Ibindei timek minu ndig mien Ai leu api igyai bigyati
8
1 Lene TUHAN pai bak Yosua <<Anduk ade tentara nya yahagom kwei lene anjei sut yok ug ei minu ndig Ai. Ma jingon mbut-mbut nyen ba, jidigit tut yok au! Midibindei ba, jibindei timek nibou ndig minu ndig Ai kin nide limwa nya ug ri. Leu api ma ayai nide minu ndig kin nide minu mien nya ba, ayati. 2 Suar abindei nibou ndig minu ndig Ai kin nide minu ndig noyam kin gi abibon nibou ndig Yerikho kin nide minu ndig nipou su pima. Noro tut mben Ai ne disindui sut ba, apos ide ndigban kin mindhe-ndhe nya ba, ama nok ade kin ade limwa nya ide. Atin ei mem gima acoi ug ei minu ndig dima ba, ahwen kros leu nite bei ninghim.>>3 Leu api Yosua tin ei mem njei sut nide tentara nya yahagom ug ei minu ndig Ai. Noni mbus tentara di ikon pran kan nya ibou sribu ningot ningai. Leu api pinak yok ba, iba mmun bimbut. 4 Lene pai biyok <<Ma jiku je nyahan ei minu ndig dima nite dinu kwei lo, jiku je ei ting au. Leu binhyepo jitin ei mem gima jihwen yok. 5 Lene dani midiya tut nimpung di ibit da ba, nison nyahan dideu minu ndig dima. Ba, tirigi timiei minu ndig Ai nya yehei kwei mem gima ihwen nye lene minikiek nye bininang hanyen kep ninghim dip nok nipou pima. 6 Lene yoni miyuhuk nye kikau ba, ikwei cut ting leu ide minu ndig. Lewo yoni mikan bigya nyeni ninang leu yok nok nipou pima ri. 7 Ei nituti dima lene suar jehei leu jiku je eisi ba, jicoi ug ei minu ndig dima lene jihwen timiei nya leu api jiyai minu ndig dima bijiyati. Jide TUHAN Allah mikes minu ndig dima ei jindati. 8 Tirigi jihwen yok leu ba, jiyai minu ndig dima bijiyati tu lene ma jindig minu ndig dima dem igbit TUHAN nicukti. Gima ne jide midyai di dicuk je tut ri.>> 9 Leu api Yosua cuk yok ba, yuug ku yok nyahan ei minu ndig Ai nite bei mpia nicutti ei minu ndig Ai kin minu ndig Betel ikieti. Leu api igwam ba, imem kep ser ei sirima. Noro Yosua bong mmun dima bit mben Israel ei prak meng yati.
10 Lene Yosua kiju mem njap tekti ngat binduk nide tentara nya ba, idem yam. Leu api noni kin nibou Israel nindigsi nya injei siceu ug ei minu ndig Ai. 11 Tentara dima yok injei bit Yosua ba, imbut ndam minu ndig Ai de dimbou pmem lene ibohok ide prak meng ei nite bei mpia nijjai. Ei mpia dima ne mbang briep gom bikkin yoni kin minu ndig dima. 12 Yosua cuk tentara nya ibou sribu muhwi nipou su ba, iku yonti nyahan ei minu ndig dima nite bei mpia nicutti ei minu ndig Ai kin minu ndig Betel ikieti. 13 Yosua nyohou dimig tentara di ikon pran kan nya nok gini. Nimpung nindig igya ser minu ndig dima nijjai lene nindigsi nya ingat rin ei minu ndig dima nite bei mpia nicutti. Lene Yosua juk ug ei mbang briep mem mmun dima. 14 Tirigi nibou ndig Ai ngat yo di ibit Yosua ikileisi lene noni yai nibou tut ba, noni kin nide tentara nya yehei binjei ndam Mbang Briep Yordan mem gima ikon pran bit tentara Israel ei mpia di nipou pima. Noro nibou ndig Ai kan tut tentara po ariman bu mihwen nide minu ndig ei bei ninghim dip pima bi. 15 Lene Yosua di ya tut yo di injei bit nya ibon yonti dem kep nok yo di isu jou leu siceu nya ba, inang ndam iggum ndigsi. 16 Lene nibou ndig Ai ya tut pinai di ingat rin ei minu ndig Ai yahagom ba, yuhuk Yosua kin nide tentara nya. Noro tirigi yuhuk yok kui jei lene ibuug ninna leu ide minu ndig. 17 Timiei pinai nya yahagom ei minu ndig Ai yehei mem gima yuhuk bram tentara Israel apino isindui sut dimbou pmem ei minu ndig dima bijo hak noro hi ya ser bi.
