Yosua kwas dihyei hanjop nsi nikenti tut keret mben Israel muhwindacan
18
1 Tirigi ibindei timek minu ndig nya di TUHAN preu ei mem yok hagom tu lene mben Israel yahagom induk yam kwei ei Silo. Leu api itas TUHAN De Prak Meng di bindo tut bipia TUHAN ningat rin ei ikieti ei mpia dima. 2 Mpe dima lene keret mben Israel muhwindacan itug ndei dihyei hanjop nsi mem yonti bigyo. 3 Gima rino Yosua pai bak mben Israel <<Jigwam bipek apig bu leu api jibrim jingkek ba, jibindei timek minu di jidigup bat-jidigai bat nya ide TUHAN Allah yai bije pima leu ba, jiyai bijiyati i? 4 Ma jidimig ibou ningai leu bikwop jide keret gom-gom ba, ikwei ya doho bei. Leu api midicuk yok ba, igyok itta kep dihyei hanjop nsi nikenti nya hagom. Lene suar ipas kep mun di ingat bou igyai him ei minu dima nisurti-nipekti kin hanjop nsi di ijoi sut itug ndei nok ide cem. Tirigi ipas kep hagom leu su lene ma ingkwei sut bikwei ngat da hanyen. 5 Suar ikwas dihyei dima bidem hanjop nsi muhwindacan. Keret Yehuda mibong kikau ei nide hanjop nsi bei mpia nibiho. Lene keret Yusuf mibong kikau ei nide hanjop nsi nite bei mpia nijjai. 6 Suar yo dima iba gambar minu niya kwas yamti muhwindacan pima ningwes ei sratti bigyai sut bidani. Leu api midiko ba, dibinggok tutd leu binhyepo dibikan tut Allah ningon kanti mem je. 7 Keret Lewi he rino itug ndei dihyei hanjop nsi hi bit je bi a. Lewo ide ndi itug ndei ndia rino igyai midyai nok imam nya mem TUHAN. Lene tut keret Ruben kin Gad kin Manasye nite hi ne itug ndei ide dihyei hanjop nsi ei Minyei Yordan nite bei mpia nipriti tu. TUHAN de awak di Musa yai dihyei dima biyok.>>8-9 Leu api Yosua pingok yo dima ingonti bipai <<Ma juug bijiyok jitta kep minu dima bijiba gambar kep minu niya kwas yamti dima nimbutti nya ningwes ei srat gomti. Leu api jingkwei sut bijindo bida. Lene midiko bidibinggok tut leu binhyepo dibikan tut TUHAN ningon kanti mem je.>> Lene yo dima yuug bigya bidem minu dima titut yam bipas kep hanjop muhwindacan de minu niya kwas yamti pima nimbutti nya. Lene ibipas kep minu ndig nya ei dihyei hanjop nsi dima yok hagom inyenga. Leu api ingkwei bikwei ngat Yosua hanyen ei prak meng yati ei Silo. 10 Leu api Yosua ko binggok tut leu binhyepo bikan tut TUHAN ningon kanti mem yok leu api kwas dihyei hanjop nsi dima tut keret mben Israel gom-gom di itug ndei hi bigyo nya.
Dihyei hanjop nsi di Yosua kwas tut keret Benyamin
11 Yosua kwas dihyei hanjop nsi gi nimbie him ba, bikwop keret Benyamin ninsi de gom-gom. Ide dihyei hanjop nsi dima jo ei keret Yehuda kin keret di intun Yusuf him ide dihyei hanjop nsi nikieti. 12 Ide hanjop nsi nite bei mpia nijjai dima lene minu niya kwas yamti jo leu Minyei Yordan nyai leu api kui mboi gom ei minu ndig Yerikho nijjai leu api mbut ei nungug him bei mpia nicutti kikau bipek kin iggum ndigsi Bet-Awen. 13 Hanjop dima nide minu niya kwas yamti mbut kikau bipek kin mboi gom ei minu ndig Lus nibiho (Lus ninyeng hi Betel) leu api juk kikau bipek kin Atarot-Adar ei nungug dip ndam Bet-Horon-Hilir. 14 Hanjop dima jo leu nungug dima bei mpia nicutti lene krop no bei mpia nibiho bimbut ndam Kiryat-Baal (minu ndig dini ninyeng hi rino Kiryat-Yearim) ba, jo ei keret Yehuda de dihyei hanjop nsi. Minu niya kwas yamti dima bon keret Benyamin de dihyei nohon keti bei mpia nicutti. 15 Minu niya kwas yamti dima nide dihyei nohon keti ei bei mpia nibiho mbut sir Kiryat-Yearim kikau bipek kin minyei yaisi nya Me-Neftoah. 16 Leu api juk bipek kin nungug kiou di jo bikik Mbang Briep Hinom sur Mbang Briep Refaim nohon keti nite bei mpia nijjai ngig-ngat. Gima leu lene minu niya kwas yamti dima juk bei mpia nibiho bikak Mbang Briep Hinom bikriau mben Yebus ide minu ndig ei pimbien bou pima kikau bipek kin En-Rogel. 17 Lene minu niya kwas yamti krop no nyahan buug nite bei mpia nijjai bipek kin En-Semes ba, kikau bipek kin Gelilot di birok kik Nitinggoisi Adumim leu api juk bipek kin Tig Bohan (Bohan ne Ruben nipmot gom ri). 18 Leu api minu niya kwas yamti dima mbut ei pimbien bou sur Mbang Briep Yordan bei nijjai leu api juk kikau ug ei Minyei Yordan nyai. 19 Lene minu niya kwas yamti dima krop no nyahan ei mboi Bet-Hogla nijjai bikes hon ei Igpong Nsim nite bei mpia nijjai ei Minyei Yordan nicomti. Minu niya kwas yamti dima bon keret Benyamin de dihyei nohon keti bei mpia nibiho ri. 20 Lene Minyei Yordan nyai bon keret Benyamin de dihyei nohon keti bei mpia nipriti ri. Gima ne minu niya kwas yamti nya di bikrop ttai dihyei hanjop nsi di bikwop keret Benyamin ninsi de gom-gom nya itug ndei ba, inyeng tak kep ri.
21-24 Bikwop keret Benyamin ninsi de gom-gom itug ndei minu ndig simnaibrimigcan bitut minu mien di jo ttai nya hagom sok yam ba, inyeng tak kep hagom. Minu ndig dini yok rino Yerikho kin Bet-Hogla kin Emek-Kezis kin Bet-Araba kin Zemaraim kin Betel kin Haawim kin Para kin Ofra kin Kefar-Haamonai kin Ofni kin Geba. 25-28 Kin minu ndig simnaibrimigtai gi bram bu di bitut minu mien di jo ttai nya cem. Minu ndig dini yok rino Gibeon kin Rama kin Beerot kin Mizpa kin Kefira kin Moza kin Rekem kin Yirpeel kin Tarala kin Zela kin Elef kin Yebus (Yebus ninyeng hi Yerusalem) kin Gibea kin Kiryat-Yearim.
Gini ne dihyei hanjop nsi nya di bikwop keret Benyamin ninsi de gom-gom itug ndei ba, inyeng tak kep ri.