Mben Israel isigon Minyei Yordan
3
1 Njap di hyep bu lene Yosua kin nide limwa di mben Israel yahagom ikiju ba, ilet ide prak meng ei Sitim bimbut tut ug ei Minyei Yordan nintig dip. Lene yohok ide prak meng yati hanyen ei sirima bibet ingon mem nikwesti tirigi isigon minyei ug ei nitehi. 2 Njap ningai bu lene nibou nya imbut bidem prak meng yati dima, 3 bipai bak ide limwa nya <<Tirigi jingat lo, imam nya ikon TUHAN di nok ide Allah Nide Brua Gi Preu bimbut tut lene ma jilet jide prak meng nya bijibit yok. 4 Noro ma jidideu Brua Gi Preu au. Gino jibram imam nya lene suar nikieti di bikkin jeni nijeisi kilometer gom. Gino jiyai nok lene mijikrau tunggwei puig bi. Lewo jimbut ei minu dima hi bigyo.>>5 Lene Yosua pai biyok <<Ma jibindei ba, jingon kwes ba, jide puig kwes cem lewo TUHAN mibon mun di mindur ei jikieti mem njap di hyep bu ug ri.>> 6 Lene noni cuk imam nya leu api ikon Brua Gi Preu bimbut tut bibie mben Israel yoho ba, igyai hagom bit leu nok nicuk yokti nya.
7 Lene TUHAN pai bak Yosua <<Midibon mindur mem njap di ammani di mibindei anyeng di jei ba, mben Israel sindi minggei sut na tirigi jo nibreisi mem yok bipia dingat rin bit na dem kep nok gi dingat rin bit Musa nipou su. 8 Ma apreu kep imam nya di imbut tut Brua Gi Preu bipia tirigi yuug krau minyei nintig dip lene ma ikinyon ei minyeiti lo, igya dideu nipimat.>>
9 Lene Yosua pai bak nide limwa nya <<Jikwei ngig jitingou mem TUHAN di nok jide Allah nihyet. 10 Tirigi sindi jicoi ug ei minu dima lene TUHAN mihwen mben Kanaan kin mben Het kin mben Hewi kin mben Feris kin mben Girgasi kin mben Amori kin mben Yebus yahagom bingwig sindam ei joho bei. Apino mijo nibreisi mem je bipia TUHAN di niyaijo Ningat rin ei jikieti, 11 tirigi No di ninyeng tak kep dihyei nisurti-nipekti hagom De Brua Gi Preu sigon Minyei Yordan bibie tut je. 12 Nogindini ma jidimig pinai nya ibou simnaibrimigcan ei ba, imangti dima tungwagom bikwop leu jide keret nya. 13 Tirigi imam di ikon TUHAN di ninyeng tak kep dihyei nisurti-nipekti hagom Nide Brua Gi Preu ikinyon tut ei Minyei Yordanti lene minyei mikes hon bibiam bu bi. Leu api minyei di biam kwei leu nibrig ma kwei mitti kui nai dem kep gino hi hajung ser minyei.>>
14 Lene tirigi mben Israel ilet ide prak meng ba, isigon Minyei Yordan bram imam nya di ikon Brua Gi Preu bibie mem yok ba, 15 imam nya sindi ikinyon ei minyei di suti (lewo Minyei Yordan su bibor tirigi bed dem mem timiei minu dima ikos ide gandum ei beisi) lene, 16 minyei mikes hon ba, biam bu bi. Leu api minyei hagom mitti kui nai dem kep gino hi hajung ser minyei ei minu ndig Adam dideu minu ndig Sartan. Lene minyei ninggup di biam ug ei Igpong Nsim bon nipingge leusi. Gima rino bon nituti di kei bibor mem mben Israel isigon Yordan pingge leusi di birok kik minu ndig Yerikho. 17 Tirigi mben Israel ikak ninggati dima lene imam di ikon TUHAN de Brua Gi Preu pima igya ei minyei nipingge leusi ei minyei nggimau bibou tungwatu nya yahagom yuug dihip ei nite dima ug nipou leu ug e.