18 Leu api TUHAN pai bak Yosua <<Asu anda tut ade micim anai hammi minu ndig Ai. Lewo nogindini dikes minu ndig dima ei andati. Lene Yosua bit TUHAN nicukti dima.>> 19 Hammi tirigi Yosua su ninda tut nide micim lene nimpung tentara di iku yo nyahan pima ikiju bigya haninyai ba, injei bihwen minu ndig Ai leu bigyai bigyati. Lene ibindig minu ndig dima cem. 20-22 Lene tentara Ai ikiek yok bei inghim dip bingat lo, hum nimmup brou bikui ug ei mpia-bbed him. Yosua kin nide tentara nya cem ingat hum mmup lene ikan bipia tentara nindigsi nya pima ihwen minu ndig Ai leu bigyai bigyati tu. Gima rino Yosua ya tut nide tentara ba, ikiek yok kep mben Ai bihwen yok bigyai nimai biyok cem. Tentara Israel di ingat rin ei minu ndig dima cem ikwei ba, yoni cem ihwen yok. Apino ittem timiei minu ndig Ai ndam yam ba, bit bon inangti bi. Tungwagom ngat cem kwat nyahan ba, ningwes ngun cem bi. Mben Israel igyai nimai bak yo dima yahagom bingwig. 23 Nibou ndig Ai nongkom ngat he rino niyaijo api ikat ba, ikri noni ug ei Yosua noho bei.
24 Tirigi tentara Israel igyai nimai bak siceu ide tentara di yuhuk bram yok ug ei iggum ndigsi pima yahagom bingwig leu su lene ingkwei hanyen kwei ei minu ndig Ai ba, igyai nimai bak yo di yahagom di ingat rin ei minu ndig dima. 25-26 Yosua su ninda tut nide micim anai hammi minu ndig Ai lene ninda cut tut bi kikau bibou igyai nimai bak timiei minu ndig Ai yahagom bimai bingwig leu ug e. Timiei minu ndig Ai yahagom imai ningwig ei njap dima cem. Pinai nya kin sop nya di imai ei njap dima imangti ibou sribu simnaibrimigcan. 27 Lene tentara Israel ipos mindhe-ndhe nihyen kep nya kin ndigban leu minu ndig Ai hagom binok ide bu bit leu TUHAN nicuk Yosuati pima. 28 Yosua nya indig minu ndig Ai binok humekti. Lene isindui sut ba, minu ndig Ai jo nok gima kikau kwei bipek ammani kep. 29 Tentara Israel ipindur nibou ndig Ai ningut ei cou dihimti lene isindui sut ei sirima kikau bipek mmunti. Tirigi mpia cutti lene Yosua cuk tentara nya ibou poi ba, icug nimbiam ngut dima bicom hak ei dimbou pmem minu ndig Ai nuhui a. Leu api ittei tig mang bibor ba, inju bijo-jo yam dip ei mpia dima. Tig dima yok no jo nijoti dima kikau kwei bipek ammani kep.
Yosua kwop kep srat TUHAN Nikos Tutti Nya ei Nungug Ebal
30 Leu api Yosua nya iwin nimbar hum dok gom mem mben Israel ide TUHAN Allah ei Nungug Ebal. 31 Iwin nimbar hum dok dima bit leu TUHAN de awak di Musa nipingok mben Israelti ei nide sratti di pai <<Ma jiba tig di jiba ngkimom nitu biheu bi dima biwin nimbar hum dok gom.>> Lene mben Israel ijem ide mindhe-ndhe di ibui bindig ei nimbar hum dokti nya kwei mem nibon midut nindig mindhe titut kep humti kin nibon midut nibiyai ningon kwes kin TUHAN cem. 32 Lene Yosua pas kep TUHAN niggai serti nya po Musa pas kep pima ei tig nimbar dima yok dip bou mben Israel igyai him. 33 Mben Israel kin ide nibou nya kin nibou tentara nya kin nikei nya kin ngkiai di ibong ei ikieti nya yahagom ikwas yam ei nimpung can bigya ei TUHAN De Brua Gi Preu nite hi nite hi. Lene yahagom iba yoho rok imam Lewi nya di ittei Brua Gi Preu dima. Nimpung gom iba inghim bak Nungug Gerizim lene nimpung gom iba inghim bak Nungug Ebal. Tut gima ne TUHAN de awak di Musa pingok yok leu binhyepo igyai kep mun dima gino tto bou dem mem igyai mun di kei di TUHAN preu ei mem yok tu. 34 Leu api Yosua ba nihyet nindig bikwop nicukti nya bitut mun di kei nya kin nisigionti nya hagom dem igbit Musa nipas kepti ei srat TUHAN Nikos Tutti Nya. 35 Yosua kwop kep TUHAN nikos tutti nya di tug hon Musa gom-gom sindam bak limwa mben Israel di idem yam ei mpia dima yahagom bitut sop nya kin munggwom nya kin ngkiai nya di ibong ei ikieti nya yahagom hak.