig dima yok. Lewo Domba Pmot ne Tuhan di ninyeng tak kep yo di inyeng jei nya kin Nibou Ndig di ninyeng tak kep nibou ndig nya yahagom ri.>>
15 Leu api malaikati dima pai bida <<Minyei ngwa dip di angat di sundal gwam ningwa dip dima ne minu nya kin keret nya kin mben nya kin nihyet nya ri. 16 Nibou nggai simnai di angat kin mindhe di niten-pos ingon mpo tut sundal. Yoni mipos mun di nyeng tut nya hagom bingwig leu noni bibindei ningat ngu lene igyem ninghui leu api indig ningut kep hum bitimek bingwig. 17 Lewo Allah pingok ingonti leu binhyepo injei siceu bigyai mun bit leu Nonti ningon kanti mem yok. Gima rino ice tut yam bikes ide nisindemti hagom ei mindhe di niten-pos nindati leu binhyepo ninyeng tak kep mun nyeng hagom bibou Allah nikos tutti nya midem ug e.
18 Sop di angat dima ne minu ndig krop di ninyeng tak kep nibou ndig dihyeisi dini hagom ri.>>